بارىس قىرعىزستاننىڭ ۇلتتىق سيمۆولىنا اينالدى
قىرعىزستاندا بارىس ەلدىڭ ۇلتتىق سيمۆولىنا اينالدى. قىرعىزستان پرەزيدەنتى سادىر جاپاروۆ ءتيىستى جارلىققا قول قويدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ەجەلگى قىرعىز مادەنيەتىندە بارىس ۇلىلىقتى، تەكتىلىكتى، باتىلدىق پەن توزىمدىلىكتى بەينەلەگەن.
بارىستى قورعاۋ جونىندەگى دۇنيەجۇزىلىك فورۋمدا بارىس مەكەندەيتىن 12 ەلدىڭ جانە حالىقارالىق ەكولوگيالىق قاۋىمداستىق وكىلدەرىنىڭ قولداۋىمەن بارىستى قورعاۋ تۋرالى بىشكەك دەكلاراتسياسى قابىلدانىپ، بارىس پەن ەكوجۇيەنى قورعاۋدىڭ كەشەندى جاھاندىق جۇيەسى بەكىتىلدى.
قىرعىزستان مينيسترلەر كابينەتىنە رەسپۋبليكاداعى بارىس پوپۋلياتسياسىن جانە ونىڭ ەكوجۇيەسىن قورعاۋ، ۇلتتىق سيمۆولدى تانىمال ەتۋ، لوگوتيپ ويلاپ تابۋ سىندى قاجەتتى شارالاردى قابىلداۋ تاپسىرىلدى.
سونداي-اق ءبىرقاتار مەملەكەتتىك ورگاندارعا بارىستىڭ ۇلتتىق نىشانىن كەڭىنەن ناسيحاتتاۋ، حالىقارالىق ىنتىماقتاستىق اياسىندا ەكوجۇيەنى قورعاۋ شارالارىن ۇيىمداستىرۋ، حالىقارالىق پلاتفورمالاردا ينۆەستيتسيا تارتۋ، سونداي-اق ۇلتتىق سيمۆولدى تۋريستىك سەگمەنتتە پايدالانۋ تاپسىرىلدى.
ەستەرىڭىزگە سالا كەتەيىك، بارىس - حالىقارالىق تابيعاتتى قورعاۋ وداعىنىڭ قىزىل تىزىمىنە ەنگىزىلگەن جانە الەمنىڭ 12 ەلىندە سيرەك كەزدەسەدى.
جابايى تابيعاتتا بارىستىڭ جوعالىپ كەتۋى ەكولوگيالىق تەپە-تەڭدىكتىڭ بۇزىلۋ قاۋپىن تۋدىرادى. ال بۇل جانۋارلار مەن ادامزاتقا زياندى اسەر ەتەدى.
