قانتسىز كوفە ءولىم-ءجىتىم قاۋپىن تومەندەتەدى
استانا. KAZINFORM - امەريكاداعى تافتس ۋنيۆەرسيتەتىنىڭ عالىمدارى جۇرگىزگەن جاڭا زەرتتەۋ كوفە ءىشۋ مەن ءولىم-ءجىتىم قاۋپى اراسىنداعى بايلانىستى زەرتتەگەن، دەپ جازادى ازەرتادج.
اگەنتتىكتىڭ حابارلاۋىنشا، The Journal of Nutrition جۋرنالىندا جاريالانعان زەرتتەۋ كۇنىنە 1-2 كەسە كوفە ءىشۋ ءارتۇرلى سەبەپتەر بويىنشا بولاتىن ءولىم قاۋپىن، سونداي-اق جۇرەك-قانتامىر اۋرۋلارىنان بولاتىن ءولىم-ءجىتىم ءقاۋپىن ازايتاتىنىن كورسەتتى.
كوفە ىشپەيتىندەرمەن سالىستىرعاندا، قارا كوفە جانە از مولشەردە قانت پەن قانىققان ماي قوسىلعان كوفە ءولىم- ءجىتىم قاۋپىن 14 پايىزعا ازايتقان. دەگەنمەن، قانت پەن قانىققان مايى كوپ كوفە ىشكەندەردە وسىنداي بايلانىس بايقالعان جوق.
زەرتتەۋدىڭ باس اۆتورلارىنىڭ ءبىرى، پروفەسسور فان فان چجان امەريكالىق ەرەسەكتەردىڭ جارتىسىنا جۋىعى كۇندەلىكتى كەم دەگەندە ءبىر كەسە كوفە ىشەتىنىن ايتادى.
- سوندىقتان ونىڭ دەنساۋلىققا اسەرىن ءتۇسىنۋ ماڭىزدى. كوفەنىڭ پايداسى قۇرامىنداعى بيواكتيۆتى قوسىلىستارمەن بايلانىستى بولۋى مۇمكىن، ءبىراق ءبىزدىڭ زەرتتەۋ ناتيجەلەرىمىز قانت پەن ماي قوسۋ بۇل پايدانىڭ ازايۋىنا اكەلەتىنىن كورسەتەدى، - دەدى ول.
زەرتتەۋ بارىسىندا 1999 -جىلدان 2018 -جىلعا دەيىنگى كەزەڭدە 20 جاستان اسقان 46000 ادامدى قامتىعان ۇلتتىق ساۋالناما دەرەكتەرى تالداۋدان وتكىزىلدى. كوفە تۇتىنۋ ونىڭ تۇرىنە (كوفەيندى نەمەسە كوفەينسىز)، قانت پەن قانىققان ماي مولشەرىنە قاراي جىكتەلدى.
دەگەنمەن، كوفە تىم ءتاتتى نەمەسە مايلى بولعان جاعدايدا ونىڭ پايدالى قاسيەتتەرى جوعالادى. كۇنىنە ءۇش كەسە دەيىنگى كوفە تۇتىنۋ جاعىمدى اسەر بەرەدى، ال ودان ارتىق ىشكەن كەزدە بۇل اسەر بايقالمايدى. سونىمەن قاتار، زەرتتەۋ كوفە تۇتىنۋدىڭ قاتەرلى ىسىكپەن بايلانىستى ءولىم ءقاۋپىن تومەندەتپەيتىنىن كورسەتتى. ال كوفەينسىز كوفەنى تۇتىناتىندار اراسىندا وڭ اسەر بايقالماعان.
بۇعان دەيىن بيىل ەلىمىزدە قاڭتار ايىندا 1,1 مىڭ توننا قايتا وڭدەلگەن كوفە مەن شاي وندىرىلگەنى بەلگىلى بولدى. بۇل 2024 -جىلدىڭ قاڭتارىمەن سالىستىرعاندا %9,2 عا از.
