قانت ديابەتى الەۋمەتتىك ءمانى بار اۋرۋ رەتىندە قالادى - مينيسترلىك

استانا. KAZINFORM - الەۋمەتتىك جەلىدە قانت ديابەتى دەرتىن الەۋمەتتىك ماڭىزى بار دەرتتەر قاتارىنان الىپ تاستادى دەگەن اقپارات تارادى. قازىر قوعامدا ءارتۇرلى بولجام ايتىلىپ جاتىر، وسى ورايدا دەنساۋلىق ساقتاۋ مينيسترلىگى ءمان-جايدى ءتۇسىندىردى.

- 2025 -جىلعى 14-شىلدەدە مىندەتتى الەۋمەتتىك مەديتسينالىق ساقتاندىرۋ (م ءا م س) جۇيەسى تۋرالى زاڭ كۇشىنە ەندى، ونىڭ شەڭبەرىندە مەملەكەت قاراجاتىنىڭ ەسەبىنەن كەپىلدى قامتاماسىز ەتىلۋگە جاتاتىن الەۋمەتتىك ءمانى بار اۋرۋلاردىڭ تىزبەسى قايتا قارالدى. تۋبەركۋلەز، ا ي ت ۆ، قاتەرلى ىسىكتەر، ينسۋلت، جەكەلەگەن سيرەك جانە مىنەز-قۇلىق بۇزىلىسىن قوسا العاندا، ەلدىڭ سانيتاريالىق- ەپيدەميولوگيالىق سالاۋاتتىلىعىنا نەگىزگى اسەر ەتەتىن اۋرۋلارعا مەملەكەتتىك كەپىلدىك تولىق كولەمدە ساقتالدى. قانت ديابەتى الەۋمەتتىك ءمانى بار اۋرۋ رەتىندە قاراستىرىلا بەرەدى. الايدا، حالىقارالىق پراكتيكانى ەسكەرە وتىرىپ جانە تەراپيانى كەڭەيتۋ ماقساتىندا ونى قارجىلاندىرۋ م ءا م س پاكەتىنە اۋىستىرىلدى. بۇل شەشىم پاتسيەنتتەردى قورعاۋ دەڭگەيىن تومەندەتپەيدى، كەرىسىنشە قارجىلاندىرۋدىڭ تۇراقتىلىعىن نىعايتادى جانە دەنساۋلىق ساقتاۋ قىزمەتتەرىنىڭ اۋقىمىن، سونىڭ ىشىندە سوڭعى ەمدەۋ ادىستەرىن كەڭەيتۋگە مۇمكىندىك بەرەدى، - دەلىنگەن رەسمي اقپاراتتا.

بۇل رەتتە 0 دەن 18 جاسقا دەيىنگى بالالار، سونداي-اق قانت ديابەتىنىڭ اسقىنعان اعىمى (رەتينوپاتيا، نەفروپاتيا، ب س ا، جۇرەك-قان تامىرلارى اۋرۋلارى) بار ەرەسەك پاتسيەنتتەر، ادەتتە، م ءا م س شەڭبەرىندە ساقتاندىرىلعان جەڭىلدىكتى ساناتتارعا كىرەدى.

ەكىنشى تيپتەگى قانت ديابەتى نەگىزىنەن 45 جاستان اسقان ادامداردا انىقتالادى. 2 ءتيپتى قانت ديابەتى دامۋىنىڭ نەگىزگى قاۋىپ فاكتورى ارتىق سالماقتىڭ بولۋى، جوعارى كالوريالى تاعام جانە وتىرىقشى ءومىر سالتى. بۇل اۋرۋدىڭ ەرتە دياگنوزىمەن، تامىرلى اسقىنۋلاردىڭ پايدا بولۋىمەن جانە دۇرىس كەشەندى ەمدەۋمەن ۇزاق كلينيكالىق رەميسسياعا قول جەتكىزۋ مۇمكىندىگى بار.

سونداي-اق قانت ديابەتىن ەرتە انىقتاۋعا سكرينينگ جۇرگىزۋ ساقتاندىرۋ مارتەبەسىنە قاراماستان تەگىن مەملەكەتتىك كەپىلدەندىرىلگەن كومەك شەڭبەرىندە 2026 -جىلعى 1-قاڭتاردان باستاپ جۇرگىزىلەدى.

قانت ديابەتى بار پاتسيەنتتەردى ءدارى-دارمەكپەن قامتاماسىز ەتۋ بويىنشا مينيسترلىك اۋقىمدى تالداۋ جۇرگىزدى، ونىڭ بارىسىندا ساتىپ الۋ قۇرىلىمى قايتا قارالىپ، پرەپاراتتاردىڭ پوزيتسياسى ۇتىمدى بولدى جانە تىزبەلەرگە ەنگىزۋ ولشەمشارتى ناقتىلاندى.

- فوكۋستا - جۇيەنىڭ تۇراقتىلىعى، حالىقارالىق ۇسىنىستارعا سايكەستىگى جانە كلينيكالىق نەگىزدىلىگى. بارلىق شەشىم پاتسيەنتتەردىڭ، اسىرەسە بالالىق شاقتىڭ مۇددەسىنە باسىمدىق بەرە وتىرىپ جانە ولاردىڭ ەمدەۋ قۇقىعىن تولىق ساقتاي وتىرىپ قابىلدانادى.

قازاقستان بۇگىندە وڭىردەگى ينسۋليندەردىڭ كەڭ سپەكترىن ۇسىنادى جانە بارلىق ساناتتاعى پاتسيەنتتەر ءۇشىن تەگىن ۇسىنۋدى قامتاماسىز ەتەدى. زاماناۋي پرەپاراتتارعا، ونىڭ ىشىندە ينسۋلين پومپالارىنا ارنالعان شىعىن ماتەريالدارىنىڭ باعاسىن قايتا قاراۋ جانە بيۋدجەت رەسۋرستارىن جوعارى ءتيىمدى تەراپيانىڭ پايداسىنا قايتا ءبولۋ ارقىلى دايەكتى كوشۋ جۇرگىزىلىپ جاتىر، - دەيدى ۆەدومستۆودان.

سونىمەن قاتار مينيسترلىك دەتەمير ءينسۋلينى Novo Nordisk ءوندىرۋشىسىنىڭ ونى 2026 -جىلدان باستاپ شىعارۋدى توقتاتۋ تۋرالى رەسمي حابارلاماسىنا بايلانىستى ساتىپ الۋدان شىعارىلعانىن حابارلاپ وتىر.

- بوساتىلعان قاراجاتقا تەك بالالار مەن جۇكتى ايەلدەردە عانا ەمەس، كلينيكالىق ۇسىنىمدارعا سايكەس بارلىق مۇقتاج پاتسيەنت ءۇشىن دە دەگلۋدەك ينسۋلينىن جەتكىزۋدى كەڭەيتۋ جوسپارلانىپ وتىر، - دەپ تۇسىندىرەدى مينيسترلىكتەن.

مينيسترلىك دالەلدى مەديتسينا قاعيداتىن، حالىقارالىق ستاندارت پەن ازاماتتاردىڭ ناقتى قاجەتتىلىگىن باسشىلىققا الا وتىرىپ، ءدارى-دارمەكپەن قامتاماسىز ەتۋ جۇيەسىن جەتىلدىرۋدى جالعاستىرادى. ماقسات وزگەرىسسىز قالادى - بارلىعىنا تەڭ، قاۋىپسىز جانە ءتيىمدى ەمدەۋ.

ايتا كەتسەك، كەيىنگى 3 جىل ارالىقتا قازاقستان قانت ديابەتىنە شالدىققانداردى ەمدەۋ ءۇشىن 157 ميلليارد تەڭگەدەن استام قارجى جۇمسادى. بۇل قارجىعا نەگىزىنەن ءدارى-دارمەك ساتىپ الىنادى.

بيىل كوكتەمدە جاستار قانت ديابەتىنە كوپتەپ شالدىعىپ جاتقانى تۋرالى حابارلاعان ەدىك.

اۆتور

داۋلەت ىزتىلەۋ