قۋاندىق بيشىمبايەۆتىڭ ءىسى سوتقا ءتۇستى

استانا. KAZINFORM - ەكس-شەنەۋنىك قۋاندىق بيشىمبايەۆقا قاتىستى ءىس سوتتىڭ قاراۋىنا جىبەرىلدى.

«2024-جىلعى 26- اقپاندا استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا كۇدىكتىلەر ق. بيشىمبايەۆ پەن ب. بايجانوۆقا قاتىستى قىلمىستىق ءىس كەلىپ ءتۇستى»، - دەلىنگەن حابارلامادا.

سوتتىڭ اقپاراتىندا ايتىلعانداي، كۇدىكتى قۋاندىق بيشىمبايەۆقا ق ر قىلمىستىق كودەكستىڭ 99-بابى 2-بولىگىنىڭ 5) تارماعى بويىنشا ادام ءولتىرۋ، قاساقانا، اسا قاتىگەزدىكپەن ادام ءولتىرۋ، قىلمىستىق كودەكستىڭ 110-بابى 2-بولىگىنىڭ 1) تارماعى بويىنشا ماتەريالدىق جاعىنان تاۋەلدى ادامدى جۇيەلى تۇردە ۇرىپ-سوعۋ نەمەسە وزگە دە زورلىق-زومبىلىق ارەكەتتەرى ارقىلى فيزيكالىق جانە پسيحيكالىق قيناۋ فاكتىسى بويىنشا ايىپ تاعىلعان.

كۇدىكتى ب. بايجانوۆقا قىلمىستىق كودەكستىڭ 432-بابى بويىنشا اسا اۋىر قىلمىستى جاسىرۋ جانە قىلمىستىق كودەكستىڭ 434-بابى اسا اۋىر قىلمىس جاساعانى تۋرالى حابارلاماۋ فاكتىسى بويىنشا ايىپ تاعىلعان.

«قىلمىستىق-پروتسەستىك كودەكستىڭ 319-بابىنا سايكەس، سۋديا ءىستى سوتتا قوزعاۋ تۋرالى شەشىمدى 5 تاۋلىكتەن كەشىكتىرمەي شىعارادى»، - دەيدى قالالىق سوتتان.

ەسكە سالا كەتەيىك، 2023-جىلى 9 قاراشادا استاناداعى باۋ مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم كەلگەنشە كوز جۇمدى.

كەيىن ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

وتكەن جىلى 15-قاراشادا وتكەن كەڭەستە پرەزيدەنت ق. توقايەۆ ىشكى ىستەر مينيسترىنە بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.

ايتا كەتسەك، بيىل 11-قاڭتاردا ەلوردا سوتى قۋاندىق بيشىمبايەۆتى كۇزەتپەن ۇستاۋ مەرزىمىن 2 ايعا ۇزارتقان ەدى.