قۋاندىق بيشىمبايەۆتىڭ بوستاندىقتا جۇرگەنى راس پا
استانا. KAZINFORM - الەۋمەتتىك جەلىدە سوتتالعان ەكس-شەنەۋنىك قۋاندىق بيشىمبايەۆتىڭ اباقتىدان قاشىپ كەتكەنى تۋرالى اقپارات تارادى. ىشكى ىستەر مينيسترلىگى قىلمىستىق-اتقارۋ جۇيەسى كوميتەتى جەلىدەگى جازباعا رەسمي جاۋاپ بەردى.
«الەۋمەتتىك جەلىلەردە سوتتالعان ق. بيشىمبايەۆتىڭ قاشقانى تۋرالى جالعان اقپارات تارالىپ جاتىر. بۇل شىندىققا جاناسپايدى. سوتتالعان ازامات قاۋىپسىزدىگى ەڭ جوعارى مەكەمەدە جازاسىن وتەپ جاتىر»، - دەپ حابارلايدى كوميتەتتىڭ باسپا ءسوز قىزمەتى.
وسى ورايدا قىلمىستىق-اتقارۋ جۇيەسى كوميتەتى ازاماتتاردى جالعان اقپاراتتاردى تاراتپاۋعا جانە تەك رەسمي دەرەكتەرگە سەنۋگە شاقىرادى.
«وسى ىسكە قاتىستى جالعان اقپاراتتى تاراتۋ بويىنشا قىلمىستىق ءىس قوزعالعانىن جانە كىنالىلەر جاۋاپقا تارتىلاتىنىن حابارلايمىز»، - دەپ ەسكەرتتى كوميتەتتەن.
ەسكە سالايىق، ەلوردا سوتى بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتى ايەلىن ازاپتاپ، ولتىرگەنى ءۇشىن كىنالى دەپ تاپتى. ول 24 جىلعا باس بوستاندىعىنان ايىرىلدى.
26-ماۋسىمدا اپەللياتسيالىق سوت القاسى ق. بيشىمبايەۆ پەن ب. بايجانوۆتىڭ ۇكىمىن وزگەرىسسىز قالدىردى.
اۆتور
داۋلەت ىزتىلەۋ
