قۋاندىق بيشىمبايەۆتىڭ اناسى سوتتا ءسوز الدى
استانا. KAZINFORM - كۇدىكتى قۋاندىق بيشىمبايەۆتىڭ اناسى الميرا نۇرلىبەكوۆا سوت وتىرىسىندا العاش رەت پىكىر ءبىلدىردى.
استانادا قۋاندىق بيشىمبايەۆقا قاتىستى قىلمىستىق ءىس بويىنشا اشىق سوت وتىرىسى جالعاسىپ جاتىر. بۇرىنعى ۇلتتىق ەكونوميكا ءمينيسترى ازاماتتىق نەكەدەگى جۇبايى سالتانات نۇكەنوۆانى اسا قاتىگەزدىكپەن ءولتىردى دەپ ايىپتالىپ وتىر.
تۇستەن كەيىنگى سوت وتىرىسىنا جابىرلەنۋشى ايتبەك امانگەلدى جانە ونىڭ وكىلدەرىنىڭ ءبىرى قاتىسقان جوق. جابىرلەنۋشى تاراپتىڭ ايتۋىنشا، ايتبەك امانگەلدىنىڭ اتا-اناسى ءوزىن جايسىز سەزىنىپ، جەدەل جاردەم شاقىرىلعان، ايتبەك سول سەبەپتى سوت زالىنان شىعىپ كەتكەن. ءوز كەزەگىندە سۋديا سوت زالىنان رۇقساتسىز شىعۋعا بولمايتىنىن ايتتى.
«ول كەز كەلگەن ۋاقىتتا كىرىپ-شىعا المايدى. ول ءۇشىن سوتتان رۇقسات سۇراۋ كەرەك. ءتارتىپ بارىنە ورتاق، ۇزىلىسكە دەيىن كۇتسىن»، - دەدى سۋديا ايجان قۇلبايەۆا.
بۇگىن ق. بيشىمبايەۆتى قورعاۋشى تاراپ سوتتا ماسكەۋلىك مامانداردىڭ قورىتىندىسىمەن تانىستىردى. قورعاۋشى نازكەن قۇسايىنوۆا رەسەيلىك مامانداردىڭ قورىتىندىسىن وقي وتىرىپ، سالتانات نۇكەنوۆانىڭ باسىنان قاننىڭ كەتۋى، ولىمنەن 3-4 اپتا بۇرىن پايدا بولعان گەماتوما بولۋى مۇمكىن دەپ مالىمدەيدى.
سونداي-اق، سوت وتىرىسىندا قۋاندىق بيشىمبايەۆتىڭ اناسى الميرا نۇرلىبەكوۆا سويلەدى.
«ارينە، مەن زاڭگەر ەمەسپىن، ءبىراق ماسكەۋلىك مامانداردىڭ قورىتىندىسىن قابىلداماساڭىز، ۇلىمنىڭ ءوزىن قورعاۋ جولىندا دالەلدەر كەلتىرۋدە كونستيتۋتسيالىق قۇقىعىن شەكتەۋ دەپ سانايمىن. بۇنى انا رەتىندە شىن جۇرەكتەن ايتىپ وتىرمىن»، - دەدى كۇدىكتىنىڭ اناسى سۋدياعا قاراي وتىرىپ.
سوت وتىرىسى ەرتەڭ ساعات 10:00 دە جالعاسادى.
ايتا كەتەيىك، بۇگىن تۇسكە دەيىن قۋاندىق بيشىمبايەۆتىڭ ءىسى بويىنشا سوت وتىرىسىنان تىكەلەي تاراتىلىم ۋاقىتشا توقتاتىلعان ەدى.
وعان سەبەپ تاراپتاردىڭ ءبىرى القابيلەردىڭ قاتىسۋىنسىز ءوتىنىشحات جاساۋدى سۇرادى. سول سەبەپتەن سۋديا ترانسلياتسيانى توقتاتۋ تۋرالى شەشىم قابىلدادى.
قۋاندىق بيشىمبايەۆتىڭ ءىسى بويىنشا ونلاين-كورسەتىلىم رەيتينگى كەيبىر سەريالداردان اسىپ ءتۇستى.
تىكەلەي ەفيرگە 250 مىڭ كورەرمەننىڭ ءبىر مەزگىلدە قوسىلۋى بويىنشا رەكورد تىركەلدى. 25-44 جاس ارالىعىنداعى كورەرمەندەر جالپى كورەرمەن سانىنىڭ %58 قۇراپ وتىر.
