قانداي زاتتاردى پويىزدا تاسىمالداۋعا زاڭمەن تيىم سالىنعان

استانا. KAZINFORM - «جولاۋشىلار تاسىمالى» ا ق تەمىرجول كولىگىندە تاسىمالداۋعا تىيىم سالىنعان زاتتار تۋرالى جولاۋشىلاردىڭ ەسىنە سالدى.

- قازاقستان رەسپۋبليكاسىنىڭ زاڭناماسىنا سايكەس، قاۋىپتى جانە تىيىم سالىنعان زاتتاردى پويىزعا الىپ ءوتۋ ارەكەتى قىلمىستىق جاۋاپكەرشىلىككە اكەپ سوعادى. وسىعان وراي كومپانيا جولاۋشىلارعا ساپارعا شىعار الدىندا الىپ جۇرۋگە تىيىم سالىنعان زاتتاردىڭ تىزىمىمەن الدىن الا مۇقيات تانىسۋ قاجەتتىگىن قاتاڭ تۇردە ەسكەرتەدى، - دەپ حابارلادى كومپانيادان.

پويىزعا قانداي زاتتاردى الىپ وتۋگە بولمايدى؟

● جارىلعىش قۇرىلعىلار مەن جارىلعىش زاتتار؛

● راديواكتيۆتى جانە ەسىرتكى زاتتارى، تەز تۇتاناتىن سۇيىقتىقتار مەن زاتتار، ونىڭ ىشىندە بەنزين، مەتيل ەفيرى، مەتانول؛

● جانعىش قاتتى زاتتار؛

● سۇيىق نەمەسە قاتتى كۇيدەگى ۋلى، كۇشتى اسەرى بار ۋلى زاتتار؛

● جۇقپالى نەمەسە بيولوگيالىق قاۋىپتى ماتەريالدار، قۇرامىندا وسىنداي زالالى بار زاتتار مەن بۇيىمدار؛

● اتىس قارۋىنىڭ بارلىق تۇرلەرى، ونىڭ ىشىندە لاقتىرۋ، ەلەكترلىك، مەحانيكالىق قارۋلار، ارالاس، ۇڭعىسىز تراۆماتيكالىق، گازدى، سوققىلاۋ- ۇساقتاۋ ارەكەتىنىڭ زاتتارى، شاشكالار، قىلىشتار، كەسكىشتەر، ياتاگاندار، پالاشتار، شپاگالار، تۇيرەگىشتەر، قانجارلار، قىلىش، شانىشقى، قانجارلار، كورتيكتەر، ستيلەتتەر، كاستەتتەر، سويىلدار؛

● اتىس جانە گاز قارۋلارىنا ارنالعان وق-دارىلەر، ونىڭ ىشىندە جاۋىنگەرلىك، جارىق-دىبىستىق، تراۆماتيكالىق اسەر ەتەتىن پاتروندار، بوس، جاراقتالعان اڭشىلىق پاتروندار.

- ساپار الدىندا جولاۋشىلار ۆوكزالداردا مىندەتتى تۇردە قاۋىپسىزدىك تەكسەرۋىنەن وتەدى. بۇگىندە ەلىمىزدىڭ ءىرى تەمىرجول ۆوكزالدارى رەنتگەن- تەليەۆيزيالىق قوندىرعىلارمەن، ستاتسيونارلىق جانە قول مەتالل دەتەكتورلارىمەن، سونداي-اق پورتاتيۆتى انىقتاۋ قۇرىلعىلارىمەن تولىق جابدىقتالعان. سونىمەن قاتار، بەينەباقىلاۋ، دابىل بەرۋ جانە كۇزەت جۇيەلەرى ۇزدىكسىز جۇمىس ىستەيدى. جولاۋشىلاردىڭ قاۋىپسىزدىگىن تاۋلىك بويى پوليتسيا قىزمەتكەرلەرى مەن كۇزەت ۇيىمدارىنىڭ وكىلدەرى قامتاماسىز ەتەدى، - دەلىنگەن حابارلامادا.

ساپار كەزىندە دە قاۋىپسىزدىك ۇنەمى قاتاڭ باقىلاۋدا. پويىزداردا ورناتىلعان بەينەباقىلاۋ جۇيەسى ارقىلى جۇرگىزىلەتىن جازبالار تەك «جولاۋشىلار تاسىمالى» ا ق سيتۋاتسيالىق ورتالىعىنىڭ ۋاكىلەتتى قىزمەتكەرلەرىنە عانا قولجەتىمدى. باقىلاۋ تاۋلىك بويى جۇزەگە اسىرىلادى جانە ۆاگوندار، كىرۋ-شىعۋ ەسىكتەرى مەن جالپى قولدانىستاعى ايماقتار ارنايى كامەرالارمەن تولىق قامتىلعان.

بۇگىنگى تاڭدا جوسپارلى جۇمىستار ناتيجەسىندە «تالگو» پويىزدارىنىڭ 24 قۇرامىندا 1350 بەينەكامەرا ىسكە قوسىلدى.

ەسكە سالا كەتەيىك، بۇعان دەيىن پويىز بيلەتىن كىمدەر جەڭىلدىكپەن ساتىپ الا الاتىنىن جازعان ەدىك.