قانداي جاعدايدا قازاقستاندىق بالا شەتەلدىكتەرگە اسىراپ الۋعا بەرىلەدى

استانا. KAZINFORM - وقۋ-اعارتۋ مينيسترلىگى شەتەلدىكتەردىڭ بالا اسىراپ الۋ پروتسەسى نەلىكتەن ازايعانىن ءتۇسىندىردى.

مينيسترلىكتىڭ ايتۋىنشا، شەتەلدىك ازاماتتاردىڭ بالا اسىراپ الۋ ءتارتىبى «نەكە جانە وتباسى تۋرالى» كودەكسى ارقىلى ايقىندالدى جانە رەگلامەنتتەلەدى. سونىمەن بىرگە، بالانى اسىراپ الۋعا بەرۋ تالاپتارى كۇشەيتىلگەن.

− شەتەلدىكتەردىڭ بالا اسىراپ الۋى، ەگەر ول بالانىڭ مۇددەلەرىنە ساي بولسا، سونداي-اق تۋىستارى مەن قازاقستاندىق ازاماتتار بالالاردى ءوز وتباسىلارىنا ورنالاستىرۋدان باس تارتقان جاعدايدا عانا مۇمكىن بولادى. كودەكسكە سايكەس، قازاقستاندا شەتەلدىك بالا اسىراپ الۋ ءراسىمى ءوز قىزمەتىنەن كەز كەلگەن قارجىلىق نەمەسە باسقا دا پايدا الۋعا تىيىم سالىنعان اككرەديتتەلگەن كوممەرتسيالىق ەمەس اگەنتتىكتەر ارقىلى عانا كوزدەلگەن، − دەپ جازىلعان وقۋ-اعارتۋ مينيسترلىگىنىڭ رەسمي جاۋابىندا.

بۇگىنگى تاڭدا قازاقستاندا 2 كوممەرتسيالىق ەمەس اگەنتتىك اككرەديتتەلگەن.

− دەگەنمەن، سوڭعى ەكى جىلدا بالالاردى ءوز وتباسىلارىنا تاربيەلەۋگە العىسى كەلەتىن قازاقستاندىق ازاماتتاردىڭ كوبەيۋىنە جانە شەتەلدىكتەر اسىراپ الاتىن بالالاردىڭ بولماۋىنا بايلانىستى وسى اككرەديتتەلگەن اگەنتتىكتەردىڭ قىزمەتى توقتاپ تۇر، − دەيدى مينيسترلىك.

سونىمەن بىرگە، جىل باسىنان بەرى 1487 جەتىم جانە اتا-اناسىنىڭ قامقورلىعىنسىز قالعان بالا قازاقستاندىق ازاماتتاردىڭ وتباسىلارىنا قورعانشىلىققا (قامقورشىلىققا)، پاتروناتتىق تاربيەگە، پاتروناتتىق وتباسىنا جانە اسىراپ الۋعا بەرىلگەن.

بۇعان دەيىن پرەمەر-مينيستر ولجاس بەكتەنوۆ سەنات جەتىم بالالاردى اسىراپ الۋ ءراسىمىن جەڭىلدەتۋ باعىتىندا قانداي شارالار قولعا الىنعانىن ايتقان ەدى.

سونداي-اق، 2025 -جىلدىڭ شىلدەسىنەن باستاپ وتباسىلىق ورنالاستىرۋدىڭ جاڭا نىسانى - بالانى قابىلداۋشى كاسىبي وتباسى ەنگىزىلەدى.

اۆتور

ايجان سەرىكجان قىزى