قانات يسلام قازاق بوكسشىلارىنىڭ جاپپاي جەڭىلۋىنە نە سەبەپ بولعانىن ايتتى

استانا. قازاقپارات - كاسىپقوي بوكسشى قانات يسلام قازاقستاندىق بوكسشىلاردىڭ پاريج وليمپياداسىنداعى ساتسىزدىگىنە نە سەبەپ بولعانىن ايتىپ، وزىنەن كەيىنگى سپورتشىلارعا كەڭەسىن ايتتى. ونىڭ ايتۋىنشا، بوكسشىلارىمىزدىڭ جاتتىعۋ ادىستەرى ەسكىرگەن.

شەبەرلىكتى شىڭداۋ مەن پسيحولوگيالىق تۇرعىدا مىقتى بولۋ ءۇشىن شەتەلدىك ماماندارمەن جۇمىس ىستەۋ كەرەگىن اتاپ ءوتتى.

«ارمىسىزدار، قۇرمەتتى وتانداستار! كاسىپقوي سپورتشىمىن. وسى سپورتتا جۇرگەنىمە 30 جىلدىڭ ءجۇزى بولىپتى. سوڭعى 12 جىل بويى امەريكادا كاسىپقوي بوكسپەن اينالىستىم. وسى جولى فرانسيادا ءوتىپ جاتقان وليمپيادا ويىندارىن قاراپ وتىرىپ، ءوزىمىزدىڭ بوكسشىلاردىڭ جەڭىلگەنىن كورگەن كەزدە كوپتەگەن جانكۇيەرلەر مەنىڭ پىكىرىمدى سۇراپ جاتىر. «ءبىزدىڭ بوكس نە بولىپ جاتىر؟ نە ءۇشىن جىگىتتەر جەڭىلىپ جاتىر» دەپ جازىپ جاتىر. كوماندانى باسقارىپ وتىرعان جاتتىقتىرۋشىلاردىڭ بارلىعىن سىيلايمىن، بىلىكتى مامان دەپ ەسەپتەيمىن. ءبىراق ءوزىم كاسىپقوي بوكسشى رەتىندە ايتارىم - قازىرگى ءبىزدىڭ اۋەسقوي بوكستا ىستەپ جاتقان جاتتىعۋلار زامان تالابىنا ساي ەمەس»، - دەيدى قانات يسلام.

بوكسشى جاتتىعۋ جيىندارىن جىل سايىن ءبىر تاۋدىڭ ەتەگىندە وتكىزۋ دۇرىس ەمەس ەكەنىن ايتادى.

«مەن ءوزىم 12 جىل امەريكادا ءجۇرىپ، كوپ نارسە ۇيرەندىم. بۇرىن مەن سول جاتتىعۋدى دۇرىس دەپ ويلاسام، قازىر قاتە دەپ ايتامىن. ويتكەنى، ءبىزدىڭ جىگىتتەردىڭ جاتتىعۋ جيىندارىنىڭ 80-90 پايىزى ءبىر تاۋدىڭ قۋىسىندا وتەدى. سول جەرگە تىعادى، ەشقايدا شىعارمايدى. جارىسقا اپاراعان سوڭ قايتادان سول جەرگە اكەلەدى. بۇكىل وبلىستىڭ جاتتىقتىرۋشىلارى كەلىپ، باس باپكەردىڭ قاس-قاباعىنا قاراپ وتىرادى. سونىڭ ىعىنا جىعىلىپ، جىگىتتەردىڭ كوبى بۇرىننان كەلە جاتقان جۇرىسىنەن جاڭىلادى. ىستەيتىن جاتتىعۋدى دا، ىستەمەيتىنىن دە ءبارىن جاساعان سوڭ، قاراساڭ، جىگىتتەر شارشاڭقى. سپورتتا بۇرىنعىداي «كىم قاتتى شارشاسا، كىم قاتتى جۇمىس ىستەسە، كىم كوپ جەسە چەمپيون بولادى» دەگەن ۇستانىم جوق. قازىر دۇرىس جاتتىعۋ ىستەسەڭ جانە دۇرىس تاماقتانساڭ عانا ارىقتايسىڭ دەگەن تالاپ قويىلادى»، - دەيدى ول.

قانات يسلام شەتەلدە ءجۇرىپ جيناعان تاجىريبەسىن ايتىپ، قازاق بوكسشىلارىنا ىزدەنىستە ءجۇرۋدى ۇسىندى.

«جىگىتتەردىڭ بارلىعىنىڭ شارشايتىن سەبەبى - قاجىعان. ءبىر جەردە، ءبىر تاۋدىڭ قۋىسىندا جاتتىعۋ ىستەتە بەرگەن سوڭ جالىعادى. ويتكەنى، ءوزىڭدى ويلاماي، باپكەردى ويلاپ كەتەسىڭ. امەريكادا، مەكسيكادا تۇرعاندا كورگەنىم - جىگىتتەر ماشينا سەكىلدى شارشامايدى. ول جەردە تاماق، دۇرىس جاتتىعۋ جانە سەنىڭ كوڭىل-كۇيىڭە ءمان بەرەدى. مەنىڭ دە بويىمدا قورقىنىش بولدى. 10-20 مىڭدىق ارەناعا كىرگەندە قىسىلاسىڭ، قورقاسىڭ. سول كەزدە ساسپاي، ءوزىڭدى كورسەتۋ ءۇشىن نە ىستەۋ كەرەگىن تۇسىندىرەتىن ماماندارمەن جۇمىس ىستەدىم. 3 مىڭ دوللاردان 10 مىڭ دوللارعا دەيىن سول ماماندارعا اقشا تولەدىم. ءسويتىپ، تەر توگىپ قانا قويماي، كوڭىل-كۇي، تاماق جانە ۆيتامين دەگەن نارسە بىرگە ءجۇرۋى كەرەك. بىزدە سپورتتىڭ ءتۇرلى سالاسىنداعى ءاربىر وبلىستان مىقتى مامانداردى شەتەلگە جىبەرىپ، تاجىريبە الماسۋ كەرەك. بوكستا دا ءدال سولاي. كورشى ەلدىڭ جىگىتتەرى امەريكاعا شىعىپ، كاسىپقوي بوكسشىلارعا جاقىنداپ ەدى، بويلارىندا سەنىمدىلىك پايدا بولدى. ءبىزدىڭ دە سپورتشىلارعا «وزدەرىڭ دە ىزدەنىڭدەر» دەپ ايتقىم كەلەدى. كەشكە دەيىن «اعاي، اعاي» دەپ قاس-قاباعىنا قاراماي، ىزدەنىستە بولىڭدار. شەتەلگە شىعىڭدار. شەتەلدەن جاتتىقتىرۋشىلار اكەلىپ، نەگە جۇمىس ىستەمەسكە؟ ويتكەنى، بىزدە ءبىر تاكاپپارلىق بار. قازاق بوكسىندا كەڭەس كەزىنەن قالعان مەكتەبىمىز بار دەپ جابىسىپ الادى. ونىڭ دا جاقسىسىن، شەتەلدىڭ مىقتى ماماندارىنان دا كەڭەس الۋ كەرەك. ءارقاشان ىزدەنىستە بولىڭىزدار، ۇيرەنىڭىزدەر»، - دەيدى ول.

ال ءوزى قازاق بوكسشىلارىنا كومەكتەسۋگە ءاردايىم دايىن ەكەنىن ايتادى.

«مەن دە مەكسيكادا، كۋبادا، دومينيكانادا جاتقاندا نەشە ءتۇرلى ۆيتاميندەر الدىم. ءاربىر جارىسىمدى جەڭىل وتكىزگەن كەزدەر بولدى. قازىر مەن دە ىزدەنىستەمىن. سپورت دەگەن ىزدەنىستى تالاپ ەتەدى. مەنى شاقىراتىن بولسا، قازاق سپورتشىلارىنا كومەكتەسۋگە دايىنمىن. بۇل تەك ءبىر وبلىستىڭ مۇددەسى ەمەس، بۇكىل ەلدىڭ مۇددەسى. قازاققا جانى اشيتىن مەن دەگەن ازاماتتار وسىلاي پىكىر ايتقانى دۇرىس»، - دەيدى قانات يسلام.