قانات بوزىمبايەۆ قوستاناي وبلىسىنا جۇمىس ساپارىمەن باردى
استانا. KAZINFORM - بۇگىن پرەمەر- ءمينيستردىڭ ورىنباسارى - سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى رەسپۋبليكالىق شتاب باسشىسىنىڭ ورىنباسارى قانات بوزىمبايەۆ قوستاناي وبلىسىنا جۇمىس ساپارىمەن باردى.
اتاپ ايتقاندا، توتەنشە جاعداي جاريالانعان امانگەلدى، جانگەلدى اۋداندارى مەن ارقالىق قالاسىنداعى جاعدايمەن تانىستى، دەپ حابارلايدى ق ر ۇكىمەتىنىڭ باسپا ءسوز قىزمەتى.
قانات بوزىمبايەۆ ايماق باسشىسى قۇمار اقساقالوۆپەن بىرگە امانگەلدى اۋدانى امانگەلدى اۋىلىنداعى سۋ باسقان ۇيلەردى ارالاپ، وبلىس ورتالىعىنا اپاراتىن جولداردىڭ جاعدايىن زەردەلەپ، حالىققا كومەك كورسەتۋ بويىنشا ەرىكتىلەر ورتالىعىنا باردى. ورتالىقتىڭ ۇيىمداستىرۋشىسى ايبەك تانابايەۆ اۋدانعا گۋمانيتارلىق كومەكتىڭ ءالى دە كەلىپ جاتقانىن ايتتى. مۇندا 3 كۇن ىشىندە 20 توننادان استام ازىق-تۇلىك، كيىم-كەشەك جانە گيگيەنالىق قۇرالدار جەتكىزىلدى.
جانگەلدى اۋدانىندا پرەمەر-ءمينيستردىڭ ورىنباسارى كولقامىس اۋىلىنداعى سۋ تاسقىنى بولعان جەرگە بارىپ، سونداي- اق قارعىن سۋدان زارداپ شەككەن كوكالات اۋىلىنىڭ تۇرعىندارىمەن كەزدەستى. اۋداندى اۋەدەن باقىلاۋ بارىسىندا «ارقالىق - ەكىدىن» اۋداندىق ماڭىزى بار جولداعى اپاتتى كوپىرگە تەكسەرۋ جۇرگىزىلىپ، قالا اكىمى ەكىدىن كەنتىندەگى سۋ تاسقىنىنان قالىپتاسقان جاعداي تۋرالى باياندادى.
مۇنان سوڭ پوليتەحنيكالىق كوللەدجدىڭ جاتاقحانا عيماراتىنداعى قۇتقارۋ پۋنكتىنە ورنالاستىرىلعان قىزىلجۇلدىز اۋىلىنىڭ تۇرعىندارىمەن كەزدەسۋ ءوتتى.
سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى وبلىستىق جەدەل شتاب ارقالىق قالاسىندا ورنالاسقان. وبلىستىڭ بارلىق اۋماعىندا وبلىستىق، قالالىق جانە اۋداندىق جەدەل شتابتار جۇمىس ىستەيدى. شىعىندى باعالاۋ بويىنشا كوميسسيا قۇرىلدى.
ايتا كەتسەك، قوستاناي وبلىسىنىڭ وڭتۇستىگىندەگى 75 جەر ءۇيدى سۋ باسقان. 13 سۋ شايعان جانە 7 بۇلىنگەن جول (1 كوپىر، 6 جول جامىلعىسى) باقىلاۋدا. 12 ەلدى مەكەندە كولىك قاتىناسى جوق. 1,2 مىڭ ادام ەۆاكۋاتسيالاندى، ونىڭ 408 ءى بالا. قارعىن سۋدى سورۋ، قاپتاردى توسەۋ جۇمىستارى جالعاسىپ جاتىر. سۋ تاسقىنى باستالعاننان بەرى 686,2 مىڭ تەكشە مەتردەن استام قارعىن سۋ سورىلىپ، 16 مىڭنان استام قاپ توسەلىپ، 1,3 مىڭ توننا ينەرتتى ماتەريال توگىلدى. قۇتقارۋ جۇمىستارىنا 1,7 مىڭ ادام، 517 تەحنيكا، 30 سۋدا ءجۇزۋ قۇرالى جانە 2 ۇشاق جۇمىلدىرىلعان.
جۇمىس ساپارى بارىسىندا قانات بوزىمبايەۆ اۋدان جانە قالا اكىمدەرىمەن، وبلىستىق قىزمەتتەر مەن باسقارما باسشىلارىمەن ءبىرقاتار كەزدەسۋ وتكىزدى. ۆيتسە-پرەمەر اپاتتىق-قۇتقارۋ جۇمىستارىن ءارى قاراي جۇرگىزۋ، قۇتقارىلعان ادامداردى بارلىق قاجەتتى زاتتارمەن قامتاماسىز ەتۋ، شىعىندى باعالاۋ، بۇلىنگەن ۇيلەر مەن ينفراقۇرىلىمدى قالپىنا كەلتىرۋ بويىنشا ءبىرقاتار تاپسىرما بەردى.
«ادامداردىڭ قاۋىپسىزدىگىن قامتاماسىز ەتۋ جانە زارداپ شەككەندەرگە كومەك كورسەتۋ ءۇشىن بارلىق جاعدايدى جاساۋ كەرەك. سۋ تاسقىنىنىڭ زارداپتارىن جويۋ جۇمىستارى تاۋلىك بويى جۇرگىزىلۋى ءتيىس. وڭىرلەردى قالپىنا كەلتىرۋ ءۇشىن بارلىق قاجەتتى رەسۋرستار بولىنەدى»، - دەدى شتاب باسشىسىنىڭ ورىنباسارى.
