قانات بوزىمبايەۆ اتىراۋ وبلىسىنداعى سۋ تاسقىنىنا قارسى كۇرەس شارالارىن تەكسەردى
اتىراۋ. KAZINFORM - ۆيتسە- پرەمەر قانات بوزىمبايەۆ اتىراۋ وبلىسى يندەر اۋدانىنىڭ يندەربور، جاسۋات، قۇرىلىس اۋىلدارىندا، سونداي-اق ماحامبەت اۋدانىنا قاراستى ماحامبەت، سارايشىق، تالدىكول اۋىلدارىندا جاعالاۋدى نىعايتۋ جۇمىستارىن تەكسەردى. بۇل تۋرالى ۇكىمەتتىڭ باسپا ءسوز قىزمەتى حابارلادى.
وڭىردە سۋ تاسقىنى قاۋپى ساقتالىپ تۇر. جايىق-يندەربور جانە جايىق- ماحامبەت گيدروبەكەتىندە سۋ دەڭگەيى قاۋىپتى بەلگىدەن اسىپ ءتۇستى. جايىق وزەنىندە سۋدىڭ ودان ءارى كوتەرىلۋى كۇتىلۋدە. بارلىق قاۋىپتى ۋچاسكەلەردە تاۋلىك بويى كەزەكشىلىك ۇيىمداستىرىلعان. تابيعي اپاتپەن كۇرەسكە جەرگىلىكتى تۇرعىندار، ەرىكتىلەر جانە ءارتۇرلى كاسىپورىنداردىڭ قىزمەتكەرلەرى بەلسەندى تۇردە اتسالىسىپ جاتىر.
يندەر اۋدانىندا جەر بوگەتتەرىنىڭ جالپى ۇزىندىعى 30 شاقىرىمدى قۇرايدى. قورعانىس بوگەتى جاسۋات، يندەربور، قۇرىلىس، كوكتوعاي، ورلىك، ەسبول جانە ەلتاي ەلدى مەكەندەرىندە سالىنعان. اتالعان جۇمىستارعا 40-تان استام ارنايى تەحنيكا، 300-گە جۋىق اسكەري قىزمەتشى جانە 100-گە جۋىق ت ج قىزمەتكەرى، ونىڭ ىشىندە قىزىلوردا وبلىسى ت ج د قىزمەتكەرلەرى جۇمىلدىرىلدى.
ماحامبەت اۋدانىندا جايىق وزەنىنىڭ بويىندا 17 ەلدى مەكەن ورنالاسقان. ولاردى قورعاۋ ءۇشىن 80 ك م جاعالاۋدى نىعايتاتىن بوگەتتەر سالىندى. اۋداندا بوگەتتەردىڭ جالپى ۇزىندىعى 105,8 ك م قۇرايدى. سۋ تاسقىنىنا قارسى ءىس- شارالار جالعاسۋدا، ولارعا 130 ارنايى تەحنيكا، 650 اسكەري قىزمەتشى، 200-دەن استام ت ج قىزمەتكەرى، 300-گە جۋىق ەرىكتى مەن جەرگىلىكتى تۇرعىندار تارتىلدى.
ۆيتسە-پرەمەر قانات بوزىمبايەۆ ماحامبەت اۋدانىنىڭ اكىمىنە ەجەلگى سارايشىق قالاشىعى ماڭىنداعى جايىق وزەنىنىڭ بويىنداعى بوگەتتى تاعى دا قوسىمشا كوتەرۋدى تاپسىردى.
«ول ءۇشىن مۇندا قورعانىس مينيسترلىگىنىڭ جەكە قۇرامىنىڭ جۇزدەگەن قىزمەتكەرى مەن ونداعان تەحنيكا تارتىلادى. ءبىزدىڭ تاريحي مۇرامىزدى قورعاۋعا جانە ساقتاۋعا جاۋاپكەرشىلىكپەن قاراۋ قاجەت»، - دەپ تاپسىردى قانات بوزىمبايەۆ.
اۆتور
ەلميرا ورالبايەۆا
