قانات بوزىمبايەۆ اتىراۋ وبلىسىندا توتەنشە جاعداي جاريالاۋدىڭ سەبەبىن ءتۇسىندىردى

استانا. KAZINFORM - اتىراۋ وبلىسىنا رەسەي اۋماعىنان 15-20 كۇن ىشىندە ءىرى سۋ كەلەدى دەپ كۇتىلىپ وتىر. بۇل تۋرالى ق ر پرەمەر- ءمينيسترىنىڭ ورىنباسارى قانات بوزىمبايەۆ مالىمدەدى.

«قۇلسارى قالاسىندا (اتىراۋ وبلىسى) 2810 ءۇي سۋ استىندا قالدى. توتەنشە جاعداي ايماقتارىنان 29 مىڭ ادام، ونىڭ ىشىندە 7 مىڭنان استام بالا ەۆاكۋاتسيالاندى. كەشە جانە بۇگىن ءبىز سۋ باسقان ەلدى مەكەندەرگە باردىق. جەم وزەنىنىڭ اعىسىمەن اقتوبە وبلىسىنىڭ شەكاراسىنا دەيىن بۇگىندە سۋ دەڭگەيىنىڭ تومەندەۋى بايقالادى. سوڭعى تاۋلىكتە سۋدىڭ كوتەرىلۋى 6 سانتيمەترگە سەيىلدى. ءبىراق، ءبىز قۇلسارى جاققا 3-4 كۇن ىشىندە تاعى سۋ اعىنىن بولجاپ وتىرمىز»، - دەدى قانات بوزىمبايەۆ و ك ق الاڭىندا.

ۇكىمەت باسشىسى ورىنباسارىنىڭ ايتۋىنشا، اتىراۋ وبلىسىنداعى جايىق وزەنى دەڭگەيىنىڭ بولجامدى كوتەرىلۋىنە بايلانىستى اقتوبە وبلىسىنىڭ ەلەك وزەنىنەن اعىپ كەتۋىنە جانە رەسەي فەدەراتسياسىنىڭ يريكلين سۋ قويماسىنىڭ جوعارىلاۋىنا بايلانىستى ايماقتا جايىق وزەنى ارقىلى سۋ باسۋ قاۋپى ءالى دە ساقتالادى.

«بۇل - ۇلكەن تاۋەكەل. مەن وبلىس اكىمدىگىنە مۇددەلى مەملەكەتتىك ۆەدومستۆولارمەن بىرلەسىپ، ەكى كۇننىڭ ىشىندە جايىق وزەنى بويىنشا سۋ تاسقىنى بولجامىن اياقتاۋ تۋرالى تاپسىرما بەردىم. جايىق وزەنى بويى اتىراۋ قالاسىنىڭ شەكاراسىندا شامامەن 15-20 كۇندە سۋ تاسۋدىڭ ايتارلىقتاي ءوسۋىن بولجاپ وتىرمىز. ويتكەنى رەسەي فەدەراتسياسىمەن شەكارادان شامامەن 20-25 كۇندە سۋ اعىنى كۇتىلەدى. ءبىراق، جاعداي سۋدىڭ كولەمى مەن اۋارايىنا بايلانىستى»، - دەپ ءتۇسىندىردى ق. بوزىمبايەۆ.

سونداي-اق ءوڭىر اكىمدىگىنىڭ اتىراۋ قالاسى مەن جاقىن ماڭداعى اۋداندار اينالاسىندا قورعانىس بوگەتتەرى مەن قۇرىلىستارىن، اينالما جانە قۇيما ارنالاردى سالۋ بويىنشا ناقتى جوسپار ازىرلەيتىنى اتاپ ءوتىلدى.

«وسىعان بايلانىستى اتىراۋ وبلىسىنىڭ اكىمى بۇگىن توتەنگە جاعداي رەجيمى جاريالادى. وسى مۇمكىندىكتى پايدالانا وتىرىپ، اتىراۋ قالاسىنىڭ تۇرعىندارىنا جۇگىنگىم كەلەدى، دۇربەلەڭگە ەشقانداي سەبەپ جوق. حالىقتىڭ ءبىر بولىگى كەتۋگە بيلەت ساتىپ الىپ، كولىكتەرىن جانارمايمەن قامتىپ جاتقانىن ەستىپ وتىرمىن»، - دەيدى ۆيتسە- پرەمەر.

ۆيتسە- پرەمەر الداعى 10-15 كۇندە جايىق وزەنىنىڭ تاسۋىنا الاڭداۋعا ەشقانداي سەبەپ جوق دەپ سەندىردى.

«اتىراۋ وبلىسىندا توتەنشە جاعداي رەجيمى 15-20 كۇن شاماسىندا كۇتىلەتىن ءىرى سۋ تاسقىنىنىڭ الدىن الۋ جانە ناقتى دايىندالۋ ءۇشىن جاريالاندى. اكىمدىك جوسپار ازىرلەپ، ەرتەڭ ونى ۇسىنۋى ءتيىس، ءبىز ونى رەسپۋبليكالىق شتابتا قارايتىن بولامىز»، - دەپ تولىقتىردى قانات بوزىمبايەۆ.

بۇعان دەيىن ۆيتسە-پرەمەر سۋ باسقان وڭىرلەردەگى سوڭعى جاعدايدى ايتا كەلە، 6 وڭىردە 3698 جەكە ءۇي سۋ استىندا قالىپ، اۆتوجولداردىڭ 155 ۋچاسكەسىن سۋ شايعانىن ءمالىم ەتتى.

اۆتور

داۋلەت ىزتىلەۋ