كامچىبەك تاشيەۆ بارلىق قىزمەتىنەن بوساتىلدى

استانا. KAZINFORM - كامچىبەك تاشيەۆ قىرعىزستان مينيسترلەر كابينەتى ءتوراعاسىنىڭ ورىنباسارى ءارى مەملەكەتتىك ۇلتتىق قاۋىپسىزدىك كوميتەتىنىڭ ءتوراعاسى قىزمەتىنەن بوساتىلدى.

بۇل تۋرالى قىرعىزستان رەسپۋبليكاسى پرەزيدەنتىنىڭ اكىمشىلىگى حابارلادى.

- مەن بۇل شەشىمدى ەڭ الدىمەن مەملەكەتىمىزدىڭ مۇددەسى ءۇشىن، قوعامداعى، سونىڭ ىشىندە مەملەكەتتىك ورگاندار اراسىنداعى ءبولىنۋدىڭ الدىن الۋ جانە كەرىسىنشە - بىرلىكتى نىعايتۋ ماقساتىندا قابىلدادىم، - دەپ مالىمدەدى پرەزيدەنت سادىر جاپاروۆ كامچىبەك تاشيەۆتىڭ وتستاۆكاعا كەتۋىنە قاتىستى تۇسىنىك بەرىپ.

جۋمگالبەك شابدانبەكوۆ ۇ ق م ك ءتوراعاسىنىڭ مىندەتىن اتقارۋشى بولىپ تاعايىندالدى. ونىڭ كانديداتۋراسى قىرعىزستان رەسپۋبليكاسى جوگوركۋ كەنەشىنە ۇ ق م ك ءتوراعاسى قىزمەتىنە تاعايىنداۋعا بەكىتۋ ءۇشىن ۇسىنىلىپ وتىر.

كابار اگەنتتىگىنىڭ حابارلاۋىنشا، ۇ ق م ك باسشىسىنىڭ اۋىسۋىنان كەيىن ءتوراعانىڭ ءۇش ورىنباسارى قىزمەتىنەن بوساتىلدى.

قىرعىز رەسپۋبليكاسى پرەزيدەنتى اكىمشىلىگىنىڭ مالىمەتىنشە، ءتيىستى جارلىقپەن كەلەسى تۇلعالار قىزمەتىنەن بوساتىلدى:

* قۋرۆانبەك اۆازوۆ – ۇ ق م ك ءتوراعاسىنىڭ ءبىرىنشى ورىنباسارى؛

* دانيەل رىساليەۆ – ۇ ق م ك ءتوراعاسىنىڭ ورىنباسارى - كيبەرقاۋىپسىزدىكتى قامتاماسىز ەتۋ جونىندەگى ۇيلەستىرۋ ورتالىعىنىڭ ديرەكتورى؛

* ەليزار سمانوۆ – ۇ ق م ك ءتوراعاسىنىڭ ورىنباسارى - لاڭكەستىككە قارسى ورتالىقتىڭ ديرەكتورى.

بۇعان دەيىن قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ ءتوراعاسى كامچىبەك تاشيەۆ سىبايلاس جەمقورلىقپەن كۇرەستىڭ جەكە ومىرىنە دە اسەر ەتكەنىن ايتقان بولاتىن.