قالدىقتى قايتا وڭدەۋ: بەكتەنوۆ ۆەدومستۆولارعا ناقتى 5 تاپسىرما جۇكتەدى
استانا. KAZINFORM - ق ر پرەمەر-ءمينيسترى ولجاس بەكتەنوۆ ەلىمىزدە تۇرمىستىق جانە وندىرىستىك قالدىقتاردى قايتا وڭدەۋ جۇمىستارىن ءتيىمدى ۇيلەستىرۋ ماقساتىندا مۇددەلى ۆەدومستۆولارعا 5 ناقتى تاپسىرما بەردى.
- ءبىرىنشى، ەكولوگيا مينيسترلىگىنە مۇددەلى مەملەكەتتىك ورگاندارمەن بىرلەسىپ 1-قىركۇيەككە دەيىن قالدىقتاردىڭ بارلىق ءتۇرىن باسقارۋ تۇجىرىمداماسىن ازىرلەۋدى تاپسىرامىن. ول قالدىقتاردى باسقارۋ پروتسەستەرىن ورتالىقتاندىرۋعا، بارلىق مۇددەلى تاراپتاردى تارتۋعا، سيفرلىق ەكونوميكا مودەلىن قۇرۋعا باعىتتالۋعا ءتيىس.
ەكىنشى، ەكولوگيا مينيسترلىگى ونەركاسىپ قورىمەن جانە اكىمدىكتەرمەن بىرگە قالدىقتاردى باسقارۋ سالاسىنداعى جوبالاردى ىسكە اسىرۋ جۇمىسىن كۇشەيتسىن. 3 اي مەرزىمدە بەكىتىلگەن ءتىزىمنىڭ ىشىنەن قارجى بولىنگەن جوبالار سانىن كەمىندە 5 ەسەگە ۇلعايتۋ كەرەك. ءوڭىر اكىمدىكتەرى قالدىقتاردى سۇرىپتاۋ جانە قايتا وڭدەۋ جونىندەگى ءاربىر جوباعا ولار ىسكە قوسىلعانشا تولىق قولداۋ كورسەتسىن.
ءۇشىنشى، ەكولوگيا، ەنەرگەتيكا مينيسترلىكتەرى اكىمدىكتەرمەن بىرگە ەكى اپتا مەرزىمدە قالدىقتاردى ەنەرگەتيكالىق كادەگە جاراتۋ سالاسىنداعى جوبالار تىزبەسىن انىقتاسىن. الەۋەتتى ينۆەستورلاردى تارتۋ ءۇشىن ءساۋىر ايىندا اۋكتسيون ۇيىمداستىرۋ كەرەك.
ءتورتىنشى، ونەركاسىپ جانە ەنەرگەتيكا مينيسترلىكتەرىنە وندىرىستىك قالدىقتاردى قايتا وڭدەۋ بويىنشا ونەركاسىپتىك جانە ەنەرگەتيكالىق كاسىپورىنداردى قولداۋ مەن ىنتالاندىرۋدىڭ ناقتى شارالارىن ازىرلەۋدى تاپسىرامىن. بۇل كومىر حيمياسى، قۇرىلىس ماتەريالدارىن جاساۋ، جەردە سيرەك كەزدەسەتىن ماتەريالداردى الۋ سالالارىندا جاڭا وندىرىستەر قۇرۋعا مۇمكىندىك بەرەدى.
بەسىنشى، ەكولوگيا، ونەركاسىپ، ەنەرگەتيكا جانە تسيفرلاندىرۋ مينيسترلىكتەرى كوممۋنالدىق جانە وندىرىستىك قالدىقتاردى باسقارۋ، مونيتورينگ جاساۋ جانە باقىلاۋ سالاسىندا سيفرلىق شەشىمدەر ازىرلەۋى قاجەت، - دەدى ول ۇكىمەت وتىرىسىندا.
ولجاس بەكتەنوۆ بۇل تاپسىرمالاردىڭ ورىندالۋ بارىسىن باقىلاۋدى ءبىرىنشى ورىنباسارى رومان سكليارعا تاپسىردى.
