قالاداعى فونتانداردا نەگە شومىلۋعا بولمايدى

استانا. KAZINFORM - ىستىق كۇندەرى بالالاردىڭ قالالىق فونتانداردا سۋ شاشىپ ويناپ جۇرگەنىن جيى كورۋگە بولادى. الايدا ولار بۇل ارەكەتتىڭ دەنساۋلىققا ەلەۋلى زيان تيگىزۋى مۇمكىن ەكەنىن تۇسىنە بەرمەيدى. فونتانداردا شومىلۋعا قاتاڭ تىيىم سالىنعان، دەپ جازدى استانا قالاسى اكىمدىگىنىڭ رەسمي سايتى.

استانالىق قۇتقارۋشىلار فونتانداردا شومىلۋدىڭ قانشالىقتى قاۋىپتى ەكەنىن ەسكە سالدى. مەحانيكالىق جاراقات الۋ قاۋپى جوعارى: تەگىس ەمەس بەتتەر، سۋ اعىندارى، دەكوراتيۆتى ەلەمەنتتەر، سونداي-اق ولاردىڭ ىشىنە ورناتىلعان قۇبىرلار مەن سورعىلار قۇلاۋ مەن جاراقاتقا اكەلۋى مۇمكىن. سونىمەن قاتار كوپتەگەن فونتان جارىقتاندىرۋ جانە باسقا دا ەلەكتر جابدىقتارىمەن جابدىقتالعان، ال بۇل توق سوعۋ قاۋپىن تۋىنداتادى.

سول سەبەپتى بارلىق فونتاندا شومىلۋعا تىيىم سالىنعانىن بىلدىرەتىن ارنايى بەلگىلەر ورناتىلعان. فونتاندار - قالانى كورىكتەندىرۋ ەلەمەنتتەرى. ولار اۋانى ىلعالداندىرۋعا جانە ەستەتيكالىق ماقساتتارعا ارنالعان.

بۇل قۇرىلعىلاردا سۋدى سۇزگىدەن وتكىزۋ جانە تازالاۋ جۇيەلەرى قاراستىرىلماعان.

- فونتاندار قوعامدىق ورىنداردا ورنالاسقاندىقتان، ولاردىڭ سۋى تەز لاستانادى: ىشىنە قوقىس، جاپىراق، شاڭ- توزاڭ، جاندىكتەر تۇسەدى. وندا قاڭعىباس جانۋارلار مەن قۇستار دا شومىلۋى مۇمكىن، ال ولار ءتۇرلى ينفەكتسيالاردىڭ تاسىمالداۋشىسى. سۋ - ۆيرۋستار مەن باكتەريالار ءۇشىن قولايلى ورتا. ال اۋا تەمپەراتۋراسىنىڭ جوعارى بولۋى ميكرواعزالاردىڭ تەز كوبەيۋىنە ىقپال ەتەدى. سوندىقتان فونتاندا شومىلۋعا عانا ەمەس، ءتىپتى قولدى نەمەسە جەمىس-جيدەكتى جۋۋعا دا بولمايدى. مۇنداي ارەكەتتەردى تەك اۋىز سۋعا ارنالعان ارنايى ورىنداردا عانا جاساۋ كەرەك، - دەپ ەسكەرتتى استانا قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى مۇحامعالي ارىسپايەۆ.

زەرتحانالىق تالداۋلار كورسەتكەندەي، مۇنداي سۋلاردا ەنتەرو جانە روتاۆيرۋستار، ىشەك تاياقشالارى، سالمونەللالار مەن شيگەللالار (ديزەنتەريا قوزدىرعىشتارى) سياقتى جەدەل ىشەك ينفەكتسيالارىن قوزدىراتىن پاتوگەندى ميكرواعزالار بولۋى مۇمكىن. اسىرەسە باۋىردى زاقىمدايتىن جانە ونىڭ قىزمەتىنە اۋىر نۇقسان كەلتىرەتىن ا گەپاتيتى ۆيرۋسىنان ساق بولۋ كەرەك.