قالا عانا ەمەس، ءار اۋىل مەكتەبىنە كامەرا قويىلىپ، دابىل باتىرماسى ورناتىلادى
استانا. KAZINFORM - تامارا دۇيسەنوۆا ءبىلىم مەكەمەلەرىندەگى بەينەباقىلاۋ كامەرالارى، دابىل باتىرمالارى مەن تۋرنيكەتتەر ورناتۋ جونىندەگى جۇمىستاردى جەدەلدەتۋدى تاپسىردى.
ءبىلىم نىساندارىنىڭ قاۋىپسىزدىگى ماسەلەلەرى ق ر پرەمەر-ءمينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە تالقىلاندى.
جيىنعا ورتالىق مەملەكەتتىك ورگانداردىڭ وكىلدەرى مەن وبلىس اكىمدەرىنىڭ ورىنباسارلارى قاتىستى.
بۇگىندە ءبىلىم نىساندارى ماڭىنداعى جول قاۋىپسىزدىگى ينفراقۇرىلىمىن جاقسارتۋعا بايلانىستى وڭىرلەردە ءتيىستى جول كارتاسى بەكىتىلگەن.
ونىڭ اياسىندا مەكتەپتەر، بالاباقشالار، قوسىمشا ءبىلىم بەرۋ ۇيىمدارى ماڭىندا باعدارشامدار، جول بەلگىلەرىن ورناتۋ، جاياۋ جۇرگىنشىلەر تروتۋارلارىن جاساۋ سەكىلدى ءبىرقاتار شارالار قامتىلعان.
ىشكى ىستەر ءمينيسترىنىڭ ورىنباسارى يگور لەپەحانىڭ كەلتىرگەن مالىمەتىنشە، 13 مىڭنان اسا جالپى ءبىلىم مەكەمەسىنىڭ (%65) ماڭىندا بارلىق ءتيىستى تالاپتار ساقتالعان.
كورسەتكىشتى جاقسارتۋ ءۇشىن بيىل جانە كەلەسى جىلى 28 مىڭنان استام شارانى قولعا الۋ جوسپارلانىپ وتىر.
بيىل ازىرگە 570 نىساننىڭ اينالاسىندا ءتيىستى جۇمىستار اياقتالدى.
«باتىس قازاقستان، قوستاناي، شىعىس قازاقستان جانە اباي وبلىستارىندا جول قاۋىپسىزدىگى ينفراقۇرىلىمىن جاقسارتۋعا باعىتتالعان شارالارمەن قامتىلعان نىساندار سانى 10 عا دا جەتپەيدى»، - دەدى يگور لەپەحا.
قابىلدانىپ جاتقان شارالار تۋرالى وبلىس اكىمدەرىنىڭ ورىنباسارلارى دا باياندادى.
«بەكىتىلگەن جول كارتاسىندا كورسەتىلگەن مەرزىمنىڭ ساقتالۋىنا باسا ءمان بەرگەن ءجون. جاز مەزگىلى تەز وتە شىعادى. سوندىقتان ءتيىستى جۇمىستاردى اتقارۋعا جايلى مەرزىمدى بارىنشا ءتيىمدى قولدانۋ كەرەك»، - دەپ اتاپ ءوتتى تامارا دۇيسەنوۆا.
كەڭەستە سونداي-اق ءبىلىم نىساندارىنىڭ قاۋىپسىزدىك تالاپتارىنا سايكەستىگىنە قاتىستى دا ءسوز قوزعالدى. وقۋ-اعارتۋ مينيسترلىگى بيىل ءتيىستى ەرەجەگە وزگەرىستەر ەنگىزگەن بولاتىن.
وعان سايكەس، كونتينگەنتى 100 ادامنان اساتىن بارلىق ءبىلىم مەكەمەسىندە بەينەباقىلاۋ كامەرالارى جەدەل باسقارۋ ورتالىقتارى نەمەسە اۋداندىق پوليتسيا بولىمدەرىنە قوسىلىپ، دابىل باتىرمالارى ورناتىلۋى كەرەك.
بۇعان دەيىن تالاپ تەك قالالار مەن اۋدان ورتالىقتارىنا تيەسىلى بولاتىن.
ال 700 دەن اسا ادام قابىلدايتىن مەكەمەلەردە تۋرنيكەتتەر ورناتىلىپ، كۇزەت قىزمەتتەرىمەن كەلىسىمى بولۋى شارت.
وسىعان سايكەس، ءار ءوڭىر قاۋىپسىزدىك جۇيەسىمەن قامتۋ تۋرالى جۇمىس جوسپارى بەكىتۋدە. جوسپار ازىرگە اقمولا، قاراعاندى، قىزىلوردا، اباي، ماڭعىستاۋ، جامبىل، پاۆلودار، شىعىس قازاقستان جانە سولتۇستىك قازاقستان وبلىستارىندا عانا قابىلدانعان.
جيىن بارىسىندا جاقىندا پاۆلودار وبلىسىنداعى مەكتەپتە بولعان جاعداي دا ءسوز بولدى.
وقۋ-اعارتۋ مينيسترلىگىنىڭ ينفراقۇرىلىمدى دامىتۋ دەپارتامەنتى ديرەكتورىنىڭ مىندەتىن اتقارۋشى مارلەن قاسەنوۆتىڭ سوزىنشە، زاڭ جۇزىندە ءبىلىم مەكەمەلەرىنە كىرگىزۋگە تىيىم سالىنعان زاتتاردىڭ ءتىزىمى بەكىتىلگەن، وڭىرلەر اتالعان تىزىمگە سايكەس تالاپتاردىڭ ساقتالۋىن قامتاماسىز ەتۋى ءتيىس.
«وقۋ-اعارتۋ، ىشكى ىستەر مينيسترلىكتەرى اكىمدىكتەرمەن بىرگە بەينەباقىلاۋ كامەرالارىن، دابىل باتىرمالارىن، تۋرنيكەتتەردى قامتاماسىز ەتۋ جۇمىسىن كۇشەيتۋى قاجەت. بالالارعا قاۋىپسىز ورتا قالىپتاستىرۋدا بارلىق مۇمكىندىكتى پايدالانۋىمىز كەرەك»، - دەپ اتاپ ءوتتى تامارا دۇيسەنوۆا.
ۆيتسە-پرەمەر سونداي-اق، مۇددەلى مەملەكەتتىك ورگاندارعا ءبىلىم بەرۋ مەكەمەلەرىندەگى قاۋىپسىزدىكتى قامتاماسىز ەتۋ ءۇشىن قوسىمشا شارالار قابىلداۋ جاعىن قاراستىرۋدى تاپسىردى.
