«قاشاعان» كەن ورنىنداعى جوندەۋ جۇمىسى 7 -قازاندا باستالادى
اتىراۋ. KAZINFORM - كاسپي تەڭىزىنىڭ سولتۇستىك بولىگىندە ورنالاسقان «قاشاعان» كەن ورنىندا جوندەۋ جۇمىسىن جۇرگىزۋ جوسپارلانىپ وتىر. جوندەۋ جۇمىسى 7 -قازاندا باستالىپ، 30 كۇنگە سوزىلادى.
«قاشاعان» كەن ورنىندا جوندەۋ جۇمىسى باستالاتىنى ءبىر ايدان بەرى ايتىلىپ كەلەدى. قىركۇيەكتىڭ باسىندا ەنەرگەتيكا مينيسترلىگى قاشاعان مۇناي كەنىشى اكسيونەرلەرىنەن جوندەۋ جۇمىستارىن كەيىنگە قالدىرۋدى سۇرادى دەگەن اقپاراتتىڭ شىندىققا جاناسپايتىنىن حابارلادى.
«جوندەۋ جۇمىسىن كەيىنگە قالدىرۋ ىشكى تالقىلاۋ كەزىندە قاراستىرىلعان نۇسقالاردىڭ ءبىرى عانا بولدى. ءبىراق ول قابىلدانبادى. مينيسترلىك قاشاعان كەن ورنىنداعى جوندەۋ جۇمىستارى 3- قازاننان باستاپ كەستەگە سايكەس جۇرگىزىلەتىنىن راستايدى. بۇل مينيسترلىكتىڭ اناليتيكالىق اگەنتتىكتەرمەن تەلەفون ارقىلى سويلەسۋىندە، سونداي-اق وتكەن اپتادا وپەك باس حاتشىسىنىڭ استاناعا ساپارى كەزىندە ايتىلعان. قازاقستان وپەك+ شارالارىنا تولىعىمەن بەيىلدى بولىپ قالا بەرەدى. وپەك حاتشىلىعىنا ۇسىنىلعان ءوندىرىستى ەرىكتى تۇردە قىسقارتۋ جانە وتەماقى جوسپارىن تولىعىمەن ورىنداۋ ءۇشىن بارلىق شارالار قابىلدانادى»، - دەپ حابارلاعان ەدى مينيسترلىكتىڭ باسپا ءسوز قىزمەتى.
«قاشاعان» - كاسپي تەڭىزىنىڭ قازاقستاندىق سەكتورىنداعى ءىرى مۇناي جانە گاز كەن ورنى. ول اتىراۋ قالاسىنان وڭتۇستىك- باتىسقا قاراي 80 شاقىرىم جەردە ورنالاسقان. قاشاعان 75x45 شاقىرىم اۋماقتى الىپ جاتىر. كەن ورنىنىڭ كوللەكتورى كاسپيدىڭ سولتۇستىك بولىگىندە تەڭىز تۇبىنەن 4200 مەتردەي تەرەڭدىكتە جاتىر.
ەسكە سالا كەتەلىك، بۇعان دەيىن مينيسترلىك قاشاعاندا جوندەۋ جۇمىسىن كەيىنگە قالدىرۋ جونىندە ناقتى شەشىم قابىلدانباعانىن مالىمدەگەن بولاتىن.
قازاقستان وپەك+ الدىنداعى مىندەتتەمەسىن ورىندادى.
اۆتور
جولداسبەك شوپەعۇل
