ق ر پرەزيدەنتى سيفرلىق دامۋ، يننوۆاتسيا جانە اەروعارىش ونەركاسىبى ءمينيسترى جاسلان ماديەۆتى قابىلدادى

استانا. KAZINFORM - مەملەكەت باسشىسى سيفرلىق دامۋ، يننوۆاتسيا جانە اەروعارىش ونەركاسىبى ءمينيسترى جاسلان ماديەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

پرەزيدەنتكە ۆەدومستۆونىڭ قازىرگى قىزمەتى مەن جۇمىس جوسپارى جونىندە باياندالدى. جاسلان ماديەۆتىڭ ايتۋىنشا، مەملەكەتتىك باسقارۋدى جانە باسقا دا سالالاردى سيفرلىق ترانسفورماتسيالاۋ ءۇشىن ينستيتۋتسيونالدىق بازا قالىپتاسقان. رەينجينيرينگ مىندەتتەمەسى زاڭ جۇزىندە بەكىتىلىپ، 600 دەن استام بيزنەس- پروتسەسس قايتا قارالعان. سونداي- اق GovTech پلاتفورمالىق ءتاسىلى ارقىلى سيفرلىق ترانسفورماتسيالاۋ ۇدەرىسى باستالعان.

قاسىم-جومارت توقايەۆقا جاساندى ينتەللەكتىنى ەنگىزۋ، سونداي- اق AI-driven government ەكوجۇيەسىن قالىپتاستىرۋ جولدارى جونىندە مالىمەت بەرىلدى.

سونىمەن قاتار مەملەكەت باسشىسىنا وتاندىق IT كومپانيالاردىڭ ەكسپورت نارىقتارىنا شىعۋ پەرسپەكتيۆاسى تۋرالى باياندالدى.

كەزدەسۋ سوڭىندا پرەزيدەنت مەملەكەتتىك باسقارۋ ءىسىن ساپالى تۇردە سيفرلاندىرۋ، حالىقارالىق IT الپاۋىتتارمەن ىنتىماقتاستىقتى جانداندىرۋ جانە ەكونوميكانىڭ ءتۇرلى سەكتورىندا جاساندى ينتەللەكتىنى ودان ءارى دامىتۋ جونىندە ءبىرقاتار تاپسىرما بەردى.