ق ر مەملەكەتتىك كۇزەت قىزمەتىنىڭ پرەزيدەنتتىك وركەسترى وتان قورعاۋشىلار كۇنىنە ارنالعان بەينەباياندى ۇسىندى

استانا. KAZINFORM – ق ر مەملەكەتتىك كۇزەت قىزمەتىنىڭ پرەزيدەنتتىك وركەسترىنە قاراستى «ABYROY» توبى «رۋح» بەينەبايانىنىڭ تۇساۋكەسەرىن وتكىزدى.

وتان قورعاۋشىلار كۇنى قارساڭىندا بەلگىلى وتاندىق رەجيسسەر ەلامان بۋرالكيەۆتىڭ ءتۇسىرۋ توبىنىڭ پروديۋسەرلىگىمەن ق ر م ق ك پرەزيدەنتتىك وركەسترىنىڭ «ABYROY» توبى «رۋح» بەينەبايانىنىڭ پرەمەراسى ءوتتى. بەينەبايان ق ر مەملەكەتتىك كۇزەت قىزمەتىنىڭ Youtube جەلىسىندەگى (@sgork_official) پاراقشاسىندا جاريالاندى.

ق ر مەملەكەتتىك كۇزەت قىزمەتى حابارلاعانداي، «رۋح» كومپوزيتسياسى از ۋاقىتتىڭ ىشىندە الەۋمەتتىك جەلى قولدانۋشىلارى اراسىندا تانىمال بولا باستاعان. تۋىندىنىڭ مۋزىكاسىن جانبولات ءادىلوۆ، ءسوزىن رۇستەم ارسلانوۆ جازعان. كومپوزيتسيانى وڭدەۋگە يمانبەك زەيكەنوۆ تە اتسالىسقانىن اتاپ وتكەن ءجون.

ايتا كەتەيىك، بەينەباياندا ق ر مەملەكەتتىك كۇزەت قىزمەتىنىڭ بولىمشەلەرىنىڭ، ق ر ۇلتتىق قاۋىپسىزدىك كوميتەتى «ا» قىزمەتىنىڭ، ق ر ۇلتتىق ۇلانىنىڭ، ق ر قارۋلى كۇشتەرى ارنايى وپەراتسيالىق اسكەرلەرىنىڭ، ق ر توتەنشە جاعدايلار مينيسترلىگىنىڭ قىزمەتى سيپاتتالادى.

اۆتور

ورالحان قوجانوۆ