نەگىزگى كاپيتالعا سالىنعان ينۆەستيتسيا كولەمى 14,3 پايىزعا ارتتى

استانا. قازاقپارات - 2025-جىلعى قاڭتار-تامىز ايلارىندا نەگىزگى كاپيتالعا سالىنعان ينۆەستيتسيالار كولەمى 11 543,1 ميلليارد تەڭگە بولىپ، 2024-جىلدىڭ سايكەس كەزەڭىمەن سالىستىرعاندا 14,3 پايىز وسكەن. بۇل تۋرالى ۇلتتىق ستاتيستيكا بيۋروسىنىڭ باسپا ءسوز قىزمەتى حابارلادى.

ينۆەستيتسيانىڭ باستى كوزى كاسىپورىنداردىڭ ءوز قاراجاتى - 7 320,3 ميلليارد تەڭگە نەمەسە جالپى كولەمنىڭ 63,4 پايىزى. بيۋجەت قاراجاتى 23 پايىزدى قۇراپ، وتكەن جىلمەن سالىستىرعاندا 42,6 پايىزعا ارتقان. بانكتەردىڭ قارجىلاندىرۋ ۇلەسى - 3,5 پايىز.

ينۆەستيتسيا ءوسىمىنىڭ ەڭ جوعارعى كورسەتكىشى اقمولا وبلىسىندا (49,3 پايىز)، اقتوبە وبلىسىندا (38,7 پايىز)، استانا قالاسىندا (35,8 پايىز)، جامبىل وبلىسىندا (32,4 پايىز) جانە الماتى قالاسىندا (26,1 پايىز) بايقالدى.

قاراجاتتىڭ باسىم بولىگى عيماراتتار مەن قۇرىلىستاردىڭ سالىنۋىنا جانە كۇردەلى جوندەۋىنە باعىتتالدى - 68,3 پايىز. ماشينالار، جابدىقتار جانە كولىك قۇرالدارىن الۋعا جالپى شىعىننىڭ 27,2 پايىز جۇمسالعان.

سالالار بويىنشا نەگىزگى كاپيتالعا سالىنعان ينۆەستيتسيانىڭ ەڭ كوپ ۇلەسى ونەركاسىپكە (37,3 پايىز) تيەسىلى (ونىڭ ىشىندە تاۋ-كەن ءوندىرۋ ونەركاسىبى مەن كارەرلەردى يگەرۋ - 15,7 پايىز، وڭدەۋ ونەركاسىبى - 11 پايىز)، ودان بولەك جىلجىمايتىن مۇلىك وپەراتسيالارى (19,4 پايىز)، كولىك جانە قويما (18 پايىز)، ءبىلىم بەرۋ سالاسى (7,3 پايىز) دا ايتارلىقتاي ۇلەسكە يە.

ايتا كەتەلىك 8 ايدا نەگىزگى كاپيتالعا 11,5 تريلليون تەڭگە ينۆەستيتسيا تارتىلعان ەدى.