نيگەريانىڭ سولتۇستىگىندە قارۋلى توپتىڭ شابۋىلىنان 52 ادام مەرت بولدى

ابۋدجا. KAZINFORM - نيگەريانىڭ سولتۇستىگىندەگى پلاتو شتاتىندا بىرنەشە كۇن بويى سودىرلاردىڭ ءبىرقاتار شابۋىلدارى سالدارىنان 52 ادام قازا تاۋىپ، 2000 عا جۋىق ادام ۇيلەرىن تاستاپ كەتۋگە ءماجبۇر بولدى. بۇل تۋرالى نيگەريانىڭ توتەنشە جاعدايلاردى باسقارۋ ۇلتتىق اگەنتتىگى حابارلاعان.

- سەبەبى ازىرگە بەلگىسىز. شابۋىلدار وتكەن اپتادا بوككوس اۋدانىنداعى التى اۋىلدا بولدى. بۇل 2023-جىلدىڭ جەلتوقسانىنان بەرگى ايماقتاعى ەڭ ءىرى زورلىق-زومبىلىق وقيعاسى. سول كەزدە وسى اۋداندا 100 دەن استام ادام قازا تاپتى»، - دەلىنگەن حاباردا، دەپ جازادى Report.

پلاتو شتاتى ۇزاق ۋاقىت بويى فەرمەرلەر مەن مالشىلار اراسىنداعى شيەلەنىس پەن مەرزىمدى قاقتىعىستاردىڭ ايماعى بولىپ كەلەدى.

ايتا كەتەيىك، بۇعان دەيىن وتكەن جىلدىڭ قاراشا ايىندا نيگەريادا «بوكو حارام» لاڭكەستەرىمەن قاقتىعىستاردا 15 سارباز قازا تاپقانىن جازعان ەدىك.

ءدال وسى توپ قىركۇيەك ايىندا يوبە شتاتىنداعى مافا اۋىلىنا شابۋىل جاساپ، 80 گە جۋىق ادامنىڭ ءومىرىن قيدى.