نيگەريادا ءبىر اپتادا قىزىلشا ىندەتىنەن 42 ادام قايتىس بولدى

Нигерия
Фото: environewsnigeria.com

 استانا. KAZINFORM - ءبىر اپتانىڭ ىشىندە نيگەريانىڭ سولتۇستىك- شىعىسىنداعى اداماۆا شتاتىندا قىزىلشا ىندەتىنەن كەم دەگەندە 42 ادام قايتىس بولدى. بۇل تۋرالى Reuters جازدى.

اداماۆا شتاتىنىڭ دەنساۋلىق ساقتاۋ كوميسسارى فەليكس تانگۆامي قىزىلشا ىندەتى نەگىزىنەن ەكى اۋداندا ءورشىپ، 42 ادام قايتىس بولعانىن ايتتى.

«بۇل ايماقتارعا قىزىلشاعا قارسى ۆاكسينالار جىبەرىلدى. ءبىزدىڭ مامانداردان قۇرالعان توپ جاعدايدى باقىلاپ جاتىر»، - دەدى ول.

كوبى نيگەريانىڭ سولتۇستىك شتاتتارىنداعى تۇراقسىز جاعدايدى ايىپتاپ، ۆاكسيناتسياعا كەدەرگى كەلتىردى دەپ ەسەپتەيدى.

قىزىلشا-اۋا تامشىلارى ارقىلى تارالاتىن جانە اۋىر اسقىنۋلار مەن ولىمگە اكەلەتىن وتە جۇقپالى، ۆيرۋستىق اۋرۋ. 2000-2022-جىلدار ارالىعىندا قىزىلشاعا قارسى ۆاكتسيناتسيا 57 ميلليون ءولىمنىڭ الدىن الدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، ۆاكسينانىڭ قولجەتىمدىلىگىنە قاراماستان، 2022 -جىلى دۇنيە جۇزىندە قىزىلشادان 136000 ءولىم-ءجىتىم تىركەلدى. ونىڭ ىشىندە نەگىزىنەن ۆاكسيناتسيالانباعان نەمەسە تولىق ەكپە الماعان 5 جاسقا دەيىنگى بالالار بار.

سوڭعى جاڭالىقتار