نيۋ-يوركتەگى وقىس وقيعا كەزىندە بەس ادام قازا تاپتى
استانا. KAZINFORM - نيۋ-يورك قالاسىنىڭ مانحەتتەن ورتالىعىنداعى ءزاۋلىم عيماراتتا بەلگىسىز ادام اۆتومات قارۋىنان وق جاۋدىردى، دەپ جازدى BBC اگەنتتىگى.
CBS News تەلەارناسىنىڭ مالىمەتىنشە، اتىس كەزىندە ءبىر پوليتسەي مەن ونىڭ ارىپتەسى قازا تاپقان، ال ەكى بەيبىت تۇرعىن اۋىر جارالانعان. ال CNN جانە Fox News تەلەارنالارىنىڭ حابارلاۋىنشا، كەمىندە بەس ادام كوز جۇمعان، ولاردىڭ اراسىندا شابۋىلداۋشىنىڭ ءوزى دە بار.
قازا بولعاندار سانىنا قاتىستى پوليتسيا مەن جەرگىلىكتى بيلىك ازىرگە رەسمي مالىمدەمە جاساعان جوق.
نيۋ-يورك ءمەرى ەريك ادامس ۆيدەوۇندەۋىندە اتىس بارىسىندا «كوپتەگەن ادامدار جاراقات الدى» دەپ مالىمدەدى.
امەريكالىق ب ا ق-تىڭ حابارلاۋىنشا، وقيعا پارك-اۆەنيۋ داڭعىلىندا ورنالاسقان 44 قاباتتى ءزاۋلىم عيماراتتا بولعان. بۇل جەردە Blackstone اتتى ءىرى قارجى كومپانياسىنىڭ، ا ق ش ۇلتتىق فۋتبول ليگاسىنىڭ (NFL) جانە باسقا دا ۇيىمداردىڭ شتاب-پاتەرلەرى ورنالاسقان.
ايتا كەتەيىك، بۇعان دەيىن جاپپاي اتىس ا ق ش-تىڭ حيۋستون قالاسىندا دا تىركەلىپ، سول كەزدە 16 ادام جاراقات العان بولاتىن.
