نوسەر جاۋىن: الماتىنىڭ كوممۋنالدىق قىزمەتى كۇشەيتىلگەن رەجيمگە كوشتى

الماتى. KAZINFORM - الماتىنىڭ كوممۋنالدىق قىزمەتى نوسەر جاڭبىرعا بايلانىستى كۇشەيتىلگەن جۇمىس رەجيمىنە اۋىستىرىلدى.

«قازگيدرومەت» رمك مالىمەتىنشە، الماتىدا 20 - ماۋسىم كۇنى ساعات 15:00 دەن باستاپ 21- ماۋسىم ساعات 02:00 گە دەيىن جاڭبىر جاۋادى، كەي جەرلەردە ونىڭ مولشەرى 20 م م- گە دەيىن جەتەدى. نايزاعاي ويناپ، بۇرشاق جاۋۋى مۇمكىن.

جەل وڭتۇستىك- شىعىستان سولتۇستىك- باتىسقا اۋىسىپ، جىلدامدىعى 3-8 م/س، ەكپىنى 15-20 م/س- كە دەيىن جەتەدى. كۇندىز اۋا تەمپەراتۋراسى +28…+30 گرادۋس بولادى.

20 سىنان 21 -ماۋسىمعا قاراعان ءتۇنى وتكىنشى جاڭبىر جاۋادى. كۇندىز جاۋىن-شاشىن بولمايدى. اۋا تەمپەراتۋراسى تۇندە +17…+19 گرادۋس، كۇندىز +31…+33 گرادۋس.

22- ماۋسىم كۇنى - كوشپەلى بۇلت شىعادى، كۇندىز وتكىنشى جاڭبىر مەن نايزاعاي بولۋى مۇمكىن. تۇندە اۋا تەمپەراتۋراسى +20…+22 گرادۋس، كۇندىز +28…+30 گرادۋس.

- سۋ باسۋ قاۋپىنىڭ الدىن الۋ ماقساتىندا 52 موبيلدى جەدەل بريگادا كەزەكشىلىككە قويىلدى. ولار موتوپومپا جانە قۇرال- جابدىقپەن جابدىقتالعان. اۋدان اكىمدىكتەرىندە اتقارىلىپ جاتقان جۇمىستاردى باقىلاۋ ماقساتىندا تاۋلىك بويى كەزەكشىلىك ۇيىمداستىرىلدى. كۇندىزگى ۋاقىتتا 426 ارنايى تەحنيكا، 26 موتوپومپا جانە 895 جۇمىسشى جۇمىلدىرىلدى. قۇتقارۋ قىزمەتى تاراپىنان 12 تەحنيكا جانە 55 قىزمەتكەر، ت ج د- ءنىڭ 58 تەحنيكاسى مەن 245 مامانى تارتىلادى، - دەپ حابارلادى اكىمدىكتەن.

وسىعان دەيىن الماتىدا قاتتى جەلدەن ۋنيۆەرسيتەت عيماراتىنىڭ شاتىرى قۇلاعان بولاتىن.