نورا دجەرۋتو جۇكتى بولسا دا، پاريج وليمپياداسىنا قاتىسۋعا تەوريالىق مۇمكىندىگى بار - ۆيتسە-مينيستر
تۋريزم جانە سپورت ۆيتسە-ءمينيسترى سەرىك جاراسبايەۆ ماجىلىستەگى الەۋمەتتىك-مادەني دامۋ كوميتەتىنىڭ وتىرىسىنان كەيىن جۋرناليستەر سۇراعىنا بەرگەن جاۋابىندا كەنيادان شىققان لەگيونەر سپورتشى نورا دجەرۋتونىڭ پاريج وليمپياداسىندا قازاقستان اتىنان ونەر كورسەتۋ مۇمكىندىگى تۋرالى پىكىر ءبىلدىردى، دەپ حابارلايدى Kazinform.
جيىن بارىسىندا ۆيتسە-مينيستر 3000 مەترگە جۇگىرۋدەن قازاقستانعا الەم چەمپيوناتىنىڭ التىن مەدالىن الىپ بەرگەن جەڭىل اتلەتتىڭ دوپينگ داۋىنان اقتالىپ شىققانىن، پاريج وليمپياداسىنا قاتىسۋعا ەش شەكتەۋ جوق ەكەنىن ايتتى.
جيىننان كەيىن جۋرناليستەر اتالعان سپورتشىنىڭ جۇكتىلىگى پاريجدە باق سىناۋىنا كەدەرگى كەلتىرمەي مە دەگەن ساۋال قويدى.
«ونىڭ پاريج وليمپياداسىنا قاتىسۋى جوسپاردا بار. ءبىراق قاتىسا ما، قاتىسپاي ما، ءالى بەلگىسىز. نەگە دەسەڭىز، جەڭىل اتلەتيكانىڭ ليتسەنزيالىق جارىستارى 2024-جىلعى شىلدە ايىنا دەيىن وتكىزىلەدى. ياعني، ءالى سول جارىستاردان ءوتۋى كەرەك. نەگىزى جوسپاردا تۇر. نورا دجەرۋتو - رەيتينگتە ءبىرىنشى قاتاردا تۇرعان سپورتشىلاردىڭ ءبىرى. سوندىقتان امان-ەسەن بوسانىپ، بالانى دۇنيەگە اكەلگەننەن كەيىن جارىسقا قاتىسىپ، جەڭىمپاز بوپ شىقسا، ارينە، قاتىسۋى مۇمكىن. ياعني، تەوريالىق تۇرعىدا مۇمكىن»، - دەدى سەرىك جاراسبايەۆ.
ەسكە سالساق، بيىل ءساۋىر ايىندا نورا دجەرۋتونىڭ دوپينگ داۋىنا ىلىككەنى ءمالىم بولعان. كەيىن ونىڭ جۇكتىلىكپەن بايلانىستى ءدارى قولدانعانى دالەلدەنىپ، دوپينگتەن تازا ەكەنى حابارلاندى.
