ۆەنەتسيا 2150 -جىلى سۋ استىندا قالۋى مۇمكىن

استانا. KAZINFORM - ۆەنەتسيا 2150 -جىلعا قاراي تولىعىمەن سۋ استىندا قالۋى مۇمكىن. مۇنداي بولجامدى گەوفيزيكا جانە ۆۋلكانولوگيا ۇلتتىق ينستيتۋتى جۇرگىزگەن حالىقارالىق جوبانىڭ ءبىر سەناريى قاراستىرادى، دەپ حابارلايدى تاسس.

زەرتتەۋشىلەردىڭ قورىتىندىلارىنا سايكەس، «مويسەي» بوگەت جۇيەسى قالانى قورعاۋ ءۇشىن جەتكىلىكسىز بولادى، دەپ حابارلايدى RAI News 24 اقپاراتتىق ارناسى.

سۋ تاسقىنىن مودەلدەۋ 2050, 2100 جانە 2150 -جىلدارعا جاسالعان. ەڭ ناشار سەناري XXII عاسىردىڭ ورتاسىنا سايكەس كەلىپ وتىر، بۇل كەزدە 139-226 شارشى شاقىرىم اۋماق سۋ استىندا قالۋى مۇمكىن.

- قوسىمشا قورعانىس شارالارىنسىز، سۋ باسا قالسا ۆەنەتسيانىڭ جەرگىلىكتى حالقى مەن مادەني مۇراسىنا ەلەۋلى زالال كەلتىرىلەدى، - دەپ ەسكەرتەدى عالىمدار.

ولاردىڭ تۇسىندىرۋىنشە، كليماتتىڭ وزگەرۋىمەن كۇشەيەتىن «جوعارى سۋ» اسەرى جەردىڭ بىرتىندەپ تومەندەۋىنە جانە تەڭىزگە سىڭۋىنە اكەلەدى. قازىرگى ۋاقىتتا بۇل پروتسەسس جىلىنا 7 م م جىلدامدىقپەن ءجۇرىپ وتىر.

150 دەن استام ارالعا سالىنعان ۆەنەتسيانى جويىلىپ كەتۋدەن ساقتاۋ ءۇشىن ارنايى موبيلدى بوگەت جۇيەسى ازىرلەنگەن. بىرنەشە جىل بۇرىن قۇرىلىسى قىمباتقا تۇسكەنى ءۇشىن كوپ پىكىرتالاس تۋدىرعان «مويسەي» بوگەتى ىسكە قوسىلىپ، سوڭعى جىلدارى ۆەنەتسيانى «جوعارى سۋدان» قورعاپ كەلەدى.

«جوعارى سۋ» قۇبىلىسى ايدىڭ سيكلدەرىنە بايلانىستى تەڭىز تاسقىندارىنان تۋىندايدى جانە ادريات تەڭىزى لاگۋناسىنداعى شاعىن ارالداردا ورنالاسقان ۆەنەتسيانىڭ ارال بولىگىنە ءتان قۇبىلىس. دەگەنمەن، سۋ دەڭگەيى مەزگىل-مەزگىل كوتەرىلىپ، اۋليە مارك الاڭىن ازداپ سۋ باسىپ تۇرادى.

ايتا كەتەلىك ۆەنەتسيالىقتار گوندولەرلەردىڭ ازايىپ بارا جاتقانىنا الاڭداۋلى.