نەتانياحۋ: يزرايل اسكەرى الداعى بىرنەشە كۇندە گازاعا «تولىق كۇشپەن» كىرەدى
استانا. KAZINFORM - بينيامين نەتانياحۋ سەيسەنبى كۇنى يزرايل قورعانىس ارمياسى (ساحال) «وپەراتسيانى تولىق اياقتاپ، حاماس-تى جويمايىنشا توقتامايتىنىن» مالىمدەدى، دەپ حابارلايدى Euronews.
- الداعى كۇندەرى ءبىز وپەراتسيانى اياقتاپ، حاماس-تى تالقانداۋ ءۇشىن گازا سەكتورىنا تولىق كۇشپەن كىرەمىز. ءبىز سوعىستى توقتاتاتىن جاعداي بولمايدى. ۋاقىتشا ءبىتىم بولۋى مۇمكىن [كەپىلگە الىنعانداردى بوساتۋ ماقساتىندا]، ءبىراق ءبىز سوڭىنا دەيىن بارامىز، - دەپ مالىمدەدى سەيسەنبى كۇنى يزرايل پرەمەر-ءمينيسترى بينيامين نەتانياحۋ.
سونداي-اق نەتانياحۋ گازادان حالىقتىڭ ءبىر بولىگىن باسقا ەلدەرگە كوشىرۋ ماسەلەسىن دە قوزعادى. بۇل ۇسىنىستى جىل باسىندا دونالد ترامپ ايتقان بولاتىن، الايدا ونى اراب ەلدەرى مەن حالىقارالىق قاۋىمداستىقتىڭ ەداۋىر بولىگى بىردەن قابىلداماي تاستاعان ەدى.
- ءبىز ولارعا كوشۋگە مۇمكىندىك بەرەتىن اكىمشىلىك قۇردىق، ءبىراق ماسەلە ءبىر-اق نارسەگە تىرەلەدى: بىزگە ولاردى قابىلداۋعا دايىن ەلدەر كەرەك. قازىر وسى باعىتتا جۇمىس ىستەپ جاتىرمىز. ەگەر ءبىز ولارعا كوشۋ مۇمكىندىگىن ۇسىنساق، مەنىڭ ويىمشا، 50 پايىزدان استامى كەتەدى، ءتىپتى بۇدان دا كوبى. ءبىراق حاماس ول جەردە (گازادا) ەندى بولمايدى، - دەدى نەتانياحۋ.
بۇعان دەيىن وسى ايدا يزرايل گازا سەكتورىنىڭ بۇكىل اۋماعىن باسىپ الىپ، ونى بەلگىسىز مەرزىمگە وككۋپاتسيالاۋ جوسپارىن بەكىتكەن بولاتىن. بۇل 18-ناۋرىزدا ەكى ايلىق بىتىمنەن كەيىن اسكەري ءىس-قيمىلداردى قايتا باستاعاننان سوڭ جاريالاندى.
ەسكە سالا كەتەيىك، بۇعان دەيىن نەتانياحۋ يزرايلدىڭ ا ق ش-تىڭ اسكەري كومەگىنەن باس تارتۋى مۇمكىن ەكەنىن دە مالىمدەگەن ەدى.
