نەتانياحۋ يزرايل ا ق ش-تىڭ اسكەري كومەگىنەن باس تارتۋى مۇمكىن ەكەنىن بولجادى

استانا. KAZINFORM - يزرايل پرەمەر-ءمينيسترى بينيامين نەتانياحۋ ەل ا ق ش-تان جىل سايىن الاتىن امەريكالىق اسكەري كومەك ماسەلەسىن قايتا قاراۋ قاجەتتىگى تۋرالى مالىمدەدى، دەپ حابارلايدى انادولى.

يزرايلدىك «مااريۆ» گازەتىنىڭ حابارلاۋىنشا، مينيسترلەر كابينەتىنىڭ باسشىسى بۇل تۋرالى پارلامەنتتىڭ حالىقارالىق ىستەر جانە قاۋىپسىزدىك كوميتەتىنىڭ جابىق وتىرىسىندا مالىمدەدى.

- ءبىز قارۋ-جاراق ءۇشىن شامامەن 4 ميلليارد دوللار الىپ وتىرمىز. مەنىڭ ويىمشا، ءبىر كەزدەرى ەكونوميكالىق كومەكتەن شارشاعانىمىزداي، وسىدان دا شارشايمىز، - دەپ كەلتىردى باسىلىم نەتانياحۋدىڭ سوزدەرىن.

KAN دا وسىعان ۇقساس اقپاراتتى تاراتتى.

- ءبىز قاۋىپسىزدىك سالاسىنداعى امەريكالىق كومەك الۋدى توقتاتۋعا ءماجبۇر بولامىز دەپ شامالايمىن، - دەپ كەلتىردى مەملەكەتتىك تەلەارنا ۇكىمەت باسشىسىنىڭ ءسوزىن.

ءبىرقاتار يزرايلدىك ب ا ق بۇل سوزدەردى نەتانياحۋ مەن ترامپ اراسىنداعى قارىم-قاتىناستىڭ سالقىنداعانىنىڭ بەلگىسى دەپ ءتۇسىندىرىپ وتىر.

اتاپ ايتقاندا، ا ق ش-تىڭ يرانمەن كەلىسسوزىنىڭ باستالۋى، ۇلتتىق قاۋىپسىزدىك جونىندەگى كەڭەسشى مايك ۋولستىڭ قىزمەتىنەن بوساتىلۋى، سونداي-اق ۆاشينگتوننىڭ يەمەندىك حۋسيتتەرمەن اتىستى توقتاتۋدى قولداۋىنا نازار اۋدارىلىپ وتىر.

باسپا ءسوز حابارلارىنا قاراعاندا، ترامپتىڭ نەتانياحۋدان «كوڭىلى قالدى» جانە تاياۋ شىعىستاعى ساياساتىن يزرايل كوشباسشىسىنىڭ قاتىسۋىنسىز قۇرۋ ماسەلەسىن قاراستىرىپ وتىر.

ا ق ش پەن يزرايل 2016 -جىلى 10 جىلدىق ءوزارا تۇسىنىستىك تۋرالى مەموراندۋمعا قول قويدى، ول 2028 -جىلعا دەيىن 38 ميلليارد دوللار كولەمىندە اسكەري كومەكتى قاراستىرادى.

سونىمەن قاتار، 2019 -جىلى قول قويىلعان كەلىسىم بويىنشا ا ق ش يزرايلگە جىل سايىن شامامەن 3,8 ميلليارد دوللار كولەمىندە اسكەري كومەك كورسەتىپ جاتىر.

بۇعان دەيىن ترامپ نەتانياحۋمەن كەزدەسۋدە گازا سەكتورىن باقىلاۋعا الۋ يدەياسىن تاعى دا العا تارتتى.