نەتانياحۋ يرانعا قارسى سوققىلاردى كۇشەيتۋدى بۇيىردى
استانا. KAZINFORM - يزرايل پرەمەر-ءمينيسترى بينيامين نەتانياحۋ تەگەراننان كەلگەن تاڭعى راكەتالىق شابۋىلدان كەيىن يزرايل ارمياسىنا يرانعا قارسى سوققىلاردى كۇشەيتۋ جونىندە بۇيرىق بەردى، دەپ حابارلايدى انادولى.
الەۋمەتتىك جەلىدە جاريالانعان مالىمدەمەسىندە نەتانياحۋ يراننىڭ تەل-اۆيۆ پەن ونىڭ ماڭايىنداعى بىرنەشە نىسانعا باعىتتالعان قارىمتا شابۋىلىنا قاتىستى پىكىر ءبىلدىردى.
ول يران باسشىلىعىنا سەس كورسەتىپ، «حامەنەي بۇل ارەكەتتەرى ءۇشىن جاۋاپ بەرەدى» دەپ مالىمدەدى.
يزرايلدىڭ قورعانىس ءمينيسترى يسراەل كاتس تا الەۋمەتتىك جەلى ارقىلى مالىمدەمە جاساپ، قاتتى سىن ايتتى.
كاتس تاڭەرتەڭگى يران شابۋىلىن «سوعىس قىلمىسى» دەپ اتاپ، يراننىڭ رۋحاني كوسەمى ءالي حامەنەي ورىن العان وقيعا ءۇشىن جاۋاپكەرشىلىككە تارتىلادى دەدى. ول نەتانياحۋمەن بىرگە ارمياعا يرانعا قارسى اسكەري وپەراتسيالاردى كۇشەيتۋ تۋرالى بۇيرىق بەرگەنىن جەتكىزدى.
يران يزرايلگە جاۋاپ رەتىندە راكەتالىق سوققى جاسادى
تاڭەرتەڭ يران يزرايل اۋماعىنا راكەتالىق سوققى بەردى.
حابارلامالارعا سايكەس، زىمىراندار تەل-اۆيۆ، رامات-گان، حولون قالالارىنداعى جانە وڭتۇستىكتەگى بەەر-شيەۆا (بىريۋسسەبي) قالاسىنداعى بىرنەشە نىساندى قيراتقان.
يراندىق زىمىرانداردىڭ ءبىرى بەەر-شيەۆاداعى «سوروكا» اۋرۋحاناسىنا تيگەنى دە ايتىلىپ جاتىر.
13- ماۋسىمدا يزرايل يراننىڭ يادرولىق نىساندارىنا جانە ەلدىڭ اسكەري باسشىلىعى ورنالاسقان ايماقتارعا جاپپاي اۋە سوققىسىن باستادى.
اتالعان شابۋىلداردىڭ سالدارىنان يران قارۋلى كۇشتەرى باس شتابىنىڭ باستىعى، يسلام ريەۆوليۋتسياسى ساقشىلار كورپۋسىنىڭ باس قولباسشىسى، ءبىرقاتار جوعارى لاۋازىمدى اسكەري تۇلعالار جانە يادرولىق زەرتتەۋلەرمەن اينالىسقان توعىز مامان قازا تاپتى. جالپى، 13 -ماۋسىمنان بەرى يراندا كەمىندە 585 ادام قازا تاۋىپ، 1300 دەن استام ادام جارالانعان.
جاۋاپ رەتىندە يران بالليستيكالىق زىمىراندارمەن يزرايل اۋماعىنا سوققى جاسادى. رەسمي مالىمەت بويىنشا، بۇل شابۋىلدان 24 ادام قازا تاۋىپ، 500 دەن استام ادام جارالانعان.
تۇركيا دا قوسا العاندا، ءبىرقاتار مەملەكەتتەر يزرايلدىڭ ارەكەتىن قاتاڭ ايىپتادى.
ايتا كەتەلىك ماكرون يزرايلدىڭ يرانعا جاساعان شابۋىلدارىن دەرەۋ توقتاتۋعا شاقىرعان ەدى.
اۆتور
نازىم بولەسوۆا
