نەتانياحۋ بۇدان بىلاي حاماس-پەن كەلىسسوزدەر تەك وق استىندا جۇرگىزىلەتىنىن مالىمدەدى
استانا. KAZINFORM - يزرايل پرەمەر-ءمينيسترى بينيامين نەتانياحۋ حالىققا ارناعان تەلەديدارلىق ۇندەۋىندە ونىڭ ۇكىمەتى توپتى كەپىلگە الىنعانداردى بوساتۋ بويىنشا بىرنەشە اپتا بويى ءساتسىز ارەكەتتەرىنەن كەيىن حاماس-قا قارسى قارقىندى كۇرەستى قايتا باستاعانىن مالىمدەدى، دەپ حابارلايدى BBC.
جولداۋدىڭ الدىندا ول مينيسترلەر كابينەتىنىڭ شۇعىل وتىرىسىن شاقىردى.
نەتانياحۋدىڭ ايتۋىنشا، حاماس مەرزىمى 1-ناۋرىزدا اياقتالعان اتىستى توقتاتۋ كەلىسىمىن ۇزارتۋعا ايىرباس رەتىندە 24 ى ءالى ءتىرى دەپ سانالاتىن كەپىلگە الىنعان 59 ازاماتتى قايتارۋ تۋرالى بىرنەشە ۇسىنىستى قابىلداعان جوق.
- بۇدان بىلاي كەلىسسوزدەر تەك وق استىندا جۇرگىزىلەتىن بولادى. بۇل - تەك باستاماسى، - دەدى پرەمەر-مينيستر.
يزرايل ۇشاقتارى سەيسەنبىگە قاراعان ءتۇنى حاماس ينفراقۇرىلىمىنا جاپپاي سوققى بەردى.
پالەستينا تاراپىنىڭ مالىمەتىنشە، 400 گە جۋىق بەيبىت تۇرعىن قازا تاپقان.
نەتانياحۋ يزرايل ەندى حاماس-قا قارسى اسكەري وپەراتسيالارىن كۇشەيتەتىنىن ۋادە ەتتى.
ءدال وسى ۋاقىتتا باسقارۋشى كواليتسياعا كىرەتىن پارتيالاردىڭ ءبىرى «ءدىني سيونيزم» يزرايل بيلىگىنە ءبىر كەپىلگە الىنعان بىرنەشە پالەستينالىق تۇتقىندى بوساتۋعا تىيىم سالاتىن زاڭ جوباسىنا باستاماشى بولدى.
زاڭ جوباسىندا سونداي-اق ءتىرى پالەستينالىقتاردىڭ كەپىلگە الىنعانداردىڭ مايىتتەرىنە ايىرباستالمايتىنى دا قاراستىرىلعان. يزرايلدىك اقپارات قۇرالدارىنىڭ حابارلاۋىنشا، جاقىن ارادا كنەسسەتتە زاڭ جوباسىنا داۋىس بەرۋ كۇتىلىپ وتىر.
ەسكە سالا كەتسەك، سەيسەنبى كۇنى تاڭەرتەڭ يزرايلدىڭ گازا سەكتورىنىڭ ءبىر بولىگىنە جاساعان اۋە شابۋىلىنان قازا تاپقان پالەستينالىقتاردىڭ سانى 413 كە جەتتى.
يزرايل گازاداعى حاماس نىساندارىنا سوققى جاساۋدى جالعاستىرىپ وتىر.
