نەسيەنى ۋاقىتىندا تولەي الماساڭىز نە ىستەۋ كەرەك؟
استانا. KAZINFORM - ءار ادامنىڭ ومىرىندە قارجىلىق قيىندىقتار تۋىنداۋى مۇمكىن. مۇنداي كەزدە نەسيە تولەمىن ۋاقىتىندا وتەۋ قيىنعا سوعادى. ەگەر نەسيەنى كەشىكتىرىپ الساڭىز، قانداي قادام جاساعان دۇرىس؟
El.kz ينتەرنەت پورتالى وسىنداي جاعدايدا دۇرىس ارەكەت ەتۋ جولدارىن جانە بانكپەن ءتيىمدى كەلىسسوز جۇرگىزۋ تاسىلدەرىن ۇسىنادى.
قاي كەزدە قايتا نەسيەنى قۇرىلىمداۋعا بولادى؟
قارىزدى قايتا قۇرىلىمداۋ - نەسيە شارتىنىڭ كەيبىر تالاپتارىن وزگەرتۋ ارقىلى قارجىلىق جۇكتەمەنى جەڭىلدەتۋ ءتاسىلى. بۇل - تولەم مەرزىمىن ۇزارتۋ، پايىزدىق مولشەرلەمەنى تومەندەتۋ نەمەسە تولەمدەردى ۋاقىتشا توقتاتا تۇرۋ سىندى وزگەرىستەردى بىلدىرەدى.
ق ر قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنە سايكەس، بانك نەسيەنى قايتا قۇرىلىمداۋ تۋرالى ءوتىنىشتى مىناداي وبەكتيۆتى سەبەپتەر بولعان جاعدايدا قارايدى:
جۇمىستان ايىرىلۋ نەمەسە تابىستىڭ كۇرت ازايۋى؛
دەنساۋلىق جاعدايىنىڭ ناشارلاۋى، مۇگەدەكتىك؛
دەكرەتتىك دەمالىس؛
اسكەري بورىشتى وتەۋ؛
فورس-ماجورلىق جاعدايلار (ءورت، ۇرلىق جانە باسقا كۇتپەگەن جاعدايلار).
ەڭ باستىسى - ماسەلەنى ۋشىقتىرماي، بانككە مۇمكىندىگىنشە ەرتەرەك جۇگىنۋ. بۇل - ايىپپۇلدار مەن ءوسىمپۇلداردان، نەسيە تاريحىنىڭ بۇزىلۋىنان جانە سوت ارقىلى ءوندىرۋ تاۋەكەلىنەن ساقتايدى.
قايتا قۇرىلىمداۋعا ءوتىنىشتى قالاي بەرەدى؟
ءوتىنىشتى بانك بولىمشەسىنە بارىپ، ءموبيلدى قوسىمشا ارقىلى نەمەسە ەلەكتروندىق پوشتا ارقىلى جولداۋعا بولادى. زاڭ بويىنشا ءوتىنىشتى تولەمدى كەشىكتىرگەن كۇننەن باستاپ 30 كۇن ىشىندە بەرگەن ءجون. ءبىراق سوت شەشىمى شىقپاعان بولسا، بۇل مەرزىم وتكەن سوڭ دا قارالۋى مۇمكىن.
وتىنىشكە قارجىلىق قيىندىقتى راستايتىن قۇجاتتاردى قوسا تىركەۋ قاجەت. ماسەلەن، جۇمىستان بوساتۋ تۋرالى بۇيرىق، مەديتسينالىق انىقتامالار، تابىستىڭ تومەندەگەنىن كورسەتەتىن قۇجاتتار نەمەسە بالانىڭ تۋۋ تۋرالى كۋالىگى. بۇل ءتىزىم تولىق ەمەس - بانك قاجەت بولعان جاعدايدا قوسىمشا قۇجاتتار سۇراتۋى مۇمكىن.
ءوتىنىش تاپسىرىلعان سوڭ، بانك 15 جۇمىس كۇنى ىشىندە شەشىم شىعارادى. ول - كەيىنگە شەگەرۋ، بالاما شارت ۇسىنۋ نەمەسە باس تارتۋ بولۋى مۇمكىن.
ەگەر بانك ءوتىنىشتى قابىلداماسا نە ىستەۋ كەرەك؟
بانك قايتا قۇرىلىمداۋدان باس تارتسا، كەلەسى ارەكەتتەردى قاراستىرىڭىز:
بانك ومبۋدسمانىنا شاعىمدانۋ - بانكتەر اراسىنداعى داۋلاردى شەشۋگە كومەكتەسەتىن ورگان؛
زاڭگەر كەڭەسىنە جۇگىنۋ - قۇقىقتىق تۇرعىدا قانداي مۇمكىندىكتەر بارىن ءبىلۋ؛
قايتا قارجىلاندىرۋ - باسقا بانكتەن تيىمدىرەك شارتپەن نەسيە الىپ، بۇرىنعى قارىزدى جابۋ.
قايتا قۇرىلىمداۋ قانداي جولمەن جۇزەگە اسادى؟
بانك كەلەسى جەڭىلدىك تۇرلەرىن ۇسىنۋى مۇمكىن:
نەسيە مەرزىمىن ۇزارتۋ - اي سايىنعى تولەمدى ازايتادى، ءبىراق جالپى تولەنەتىن سوما ارتادى؛
پايىزدىق مولشەرلەمەنى تومەندەتۋ - ەگەر نارىقتاعى بازالىق مولشەرلەمە تومەندەسە؛
تولەمدى كەيىنگە شەگەرۋ - بەلگىلى ءبىر ۋاقىت تولەمنەن بوساتىلادى، ءبىراق بۇل ۋاقىتتا پايىزدار ەسەپتەلۋى مۇمكىن؛
ايىپپۇل مەن ءوسىمپۇلداردى كەشىرۋ - بانك ءىشىنارا نەمەسە تولىقتاي ەسەپتەن شىعارا الادى؛
تولەم ءتارتىبىن وزگەرتۋ - الدىمەن نەگىزگى قارىزدى وتەۋگە مۇمكىندىك بەرىلەدى.
بانكتەردەگى «قارا تىزىمنەن» قالاي شىعۋعا بولادى؟
كەيدە ادام نەسيەسىن ۋاقىتىندا تولەي الماعاندىقتان، ونىڭ اتى بانكتەردەگى «قارا تىزىمگە» - ياعني، نەسيە بيۋروسىنىڭ تەرىس تىزىمىنە ەنىپ كەتەدى. بۇل - بولاشاقتا قايتا نەسيە الۋ مۇمكىندىگىن شەكتەيتىن ۇلكەن كەدەرگى. دەگەنمەن، بۇل تىزىمنەن شىعۋعا بولادى. ول ءۇشىن تومەندەگى كەڭەستەردى ورىنداۋ قاجەت.
نەسيە تاريحىڭىزدى تەكسەرىڭىز
قازاقستاندا نەسيە تاريحى ەكى نەگىزگى بيۋرو ارقىلى باقىلانادى:
«مەملەكەتتىك كرەديتتىك بيۋرو»؛
«ءبىرىنشى نەسيە بيۋروسى».
وسى سايتتار ارقىلى جەكە سايكەستەندىرۋ ءنومىرىڭىزدى (ج س ن) ەنگىزىپ، ءوز نەسيە تاريحىڭىزدى تەكسەرىڭىز. قارا تىزىمدە بار-جوعىڭىز تۋرالى ناقتى اقپارات الاسىز.
قارىزداردى تولىق وتەۋ
مەرزىمى ءوتىپ كەتكەن بارلىق قارىزداردى تەز ارادا وتەۋ قاجەت. كەيبىر بانكتەر ءبولىپ تولەۋ نەمەسە قايتا قۇرىلىمداۋ ارقىلى جەڭىلدىك جاساۋى مۇمكىن. قانداي جولدى تاڭداساڭىز دا - ەڭ باستىسى، قارىز جابىلۋى كەرەك.
قارىزدىڭ وتەلگەنى تۋرالى انىقتاما الۋ
قارىز تولىق وتەلگەننەن كەيىن بانككە بارىپ، قارىزدىڭ جابىلعانىن راستايتىن رەسمي انىقتاما الىڭىز. بۇل قۇجات ءسىزدىڭ قارىزىڭىز جوق ەكەنىن دالەلدەيتىن ماڭىزدى قۇجات بولىپ سانالادى.
نەسيە تاريحىن جاڭارتۋ
بانك بەرگەن انىقتامامەن بىرگە نەسيە بيۋروسىنا جۇگىنىپ، ءوز تاريحىڭىزدى جاڭارتۋدى سۇراڭىز. ەگەر تاريحتا قاتە نەمەسە ەسكى اقپاراتتار كورسەتىلسە، بانككە تۇزەتۋ تۋرالى حات جازدىرتىپ، ونى دا بيۋروعا تاپسىرۋ كەرەك.
قارىزدارىڭىزدى جاپقان سوڭ، شاعىن نەسيە نەمەسە كرەديت كارتاسىن الىپ، ونى اي سايىن ۋاقىتىندا تولەپ وتىرىڭىز. بۇل - نەسيە تاريحىن بىرتىندەپ جاقسارتۋدىڭ ەڭ ءتيىمدى جولى.
بانكتەرمەن بايلانىستا بولىڭىز
كەيبىر بانكتەر ءسىزدىڭ ەسكى قارىزىڭىزدى وتەگەنىڭىزدى جانە بەلگىلى ءبىر ۋاقىت وتكەنىن ەسكەرە وتىرىپ، جاڭا نەسيەنى قاراستىرۋعا دايىن بولادى. مۇنداي جاعدايدا بانككە رەسمي ءوتىنىش جازىپ، جاعدايىڭىزدى قايتا قاراۋدى سۇراي الاسىز.
قارا تىزىمدەگى اقپاراتتار، ادەتتە، بەس جىل بويى ساقتالادى. ەگەر وسى مەرزىم ىشىندە جاڭا قارىز الماي، ءتارتىپ بۇزباساڭىز - جۇيە ءسىزدى اۆتوماتتى تۇردە جاقسى تۇتىنۋشى رەتىندە قابىلداي باستايدى.
ايتا كەتەيىك، بۇعان دەيىن اقشانى ومىرىڭىزگە تارتۋدىڭ وڭاي ءارى ءتيىمدى جولدارى جايلى جازعان ەدىك.
