نەسيەگە شەكتەۋ قويىلادى دەگەن راس پا
استانا. KAZINFORM - ️جالعان اقپاراتقا قارسى ءىس-قيمىل ورتالىعى جەلىدە بانكتىك نەسيە بەرۋ ماسەلەلەرىنە قاتىستى مانيپۋلياتسيالىق اقپاراتتىڭ تارالۋى تۋرالى ەسكەرتەدى.
جەلىدە ازاماتتاردىڭ بەلگىلى ءبىر ساناتتارى ءۇشىن «نەسيە الۋ مۇمكىندىگى شەكتەلەتىنى» تۋرالى حابارلامالاردىڭ بەلسەندى تارالۋى تىركەلىپ جاتىر.
- بۇل اقپارات شىندىققا جاناسپايدى، ويتكەنى نەسيە بەرۋ تۋرالى شەشىمدى بانكتەر ءارقاشان قارىز الۋشىنىڭ تولەم قابىلەتتىلىگىن كەشەندى باعالاۋ نەگىزىندە قابىلداعان جانە قابىلدانادى، - دەلىنگەن حابارلامادا.
ۇلتتىق بانكتىڭ مالىمەتىنشە، قازىرگى ۋاقىتتا بەلگىلەنگەن نورماتيۆتەر، سونىڭ ىشىندە شەكتى ءمانى 0,5 ءتى قۇرايتىن بورىشتىق جۇكتەمە كوەففيتسيەنتى قولدانىستا (باسقارمانىڭ 2025-جىلعى 25-تامىزداعى 52-قاۋلىسى). ال بورىشتىڭ تابىسقا قاتىناسى كورسەتكىشى قازىرگى ۋاقىتتا تالداۋ ساتىسىندا جانە ونىڭ بەكىتىلگەن ءمانى جوق.
رەتتەۋدەگى وزگەرىستەر كەزەڭ-كەزەڭىمەن ەنگىزىلەدى جانە ولار بويىنشا رەسمي تۇسىندىرمەلەر بەرىلەدى.
- الەۋمەتتىك جەلىلەردەگى ءۇزىلدى-كەسىلدى جانە ۇرەي تۋعىزاتىن سيپاتتاعى جاريالانىمدار مانيپۋلياتسيالىق مازمۇننىڭ ايقىن بەلگىسى. ولار كوبىنەسە جاساندى دۇربەلەڭ تۋدىرۋعا جانە كۇماندى اقىلى قىزمەتتەردى ۇسىنۋعا باعىتتالعان.
ورتالىق ازاماتتاردى مۇنداي اقپاراتقا سىن كوزبەن قاراۋعا، دەرەكتەردى تەك رەسمي اقپارات كوزدەرىنەن تەكسەرۋگە، كۇماندى سىلتەمەلەرگە وتپەۋگە جانە جەكە دەرەكتەردى ءۇشىنشى تۇلعالارعا بەرمەۋگە شاقىرادى، - دەلىنگەن حابارلامادا.
ايتا كەتەلىك «7-20-25» باعدارلاماسى بويىنشا دا قازاقستاندىقتارعا الاياق دەلدالداردان ساق بولۋ ەسكەرتىلگەن ەدى.
