نەسيەگە العان پاتەردى جالعا بەرۋگە بولا ما

استانا. KAZINFORM - باسپانانى نەسيەگە الىپ، جىلجىمايتىن مۇلىك ەسەبىنەن تابىس تاپقىڭىز كەلە مە؟ وندا اسىعىس قادام جاساماڭىز. مۇنداي مامىلە كەلىسىمشارت تالاپتارىن بۇزۋعا ءارى ايىپپۇل ارقالاۋعا تۇرتكى بولۋى مۇمكىن.

پاتەردى جالعا بەرۋ - بۇل اسىرەسە ءىرى قالالارداعى جىلجىمايتىن مۇلىك يەلەرىنىڭ ورتاسىندا قوسىمشا تابىس تابۋ تاسىلدەرىنىڭ تانىمال ءتۇرى. ەگەر تۇرعىن ءۇي ءسىزدىڭ مەنشىگىڭىزگە راسىمدەلسە، وندا ادەتتە ەشقانداي پروبلەما بولا قويمايدى. الايدا، پاتەردى نەسيەگە ساتىپ العاندا جاعداي كۇردەلەنە تۇسەدى: مۇنداي نىساندار نەسيە تولىعىمەن وتەلگەنگە دەيىن بانكتە كەپىلگە قويىلادى. دەمەك، جىلجىمايتىن مۇلىككە قاتىستى كەز كەلگەن ءىس- ارەكەت، ونىڭ ىشىندە جالعا بەرۋ، نەسيە كەلىسىمشارتىنىڭ تالاپتارىمەن رەتتەلەدى. بۇل كەلىسىمشارتتاردىڭ بۇزىلۋى ايىپپۇلدارعا، پايىزدىق مولشەرلەمەنىڭ وسۋىنە جانە ءتىپتى تۇرعىن ۇيدەن ايىرىلىپ قالۋعا اكەلۋى مۇمكىن.

ءاربىر نەسيە كەلىسىمشارتىنا باسپانانى بەرۋ مۇمكىندىكتەرىن رەتتەيتىن ەرەجەسى جازىلادى. ادەتتە ونىڭ ءۇش نۇسقاسى كەزدەسەدى.

جالعا بەرۋگە تۇبەگەيلى تىيىم

ەگەر كەلىسىمشارتتا جالعا بەرۋگە تىكەلەي تىيىم كورسەتىلسە، وندا كەز كەلگەن جاعدايدا دا پاتەردى جالعا بەرۋگە بولمايدى. بۇل ءاردايىم تىكەلەي جانە تۇسىنىكتى تۇردە جازىلا بەرمەيدى. مىسالى، مۇنداي تۇجىرىمدار كەلەسىدەي بولۋى مۇمكىن: «نەسيە نىسانىن مەنشىك يەسىنىڭ تۇرۋ قۇقىعىنسىز ءۇشىنشى تۇلعالارعا پايدالانۋعا بەرۋگە تىيىم سالىنادى».

وسى تارماقتى بۇزۋ بانك تاراپىنان تۋىندايتىن سانكسيالارعا اكەپ سوعادى: ايىپپۇل، نەسيەنى مەرزىمىنەن بۇرىن وتەۋدى تالاپ ەتۋ نەمەسە ءتىپتى پاتەر ءوندىرىپ الۋعا جۇگىنۋ. مۇنداي تۇجىرىمدامانى كوبىنەسە مەملەكەتتىك باعدارلامالار اياسىندا جانە باسقا جەڭىلدەتىلگەن نەسيەلەۋ كەزىندەگى نەسيە كەلىسىمشارتتاردان كەزدەستىرۋگە بولادى. بۇل تۇسىنىكتى دە. ويتكەنى مەملەكەت پايدا تاپقىسى كەلەتىندەرگە ەمەس، ەڭ الدىمەن مۇقتاج ازاماتتارعا كومەكتەسكىسى كەلەدى.

بانك كەلىسىمىمەن جالعا بەرۋگە رۇقسات

نەعۇرلىم يكەمدى نۇسقا - جالعا بەرۋگە بولادى، ءبىراق بانكتىڭ جازباشا كەلىسىمىن العاننان كەيىن عانا. ونى الۋ ءۇشىن ءسىز ءوتىنىش بەرۋىڭىز جانە قاجەت بولعان جاعدايدا جالعا بەرۋ كەلىسىمشارتىنىڭ كوشىرمەسىن قوسا ۇسىنۋىڭىز قاجەت. ادەتتە بانكتەر مۇنداي سۇرانىستاردى ادەتتە كليەنت نەسيەسىنىڭ تۇراقتى تولەپ وتىرسا، ماقۇلداپ جاتادى. الايدا، بانك كەلىسىمسىز پاتەردى جالعا بەرۋ كەلىسىمشارت تالاپتارىن بۇزۋ بولىپ سانالادى.

بۇل - جاعدايدىڭ ودان ارى ءوربۋىنىڭ ەڭ كەڭ تارالعان نۇسقاسى. ەكىنشى دەڭگەيلى بانكتەردىڭ كوپشىلىگى ناقتى جاعدايعا بايلانىستى شەشىم قابىلداۋ قۇقىعىن ساقتاۋعا تىرىسىپ، قاتاڭ تىيىم سالۋدان نەمەسە رۇقسات بەرۋدەن اۋلاق بولۋعا تىرىسادى.

شەكتەۋدىڭ بولماۋى

ەگەر كەلىسىمشارتتا جالعا بەرۋگە قاتىستى ەشقانداي ەسكەرتپە بولماسا، وندا پاتەردى قوسىمشا كەلىسىمدەرسىز-اق جالعا بەرۋگە بولادى. مۇنداي تارماقتى، ەگەر يپوتەكالىق كەلىسىمشارت ءقاۋىپتى دەپ سانالماسا عانا كەزدەستىرە الامىز. ماسەلەن، باستاپقى جارنانىڭ باسىم مولشەرىنىڭ تولەنۋى، جاقسى نەسيە تاريحى نەمەسە تۇرعىن ءۇي قۇنىنىڭ وسۋىنە مول مۇمكىندىك بولعان جاعدايدا.

نە ىستەۋ كەرەك

ەگەر ءسىز باستاپقىدا-اق پاتەردى جالعا بەرۋدى جوسپارلاعان بولساڭىز، وندا مۇنى نەسيە راسىمدەۋ كەزەڭىنەن بانكپەن تالقىلاعانىڭىز ءجون. مۇنداي ءتاسىل ينۆەستيسيالىق نەسيە (نەمەسە كوممەرتسيالىق ماقساتتاعى نەسيە) دەپ اتالادى جانە ول نەسيە شارتتارىنا دا اسەر ەتەدى.
ىقتيمال كىرىستى الدىن الا ەسەپتەپ، كورسەتىڭىز. كەيبىر بانك ونى قارىز الۋشىنىڭ تولەم قابىلەتتىلىگىنىڭ بولىگى رەتىندە قاراستىرادى.

ءيا، پايىزدىق مولشەرلەمە جوعارى بولۋى مۇمكىن. ويتكەنى بانكتەر مۇنداي نەسيەلەردى قاۋىپتى دەپ سانايدى. ءبىراق، بۇل ەگەر ءسىز پاتەردى جالعا بەرۋ ءۇشىن نەسيەگە الىپ، سودان كەيىن عانا مۇنداي قىزمەتكە تولىق تىيىم سالىناتىندىعى تۋرالى تارماقتى بايقاعانىڭىزدان جاقسى. مولشەرلەمەدەن بولەك، بانكتەر باستاپقى جارنانى كوبىرەك سۇراۋى مۇمكىن. مۇنداي نەسيەلەر ءۇشىن كوبىنەسە كەم دەگەندە 20-30 پايىز باستاپقى جارنا تالاپ ەتىلەدى. سونداي-اق، بانك مىندەتتى تۇردە كەڭەيتىلگەن ساقتاندىرۋدى سۇراۋى ىقتيمال. مۇنان بولەك، ءۇيدى جالعا بەرۋ كەپىلدەندىرىلگەن تابىس كوزى ەمەستىگىن، ال بانك ءسىزدىڭ تولەم قابىلەتتىلىگىڭىزگە سەنىمدى بولۋى كەرەكتىگىن ەسكەرىڭىز. سوندىقتان نەسيە تاريحى مەن كىرىس قالاي دەگەندە دە مۇقيات تەكسەرىلەدى.

ەگەر باستاپقىدا نەسيە جەكە پايدالانۋ ءۇشىن راسىمدەلسە، الايدا، كەيىنىرەك جالعا بەرۋ يدەياسى تۋسا، وندا ءسىز نەسيەنىڭ ماقساتىن قايتا رەسىمدەۋدى سۇراپ نەمەسە جالعا بەرۋگە رۇقسات الا الاسىز.

ەكىنشى نۇسقانى ەگجەي- تەگجەيلى قاراستىرايىق. ەگەر كەلىسىمشارتتىڭ تالاپتارى بانكتىڭ كەلىسىمىن تالاپ ەتسە، كەلەسى الگوريتمدى ورىنداڭىز:

- بانككە ءوتىنىش جازىڭىز (ونلاين راسىمدەۋگە بولادى).
- جالعا الۋشىنىڭ قاجەتتى قۇجاتتارىن قوسا ۇسىنىڭىز (جالعا بەرۋ كەلىسىمشارتىنىڭ جوباسىن قوسا بەرىڭىز، كەيدە ولار تابىس تۋرالى انىقتاما سۇراۋى مۇمكىن).

ماسەلەنى شەشۋ 7-14 جۇمىس كۇنىن الادى.

ادەتتە بانكتەر سەنىمدى قارىز الۋشىلاردىڭ ۇسىنىسىمەن كەلىسىمگە كەلۋگە دايىن مۇنىڭ ۇستىنە پاتەردى جالعا بەرۋ نەسيە تولەۋشىنىڭ تولەم قابىلەتى تۇراقتىلىعىن قامتاماسىز ەتە تۇسسە.

ايىپپۇل سانكسيالارى

ەگەر ءسىز وسىنداي ەلەۋسىز تارماقتىڭ بۇزىلۋى نازاردان تىس قالۋى مۇمكىن دەپ ويلاساڭىز، وندا ءسىز قاتەلەسەسىز - سانكسيالاردان جالتارا المايسىز. جازالاۋ شارالارى كەلىسىمشارتتا الدىن الا جازىلۋى مۇمكىن، وزگە جاعدايلاردا شەشىم بانكتىڭ ىشكى رەگلامەنتىنە سايكەس قابىلدانادى.
جازانىڭ ەڭ انىق نۇسقاسى - اقشالاي ايىپپۇل. ونىڭ مولشەرى كەلىسىمشارتتىڭ تالاپتارىنا نەمەسە بانك ەرەجەلەرىنە بايلانىستى.

پايىزدىق مولشەرلەمەنى كوتەرۋ تاعى ءبىر جازا رەتىندە تاڭدالۋى مۇمكىن. شىن مانىندە، بۇل اقشالاي ايىپپۇلمەن بىردەي، تەك نەسيەلەۋدىڭ بارلىق ۋاقىتىنا سوزىلادى.

ءسىزدىڭ كەلىسىمشارت تالاپتارىن بۇزۋىڭىزدان ەلەۋلى زالال بولعان جاعدايدا بانك نەسيەنى مەرزىمىنەن بۇرىن قايتارۋدى تالاپ ەتۋگە قۇقىلى. سوڭعى شارا رەتىندە ءبارى سوتپەن جانە باسپانادان ايىرىلۋىمەن اياقتالۋى مۇمكىن (ەسىڭىزدە بولسىن، ول كەپىلدە، ياعني ءىس جۇزىندە بانككە تيەسىلى).

سونىمەن قاتار، پاتەردى تۇراقتى جالعا بەرۋ كەزىندە سالىق تولەۋ قاجەتتىلىگىن ەسكەرۋ قاجەت - ايتپەسە سالىق ورگاندارى تاراپىنان پروبلەما تۋىنداۋى مۇمكىن.

باسپانانى داۋ- دامايسىز جالعا بەرۋ

ەڭ الدىمەن نەسيە كەلىسىمشارتىن تىڭعىلىقتى وقىپ شىعىڭىز - جالعا بەرۋگە قاتىستى تارماققا ايرىقشا نازار اۋدارىڭىز. ەگەر كەلىسىمشارتتا بۇل كوزدەلگەن بولسا، وندا بانكتىڭ كەلىسىمىن الۋدى قاپەرىڭىزدەن شىعارىپ الماڭىز. ەگەر كەلىسىم الىنسا، وندا تۇرعىن ءۇيدى جالعا بەرۋدەن تارتىنباڭىز. ءبىراق ءاردايىم رەسمي تۇردە جالعا بەرۋ كەلىسىمشارتىن جاساڭىز - بۇل ءسىزدىڭ داۋ-دامايدان قورعانىسىڭىز.

ەڭ سەنىمدى نۇسقا - نەسيەنى باسقا تابىس كوزدەرىنەن وتەۋ. پاتەردى جالعا بەرۋدەن تۇسەتىن قاراجاتقا يەك ارتپاي، تولەمدى ۋاقتىلى جاساڭىز. تابىس تاۋىپ وتىرىپ، ەشقاشان كىرىسىڭىزدى جاسىرماڭىز - سالىق سالۋ ماسەلەسىن زەردەلەپ، قازاقستان رەسپۋبليكاسىنىڭ زاڭناماسى اياسىندا زاڭدى بيزنەسپەن اينالىسىڭىز.

اۆتور

مارلان جيەمباي