ەنەرگەتيكالىق سۋسىننىڭ كەسىرىنەن كوز جۇمعاندار بار - دارىگەر

قىزىلوردا. KAZINFORM - جارنامادا ەنەرگەتيكالىق سۋسىنداردىڭ شارشاۋ، ۇيقىسىزدىق، ارتىق جۇكتەمە كەزىندە سەرگەكتىك سىيلايتىنى ايتىلادى. ءبىراق دارىگەرلەر ونى ءجيى قولدانۋ جۇرەككە قاۋىپتى دەپ دابىل قاعىپ وتىر.

قىزىلوردا وبلىستىق كوپبەيىندى اۋرۋحاناسىنىڭ كارديولوگيا-2 بولىمشەسى جانە سوزىلمالى جۇرەك جەتىسپەۋشىلىگى كابينەتىنىڭ دارىگەرى راۋان سايلاۋوۆا ەنەرگەتيكتىڭ كەسىرىنەن اۋرۋحاناعا تۇسەتىندەر بارىن جەتكىزدى.

- ءبىزدىڭ بولىمشەگە 22، 32 جاستاعى جانە 33 جاستاعى ەكى - بارلىعى ءتورت ناۋقاس ءتۇستى. ولار جۇرەك سىرقاتىنا، ونىڭ ىشىندە سوزىلمالى جۇرەك جەتىسپەۋشىلىگىنە شالدىققان. سونىڭ ەكەۋى وتكەن جىلى، بىرەۋى بيىل ومىردەن ءوتتى. بىرەۋىنىڭ جۇرەك ميوكاردىنىڭ جيىرىلۋ قىزمەتى تومەندەپ، ءومىر ءسۇرۋ ساپاسى ەداۋىر تومەندەگەن. ناۋقاستاردىڭ ءبارى اۋرۋحاناعا تۇسكەنگە دەيىن كەيىنگى ءبىر جىل ىشىندە ەنەرگەتيكالىق سۋسىندى تۇراقتى پايدالانعان. دارىگەرلەر ءتيىستى ەم-شارا قابىلداعانىنا قاراماستان وكىنىشكە قاراي دەرتتەن ايىعۋى مۇمكىن بولعان جوق، - دەدى اۋرۋحانا دارىگەرى.

ەنەرگەتيكالىق سۋسىندى جاپونيالىق وندىرۋشىلەر جۇمىسباستى قىزمەتكەرلەردىڭ بەلسەندىلىگىن ارتتىرۋ ءۇشىن ويلاپ تاپقان. بەرتىن كەلە قولدانىس اياسى كەڭەيىپ، ونى جاس تا، جاسامىس تا تۇتىناتىن بولدى.

- بونن ۋنيۆەرسيتەتىندە جۇرگىزىلگەن زەرتتەۋگە قاتىسۋشىلار ەنەرگەتيكالىق سۋسىن ىشكەننەن كەيىن 1 ساعات ىشىندە جۇرەكتىڭ سوعۋ جيىلىگى كۇشەيگەن. ال امەريكانىڭ كارديولوگيا اسسوتسياتسياسى زەرتتەۋ جۇرگىزگەندە 1 قۇتى ەنەرگەتيك ىشكەن ادامنىڭ 1,5 ساعاتتا قان قىسىمى ايتارلىقتاي جوعارىلاپ، جۇرەكتىڭ ەلەكترلى بەلسەندىلىگى (ەك گ- دەگى QT ارالىعىنىڭ ۇزارۋى) وزگەرەتىنى انىقتالعان. ەنەرگەتيكالىق سۋسىندار جۇرەك ىرعاعىنىڭ بۇزىلۋىنا، ءتىپتى جۇرەكتىڭ توقتاپ قالۋىنا اكەپ سوعۋى مۇمكىن. اسىرەسە، بۇل جۇرەك-قان تامىرى اۋرۋى انىقتالماعان ادامدار ءۇشىن قاۋىپتى، - دەدى راۋان سايلاۋوۆا.

دارىگەر گيپەرتونيا، اريتميا، جۇرەك ينفاركتىسىن وتكەرگەن، قانت ديابەتى بار ادامدارعا، جاسوسپىرىمدەر مەن بالالارعا، جۇكتى جانە بالا ەمىزەتىن ايەلدەرگە سەرگىتكىش سۋسىننان باس تارتۋعا كەڭەس بەرەدى.

ايتا كەتەيىك، جىل باسىندا ەلىمىزدە 21 جاسقا تولماعان جاسوسپىرىمدەرگە ەنەرگەتيكالىق سۋسىن ساتۋعا تىيىم سالىندى.

اۆتور

نازەركە سانيازوۆا