ەنەرگەتيكالىق سۋسىن حالال ما - ق م د ب شەشىمى

استانا. KAZINFORM - قازاقستان مۇسىلماندار ءدىني باسقارماسىنىڭ عۇلامالار كەڭەسى ەنەرگەتيكالىق سۋسىننىڭ اعزاعا اسەرى مەن شاريعات تۇرعىسىنان تۇسىنىكتەمە بەرىپ، شەشىم جاريالادى.

«ەنەرگەتيكالىق سۋسىن - قۇرامىندا كوفەين، قانت، پسيحوستيمۋلياتورلىق زاتتاردىڭ قوسپالارى (ماتەين، گۋارانا، جەنشەن، ءشوپ سىعىندىلارى، سيكلامات، ساحارين، سۋكرالوزا) بار، ورتالىق جۇيكە جۇيەسىنە ستيمۋلياتور رەتىندە ارەكەت ەتەتىن پسيحيكالىق جانە ادامداردىڭ دەنساۋلىعىنا اسەر ەتەتىن، تاۋەلدىلىكتى تۋدىراتىن گازدالعان الكوگولسىز نەمەسە الكوگولى از سۋسىن»، - دەپ تۇسىندىرىلگەن رەسمي اقپاراتتا.

ەنەرگەتيكالىق سۋسىندار الكوگولسىز جانە الكوگولدى دەپ ەكىگە بولىنەدى:

- الكوگولدى ەنەرگەتيكالىق سۋسىندار. ەنەرگەتيكالىق سۋسىنداردىڭ قۇرامىندا الكوگول از مولشەردە بولسا دا ونى ىشۋگە تىيىم سالىنادى. پايعامبارىمىز «ماس ەتەتىن نارسەنىڭ ازى دا، كوبى دە - حارام» ، دەپ ايتقان.

- الكوگولسىز ەنەرگەتيكالىق سۋسىندار. كەز كەلگەن سۋسىننىڭ قۇرامىندا الكوگول، زياندى زاتتار، حارام، ءناجىس نارسەلەر بولماسا ونى قولدانۋعا رۇقسات ەتىلەدى. ال قۇرامىندا ادام بالاسىنىڭ دەنساۋلىعىنا زيان بەرەتىن زاتتار بولسا (الكوگول، ءقاۋىپتى زاتتار، حارام، ءناجىس ت. ب. ) قولدانۋعا تىيىم سالىنادى.

«ەنەرگەتيكالىق سۋسىنداردى ءجيى قولدانۋ اعزاعا (جۇرەككە، جۇيكە جۇيەسىنە، قان قىسىمىنىڭ جوعارىلاۋىنا، قانت ديابەتىنە، سەمىزدىككە، اياق-قولدىڭ دىرىلىنە تاعى سول سياقتى) قاۋىپتى ەكەنى مەديتسينا تۇرعىسىنان ناقتىلانعان. سوندىقتان مۇسىلمان ادامعا مۇنداي سۋسىنداردان اۋلاق بولعانى دۇرىس»، - دەلىنگەن حابارلامادا.

شەشىم:

- سۋسىننىڭ قۇرامىندا شاريعاتتا تىيىم سالىنعان نارسەلەر بولماسا، ونى قولدانۋعا رۇقسات.

- الكوگولدى ەنەرگەتيكالىق سۋسىنداردى ءىشۋ - حارام.

- ەنەرگەتيكالىق سۋسىنداردى ءجيى قولدانۋدىڭ اعزاعا ءقاۋىپتى ەكەنى مەديتسينا تۇرعىسىنان ناقتىلانعان بولسا، ونى قولدانۋعا تىيىم سالىنادى.

ايتا كەتسەك، بىرەر كۇن بۇرىن ق م د ب قالىڭ مالدى ءماھىر دەپ ساناۋعا قاتىستى ءپاتۋا شىعارعان ەدى.

اۆتور
داۋلەت ىزتىلەۋ