ەنەرگەتيكا مينيسترلىگى سۇرانىسقا يە ماماندىقتارعا 1500 گرانت ءبولدى
استانا. KAZINFORM - ەنەرگەتيكا سالاسى بويىنشا مامانداردى دايارلاۋعا ارنالعان ءبىلىم بەرۋ گرانتتارى كونكۋرسىنا ءوتىنىش قابىلداۋ باستالدى.
2025 -جىلعى 13- شىلدەدەن باستاپ قازاقستان رەسپۋبليكاسىندا جوعارى جانە جوعارى وقۋ ورنىنان كەيىنگى ءبىلىم الۋعا ارنالعان ءبىلىم بەرۋ گرانتتارى كونكۋرسىنا وتىنىشتەر قابىلداۋ باستالدى.
- ەلىمىزدىڭ ەنەرگەتيكا سالاسىنىڭ بەلسەندى دامۋىنا جانە زاماناۋي تەحنولوگيالاردى قولداناتىن جاڭا ەنەرگيا ءوندىرۋشى نىسانداردىڭ پايدا بولۋىنا بايلانىستى جاڭا بۋىننىڭ بىلىكتى ماماندارىنا سۇرانىس ارتۋدا. اسىرەسە ەلەكتر جەلىلەرىن، گاز تۋربينالارىن، بۋ-گاز قوندىرعىلارىن جانە اتوم ەلەكتر ستانسيالارىن جوبالاۋ، قۇراستىرۋ جانە پايدالانۋعا بەرۋ سالالارىندا ماماندار قاجەت، - دەلىنگەن ەنەرگەتيكا مينيسترلىگى تاراتقان حابارلامادا.
2025/2026 وقۋ جىلىنا ارنالعان مەملەكەتتىك ءبىلىم بەرۋ باعدارلاماسى اياسىندا ەنەرگەتيكا سالاسىندا سۇرانىسقا يە تەحنيكالىق باعىتتار بويىنشا كەلەسى گرانتتار ءبولىندى:
«ەلەكتروتەحنيكا جانە ەنەرگەتيكا» باعىتى بويىنشا - 1000 گرانت،
«جىلۋەنەرگەتيكا» باعىتى بويىنشا - 500 گرانت (تولىق جانە قىسقارتىلعان وقۋ تۇرلەرىن قوسا العاندا).
ەنەرگەتيكا سالاسىن كادرلارمەن قامتاماسىز ەتۋ جەتەكشى سالالىق جوعارى وقۋ ورىندارى جانە وندىرىستىك كومپانيالارمەن تىعىز ىنتىماقتاستىقتا جۇزەگە اسىرىلادى. مۇنداي مودەل تۇلەكتەردىڭ ەڭبەك نارىعى تالاپتارىنا تەز بەيىمدەلۋىنە جانە ناقتى ەنەرگەتيكا نىساندارىنا جۇمىسقا ورنالاسۋىنا مۇمكىندىك بەرەدى.
ەنەرگەتيك ماماندىعىن ناسيحاتتاۋ جانە ونىڭ تارتىمدىلىعىن ارتتىرۋ ماقساتىندا «الماتينسكيە ەلەكتريچەسكيە ستانسي» ا ق جىل سايىن بولاشاق ماماندارعا قولداۋ كورسەتەدى. بيىل كومپانيا عۇماربەك داۋكەيەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىندە وقۋعا قوسىمشا 10 ءبىلىم بەرۋ گرانتىن ۇسىنادى.
ايتا كەتەلىك سۋ سالاسى ماماندىقتارىنا تۇسەتىن ستۋدەنتتەر ءۇشىن گرانت سانى %70- عا ارتقان ەدى.
