ەنەرگەتيكا ءمينيسترى قازاقستان اتىنان قىتايمەن ەنەرگەتيكالىق كەلىسىمگە قول قويادى
استانا. KAZINFORM - ەنەرگەتيكا مينيسترلىگى قازاقستان جانە قىتاي ۇكىمەتتەرىنىڭ اراسىنداعى جاڭارتىلاتىن ەنەرگيا كوزدەرىن سالۋعا باعىتتالعان ءىرى جوبالاردى ىسكە اسىرۋ تۋرالى كەلىسىمنىڭ جوباسىن جاريالادى.
كەلىسىم جامبىل، قاراعاندى، پاۆلودار، تۇركىستان وبلىستارىندا جەل جانە كۇن ەلەكتر ستانسالارىن سالۋعا ارنالعان بىرنەشە جوبانى قامتيدى. اتاپ ايتساق، جامبىل وبلىسىندا جالپى قۋاتى 1 گيگاۆاتت بولاتىن جەل ەلەكتر ستانسياسىن سالىپ، ىسكە اسىرۋدى كوزدەيتىن ءبىر جوبا بار.
بۇل جوبا قۋاتى 500 كيلوۆولت بولاتىن جامبىل قوسالقى ستانسياسىندا ءبىر تىزبەكتى قوس جەلى سالۋ ارقىلى جانە پاۆلودار وبلىسىندا 1150 كيلوۆولت بولاتىن، ەكىباستۇز قس ەلەكتر جەلىسىنە قوسىلاتىن ءبىر تىزبەكتى ەكى جەلى سالۋ ارقىلى ىسكە اسىرىلماق. جوباعا قىتاي تاراپىنان ديەۆەلوپەر رەتىندە China Power International Holding Limited كومپانياسى قاتىسسا، قازاقستان تاراپىنان تەڭ- ديەۆەلوپەر رەتىندە «سامۇرىق- ەنەرگو» ا ق ارنايى كومپانيا قۇرۋ ارقىلى قاتىسادى.
ەكىنشى جوبا قاراعاندى وبلىسىندا جالپى قۋاتى 500 مەگاۆاتت بولاتىن جەل ەلەكتر ستانسياسىن، تۇركىستان وبلىسىندا جالپى قۋاتى 300 مەگاۆات بولاتىن كۇن ەلەكتر ستانتسياسىن سالىپ، ىسكە اسىرۋعا ارنالعان. بۇل جوباعا قىتاي تاراپىنان ديەۆەلوپەر رەتىندە China Energy Overseas Investment Co Ltd. كومپانياسى، ال قازاقستان جاعىنان تەڭ- ديەۆەلوپەر رەتىندە «سامۇرىق-ەنەرگو» ا ق ارنايى كومپانيا قۇرىلاتىن كومپانيا قۇرۋ ارقىلى قاتىسادى. كەلىسىم جوباسىنىڭ ماتىنىندە وسى جوبالار اياسىندا قۇرىلاتىن قارجى-ەسەپ ايىرىسۋ ورتالىعى سالىنعان نىسانداردان وندىرىلگەن ەلەكتر ەنەرگياسىن 25 جىل بويى ساتىپ الاتىنى ايتىلعان.
«ديەۆەلوپەرلەر ءۇشىن بەكىتىلگەن تاريف شەتەل ۆاليۋتاسىمەن نوميناتسيالانۋعا ءتيىس»، - دەلىنگەن كەلىسىم جوباسىندا.
ال جوبالاردىڭ قۇجاتتاماسى بويىنشا كوزدەلگەن تولەمنىڭ ءبارى سول كۇنگى ايىرباس باعامى بويىنشا تەڭگەمەن جاسالادى.
«ءىرى جوبالاردىڭ تاراپتارى ۆاليۋتانى ايىرباستاۋعا شەكسىز قۇقىلى. سونداي-اق قۇجاتتامادان تۋىندايتىن ۆاليۋتالىق مىندەتتەمەلەردى شەكتەۋسىز اتقارۋعا، شەتەل ۆاليۋتاسىمەن ديۆيدەندتەر الۋعا قۇقىلى. ديەۆەلوپەرلەر جوباعا قاجەتتى جانە وزدەرىنە قولايلى جەر تەلىمدەرىن پايدالانۋ قۇقىعىن كونكۋرس (اۋكسيون) وتكىزبەي، تىكەلەي ءتيىستى مەملەكەتتىك ورگانداردان الادى»، - دەلىنگەن قۇجاتتا.
اۆتور
ەسىمجان ناقتىباي
