نۇرلان سماعۇلوۆ سۋ تاسقىنىنان زارداپ شەككەندەرگە كومەك رەتىندە 6,1 ميلليارد تەڭگە جىبەردى
استانا. KAZINFORM - Astana Group قۇرامىنا كىرەتىن كومپانيالار مەن نۇرلان سماعۇلوۆ قورى ءبارىن قوسقاندا سۋ تاسقىنىنان زارداپ شەككەندەرگە كومەك كورسەتۋ ءۇشىن 6,1 ميلليارد تەڭگە كولەمىندە قاراجات ءبولدى.
نۇرلان سماعۇلوۆ قورى سۋ تاسقىنىنان زارداپ شەككەندەرگە كومەك كورسەتۋ ءۇشىن 5,6 ميلليارد تەڭگە مولشەرىندە اقشالاي قاراجات بولىنگەنىن مالىمدەدى. قاراجات ومىرلىك ماڭىزى بار ينفراقۇرىلىمدى قالپىنا كەلتىرۋ جانە ۇيلەرى سۋ تاسقىنى ناتيجەسىندە بۇلىنگەن نەمەسە قيراعان ادامداردى تۇرعىن ۇيلەرمەن قامتاماسىز ەتۋ ءۇشىن باتىس قازاقستان وبلىسىنا جىبەرىلدى.
«قازاقستان وڭىرلەرىندەگى اۋقىمدى تاسقىن ەلىمىز ءۇشىن ناعىز سىن- قاتەر بولدى. قازاقستاندىقتار ت ج كەزىندە بىرىگىپ، قيىندىققا تاپ بولعان ادامدار مەن جانۋارلارعا كومەك كورسەتە وتىرىپ، وزدەرىن جاقسى جاعىنان تانىتتى. سۋ تاسقىنى جاعدايى مەملەكەت باسشىسى قاسىم-جومارت توقايەۆتىڭ ەرەكشە باقىلاۋىندا. ءبىزدىڭ كومپانيالارىمىزدىڭ توبى زارداپ شەككەن وڭىرلەرگە اقشالاي قاراجات اۋدارىپ، گۋمانيتارلىق كومەك جىبەرىپ، قيىن-قىستاۋ كەزەڭدە العاشقى كۇندەردەن باستاپ ات سالىستى. ءبىز جاڭالىقتاردى مۇقيات قاراپ ءجۇرمىز، قازىر سۋ شەگىنىپ جاتىر جانە جاعداي تۇراقتانادى دەپ ۇمىتتەنىپ ايتامىز. ءبىراق الدا ادامداردى قالىپتى ومىرگە قايتارۋ بويىنشا ۇلكەن جۇمىس كۇتىپ تۇر. ءبىز قورىمىز ارقىلى 5,6 ميلليارد تەڭگە ءبولۋدى شەشتىك. بۇل قاراجات قازاقستاندىقتاردىڭ يگىلىگىنە جۇمسالسىن»، - دەدى كاسىپكەر ءارى مەتسەنات نۇرلان سماعۇلوۆ.
نۇرلان سماعۇلوۆ - «استانا موتورس» كومپانيالارىن، MEGA س و و جەلىسىن جانە Mycar.kz كومپانيالار توبىن قامتيتىن Astana Group نەگىزىن سالۋشى.
2024 -جىلعى 1-ساۋىردە «استانا موتورس» كومپانياسى 500 ميلليون تەڭگە مولشەرىندە تاسقىننان زارداپ شەككەن ادامدار ءۇشىن كومەكتى العىشقىلاردىڭ ءبىرى بولىپ اۋداردى.
سونىمەن قاتار «استانا موتورس»، MEGA س و و، Mycar.kz قىزمەتكەرلەرى ءوز باستاماسىمەن 10 ميلليون 421 مىڭ تەڭگە مولشەرىندە قاراجات جيناپ بەردى، بۇل اقشاعا ازىق-تۇلىكتەر مەن العاشقى قاجەتتىلىك زاتتارى ساتىپ الىندى. گۋمانيتارلىق كومەك اقمولا وبلىسىنىڭ اتباسار اۋدانىنا جىبەرىلدى.
«استانا موتورس» قۇرامىنا كىرەتىن Chery برەندى قىتايلىق Chery International كومپانياسىمەن بىرلەسە وتىرىپ، سولتۇستىك قازاقستان وبلىسىنا 50 ميلليون تەڭگەگە بالامالى گۋمانيتارلىق كومەك جىبەردى.
اۆتور
اسحات رايقۇل
