نۇرلان جاقىپوۆ «لۋكويلدىڭ» سانكسياعا ىلىگۋىنە قاتىستى پىكىر ءبىلدىردى

استانا. KAZINFORM - «سامۇرىق-قازىنا» ا ق باسقارما ءتوراعاسى نۇرلان جاقىپوۆ «لۋكويلدىڭ» سانكسياعا ىلىگۋىنە قاتىستى پىكىرىن ايتتى.

- تاياۋدا «لۋكويلدىڭ» سانكسيالىق تىزىمگە ىلىككەنى تۋرالى جاڭالىق شىقتى. وتە كۇردەلى ماسەلە. قازىرگى ۋاقىتتا ءتيىستى كونسۋلتانتتارمەن، ونىڭ ىشىندە حالىقارالىق تا كونسۋلتانتتارمەن «قازمۇنايگازدىڭ» اتالعان جاعدايدان قالاي شىعاتىنىنا قاتىستى اۋقىمدى جۇمىس جۇرگىزىلىپ جاتىر، - دەدى ول اقوردادا ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، «لۋكويل» قازاقستاندا 30 جىلدان استام ۋاقىتتان بەرى جۇمىس ىستەيدى. ەلىمىزدە رەسەيلىك كومپانيانىڭ ۇلكەن جوبالارى بار. ول «تەڭىز»، «قاراشىعاناق»، «قالامقاس- حازار» سىندى كەن ورىندارىنىڭ اكسيونەرى سانالادى.

- بۇل وتە كۇردەلى ماسەلە. ءبىر جاعىنان قازاقستان ءۇشىن، «قازمۇنايگاز» ءۇشىن «لۋكويل» سەنىمدى سەرىكتەس سانالادى. ەكىنشى جاعىنان ءبىز - زاڭناماعا، سالىنعان سانكسيالىق شارالارعا ساي جۇمىس ىستەيتىن ادال كورپوراتيۆتى ازاماتپىز. سول سەبەپتى تاياۋدا سانكسيالىق شەكتەۋلەردى ەسكەرە وتىرىپ، بۇل باعىتتاعى جۇمىستى ودان ارى قاراي جالعاستىرۋعا قاتىستى ناقتى شەشىمدەر ازىرلەيمىز، - دەدى نۇرلان جاقىپوۆ.

بۇعان دەيىن ەنەرگەتيكا ۆيتسە-ءمينيسترى سانجار جاركەشوۆ ۇكىمەت وتىرىسىنان كەيىن ءوتىپ جاتقان باسپا ءسوز ءماسليحاتىندا سانكتسياعا تۇسكەن «لۋكويلدىڭ» قازاقستانداعى جوبالارى تۋرالى پىكىر ءبىلدىردى.

ايتا كەتەيىك، 22 -قازاندا ا ق ش سانكسياسىنا تۇسكەن «لۋكويل» كومپانياسى وزگە ەلدەردەگى ۇلەسىن جاپپاي ساتاتىنى حابارلاندى.