نۇربەك ورالبايدىڭ قارسىلاسى حيجنياك تۋرالى نە بىلەمىز؟
استانا. قازاقپارات - تامىزدىڭ سەگىزىنە قاراعان ءتۇنى 80 كەلىدە باق سىنايتىن نۇربەك ورالباي ۋكراينالىق بوكسشى الەكساندر حيجنياكپەن جەكپە-جەك وتكىزەدى.
ورالبايدىڭ قارسىلاسى الەكساندر حيجنياك دەگەن كىم؟
الەكساندر حيجنياك ۋكراينانىڭ پولتوۆا قالاسىندا دۇنيەگە كەلگەن. 29 جاستاعى ۋكراينالىقتىڭ بويى 182 سانتيمەتر. الداعى قارسىلاسى نۇربەك ورالبايدان 5 سانتيمەترگە قىسقا. سپورتشى مانسابىن 2011 -جىلى كوكتەمدە باستاعان. وسى ۋاقىتقا دەيىن 160 جەكپە-جەك وتكىزگەن.
حيجنياك - ءوز ەلىنىڭ سپورت شەبەرى، 2020 -جىلعى توكيو وليمپياداسىنىڭ كۇمىس جۇلدەگەرى جانە 2017 -جىلى الەم چەمپيونى اتانعان. 2019 جانە 2023 -جىلى ەۋروپانىڭ ەكى دۇركىن چەمپيونى بولعان. سونداي-اق اۋەسقويلار اراسىنداعى حالىقارالىق جانە رەسپۋبليكالىق چەمپيوناتتاردىڭ بىرنەشە دۇركىن جەڭىمپازى.
وليمپيادانىڭ 1/8 كەزدەسۋىندە حيجنياك ۆەنگريا اتىنان سىنعا تۇسەتىن فيليپپ اكيلوۆتى تورەشىلەردىڭ شەشىمىمەن 29:27، 30:26، 28:28، 29:27، 30:26 ەسەبىمەن جەڭدى. شيرەك فينالدا برازيليالىق ۆاندەرلەي دە سوۋزا پەرەيرا باق سىناسىپ، ايلاسىن اسىردى. سونداي-اق الەكساندر حيجنياك جارتىلاي فينالدا ەكى دۇركىن وليمپيادا چەمپيونى كۋبالىق ارلەن لوپەسپەن باسىم ءتۇستى.
ورالبايدىڭ ءومىر جولى
نۇربەك ورالباي 2000 -جىلى 11-ماۋسىمدا استانا قالاسىندا ومىرگە كەلگەن. بويى - 187 سانتيمەتر. بوكستان قازاقستان ۇلتتىق قۇراماسىنىڭ مۇشەسى، الەم چەمپيونى (2023)، ازيا چەمپيوناتىنىڭ قولا جۇلدەگەرى (2022)، قازاقستان چەمپيونى (2021)، قازاقستان چەمپيوناتىنىڭ كۇمىس جۇلدەگەرى ( 2020)، جاستار اراسىنداعى الەم چەمپيونى (2018)، سونداي-اق جاستار اراسىنداعى ازيا چەمپيوناتىنىڭ كۇمىس جۇلدەگەرى (2018).
پاريجدەگى العاشقى كەزدەسۋدە نۇربەك ورالباي اۋستراليالىق كاللۋم پيتەرسپەن جۇدىرىقتاستى. جەكپە-جەك نۇربەك كۇشىن اۋىر ءوتتى. تورەشىلەردىڭ شەشىمىمەن وتانداسىمىز 3:2 ەسەبىمەن جەڭدى. كەيىن ورالباي ازەربايجان بوكسشىسى مۋراد اللاحۆەرديەۆتەن ايلاسىن اسىرىپ، جارتىلاي فينالعا جولداما الدى. ال، فينال ءۇشىن كۇرەستە ونىڭ قارسىلاسى 23 جاستاعى دومينيكاندىق كريستيان پينالەس بولدى. جەرلەسىمىز 3 راۋند بويى باسىمدىق تانىتىپ، 3:2 ەسەبىمەن ۇتتى.
ايتا كەتەيىك، نۇربەك ورالباي مەن الەكساندر حيجنياكتىڭ جەكپە-جەگى تامىزدىڭ سەگىزىنە قاراعان ءتۇنى 01:51-دە وتەدى.
BAQ. KZ
