قازاقستان-قىتاي شەكاراسىنداعى «نۇر جولى» وتكىزۋ بەكەتىندەگى شۋ نەدەن شىقتى؟

كەشە «اتامەكەن» ۇلتتىق كاسىپكەرلەر پالاتاسى باسشىسىنىڭ ورىنباسارى تيمۋر جاركەنوۆ مالىمدەمە جاساپ، بىرنەشە كۇننەن بەرى قازاقستان-قىتاي شەكاراسىندا ونداعان جۇك كولىكتەرىنىڭ قاڭتارىلىپ تۇرعانىن ايتقان بولاتىن. ماسەلەگە وراي Kazinform ءتىلشىسى جەتىسۋ وبلىسى، پانفيلوۆ اۋدانىنىڭ اكىمدىگى مەن مەملەكەتتىك كىرىستەر دەپارتامەنتىنە حابارلاستى.

ءمالىم بولعانداي، قازىر جەتىسۋ وبلىسىنىڭ پانفيلوۆ اۋدانى اۋماعىندا ورنالاسقان «نۇر جولى» وتكىزۋ بەكەتىندە جۇك كولىكتەرىنىڭ كەپتەلىسى جوق.

- شەكارا اشىق، وتكىزۋ پۋنكتتەرىنىڭ جۇمىسى قالىپتى رەجيمدە. كەيبىر تالاپتار بويىنشا شەكتەۋ ەنگىزىلگەن تاۋار تۇرلەرىن تەكسەرۋ ءۇشىن قوسىمشا ۋاقىت ءبولىنىپ، كاسىپكەرلەرگە ەسكەرتىلەتىن جاعدايلار بولۋى مۇمكىن. مۇنداي جاعدايدا مەملەكەتتىك كىرىس كوميتەتى تۇسىنىك بەرەدى. ول اۋداننىڭ قۇزىرەتىنە كىرمەيدى. كومەك سۇراعان كولىك جۇرگىزۋشىلەرىنە ىستىق تاماق، جاتىن ورىن ۇيىمداستىرىپ بەرۋگە اۋدان بيلىگى دايىن، - دەيدى پانفيلوۆ اۋدانىنىڭ اكىمدىگىنىڭ رەسمي وكىلى نۇربول قاناعات.

ال مەملەكەتتىك كىرىستەر كوميتەتى تاراتقان رەسمي مالىمدەمەدە قازىرگى ساتتە «نۇر جولى» كەدەن بەكەتىندە اۆتوكولىكتەردىڭ كەزەك كۇتىپ تۇرماعانى ايتىلعان. وتكەن مەرەكە كۇندەرىندە، ياعني، 15-18- جەلتوقسان ارالىعىندا، شەكارا ۋاقىتشا جابىلعان بولاتىن. كاسىپكەرلەرمەن اراداعى داۋ وسىدان كەيىن باستالعان بولۋى مۇمكىن ەكەن.

-قازىرگى ساتتە وتكىزۋ پۋنكتتەرى تاۋلىك بويىنا جۇمىس ىستەۋگە كوشىرىلدى. بۇل جاڭا جىل الدىندا تاۋار تاسىمالىن ارتتىرۋ ءۇشىن جاسالدى. الداعى كۇندەرى دە شەكارا ۋاقىتشا جابىلاتىنىن كاسىپكەرلەر نازارىنا جەتكىزىپ، تۇسىنىستىك تانىتۋلارىن سۇرايمىز، - دەلىنگەن ەلىمىزدىڭ مەملەكەتتىك كىرىستەر كوميتەتى تاراتقان مالىمدەمەدە.

ەسكە سالا كەتەيىك، كەشە «اتامەكەن» ۇلتتىق كاسىپكەرلەر پالاتاسى باسشىسىنىڭ ورىنباسارى تيمۋر جاركەنوۆ مالىمدەمە جاساپ، قىتايمەن اراداعى شەكارا بەكەتىندە 17 جۇك كولىگى وتە الماي تۇرعانىنا ون ءبىر كۇن بولعانىن ايتقان بولاتىن. سپيكەر ءوز سوزىندە مۇنداي وقيعالاردىڭ ءجيى قايتالاناتىنىن، مەملەكەتتىك كىرىستەر كوميتەتى قىزمەتكەرلەرى تاراپىنان جۇرگىزىلەتىن تەكسەرۋلەردىڭ ۇزاق جاسالاتىنىن جانە بۇل كاسىپكەرلەردىڭ زيان شەگۋىنە اكەلەتىنىن دە تىلگە تيەك ەتتى.

اۆتور

قالماحانبەت مۇقامەتقالي