گەننادي گولوۆكين موڭعوليالىق ارىپتەسمەن كەزدەستى
استانا. KAZINFORM - سينگاپۋردا ءوتىپ جاتقان سۋ سپورت تۇرلەرى بويىنشا الەم چەمپيوناتى اياسىندا قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين مەن موڭعوليا ۇلتتىق وليمپيادالىق كوميتەتىنىڭ باسشىسى باتۋشيگ باتبولدتىڭ جۇمىس كەزدەسۋى ءوتتى.
ايتا كەتەيىك، باتۋشيگ باتبولد - حالىقارالىق وليمپيادالىق كوميتەتىنىڭ (ح و ك) مۇشەسى جانە ازيا وليمپيادالىق كەڭەسىنىڭ (ا و ك) مادەنيەت جانە ءبىلىم جونىندەگى كوميسسياسىنىڭ ءتوراعاسى.
ق ر ۇ و ك مالىمەتىنشە، سينگاپۋرداعى كەزدەسۋدە تاراپتار ەكى ەلدىڭ وليمپيادالىق كوميتەتتەرى اراسىنداعى ىنتىماقتاستىقتى دامىتۋعا قاتىستى ءبىرقاتار ماسەلەنى تالقىلادى. اتاپ ايتقاندا، بىرلەسكەن جارىستار وتكىزۋ، سپورتشىلاردى دايىنداۋدا كاسىبي تاجىريبە الماسۋ، سونداي-اق وليمپيادالىق قوزعالىس اياسىنداعى ءبىلىم بەرۋ باستامالارىن جۇزەگە اسىرۋ ارقىلى ەكىجاقتى سەرىكتەستىكتى تەرەڭدەتۋ مۇمكىندىكتەرى قاراستىرىلدى.
موڭعوليا تاراپى بيىلعى قىركۇيەك ايىندا قازاقستانعا ساپارمەن كەلۋگە قىزىعۋشىلىق ءبىلدىردى. جوسپار بويىنشا دەلەگاتسيا الماتى جانە استانا قالالارىنداعى نەگىزگى سپورتتىق نىسانداردى ارالاپ، الداعى ۋاقىتتا موڭعوليادا وسىنداي كەشەندەردى سالۋ كەزىندە قازاقستاندىق تاجىريبەنى قولدانۋدى كوزدەپ وتىر.
كەزدەسۋ سوڭىندا تاراپتار وليمپيادالىق قوزعالىستىڭ ورتاق قۇندىلىقتارىن ىلگەرىلەتۋ، حالىقارالىق ىنتىماقتاستىقتى نىعايتۋ جانە سپورتتىق ينفراقۇرىلىمدى دامىتۋعا باعىتتالعان جوبالاردى بىرلەسىپ جۇزەگە اسىرۋ ءۇشىن سەرىكتەستىكتى جالعاستىرۋعا نيەتتى ەكەنىن راستادى.
