گەننادي گولوۆكين ۇلتتىق وليمپيادا كوميتەتىنىڭ پرەزيدەنتى بولىپ سايلاندى
استانا. KAZINFORM - ەسىمى الەمگە تانىمال كاسىپقوي بوكسشى گەننادي گولوۆكين قازاقستان ۇلتتىق وليمپيادا كوميتەتىنىڭ پرەزيدەنتى بولىپ سايلاندى.
ول بۇل قىزمەتتە تيمۋر قۇلىبايەۆتىڭ ورنىن باسىپ وتىر. شەشىم بۇگىن ۇ و ك باس اسسامبلەياسىنىڭ وتىرىسى بارىسىندا قابىلداندى.
سپورت الەمىندە GGG لاقاپ اتىمەن تانىمال بولعان گەننادي گولوۆكين شارشى الاڭدا شاشاسىنا شاڭ جۇقتىرماي، اۋەسقوي دا، كاسىپقوي دا بوكستا ءوزىنىڭ ۇرىس مانەرىمەن، ەرەكشە ستيلىمەن ميلليونداعان جانكۇيەردىڭ سۇيىكتى سپورتشىسىنا اينالعان.
«اكەم - ورىس، شەشەم - كارىس، ال ءوزىم - قازاقپىن» دەيتىن گەننادي گولوۆكين 1982-جىلدىڭ 28-اقپانىندا قاراعاندى قالاسىندا دۇنيەگە كەلگەن. ول تۇرعان مايقۇدىق اۋدانى سول ۋاقىتتاردا قىلمىس ءورشىپ تۇرعان قاۋىپتى ايماق سانالاتىن. ءدال وسى جايت بالا گەنانىڭ سپورتپەن اينالىسۋىنا دا سەبەپ بولعانداي.
ول اۋەسقوي بوكستا 350 جەكپە-جەك وتكىزىپ، ونىڭ 345 ىندە جەڭىسكە جەتتى. ەش ۋاقىتتا نوكاۋت تۇرماق نوكداۋنعا دا ءتۇسىپ كورگەن جوق. گەننادي اۋەسقوي بوكستا ازيا، الەم چەمپيوناتتارىندا توپ جاردى. الايدا، وليمپيادا چەمپيونى بولا المادى، كۇمىس مەدالدى قاناعات تۇتتى. ول 2004-جىلى افينادا وتكەن وليمپيادا ويىندارى بولاتىن. ءدال وسى جازعى ويىندارعا گولوۆكين قازاققا ۇنەمى التىن مەدال سىيلاپ كەلگەن 69 كەلى سالماق ساناتىندا بارۋى ءتيىس ەدى. دەگەنمەن، ول 75 كەلىگە اۋىسىپ، ال 69 كەلى سالماقتا ەل ءۇمىتى باقتيار ارتايەۆقا ارتىلعان بولاتىن. وسى وليمپيادادا باقتيار ارتايەۆ چەمپيون اتانسا، گەننادي گولوۆكين كۇمىس جۇلدەگەر اتاندى. دەگەنمەن، ءالى كۇنگە دەيىن ءدال وسى جەكپە-جەككە قاتىستى داۋ كوپ. كوپشىلىك گەنناديدىڭ سول ۋاقىتتا رەسەيلىك گايداربەك گايداربەكوۆتەن جەڭىلمەگەنىن ايتادى. گەنانىڭ ءوزى دە سول جەكپە-جەكتە جەڭىلمەگەندىگىنە سەنىمدى.
«مەن ازيا، الەم ويىندارىنىڭ چەمپيونى بولدىم. 2004-جىلى افينادا وتكەن وليمپيادا ويىندارىنىڭ التىن مەدالىنە لايىقتى بولدىم دەپ سانايمىن. ءدال سول ۋاقىتتاعى جايت اۋەسقوي بوستان تۇڭىلىۋىمە سەبەپ بولدى»، - دەگەن ەدى سول جەكپە-جەككە قاتىستى سپورتشى L'Equipe باسىلىمىنا بەرگەن سۇحباتىندا.
ءبىر جىلدان كەيىن گەننادي گولوۆكين اۋەسقوي سپورتپەن قوش ايتىسىپ، كاسىپقوي بوكسقا بەت بۇردى.
گەننادي گولوۆكيننىڭ اۋەسقوي بوكستاعى جەتىستىكتەرى:
2000-جىل –جاس ءوسپىرىم اراسىنداعى الەم چەمپيوناتىندا جارتىلاي سالماقتا چەمپيون؛
2001-جىلى - شىعىس ازيا ويىندارىندا جارتىلاي سالماقتا چەمپيون؛
2002-جىلى - استانادا وتكەن بوكستان الەم چەمپيوناتىندا چەمپيون؛
2002-جىلى - ازيا ويىندارىنىڭ چەمپيونى؛
2003-جىلى - بانگكوگتە وتكەن الەم چەمپيوناتىنىڭ چەمپيونى؛
2004-جىلى - ازيا چەمپيوناتىنىڭ چەمپيونى؛
2004-جىلى - افينادا وتكەن وليمپيادا ويىندارىنىڭ كۇمىس جۇلدەگەرى.
گەننادي گولوۆكين 2005-جىلدان بەرى وسى ۋاقىتقا دەيىن كاسىپقوي بوكستا 45 جەكپە-جەك وتكىزدى.
ونىڭ 37 ءسىن نوكاۋتپەن اياقتاسا، ءبىر جەكپە-جەگىندە تەڭ ءتۇسىپ، ەكى جەكپە-جەگىندە ۇپاي سانىمەن جەڭىلىپ قالدى.
ول كاسىپقوي بوكستاعى العاشقى جەكپە-جەگىن 2006-جىلدىڭ مامىرىندا گابور بالوگقا قارسى وتكىزىپ، ونى ءبىرىنشى راۋندتا-اق نوكاۋتقا جىبەردى. وسىدان كەيىن گەنانىڭ جۇلدىزدى ءساتى تۋدى.
WBA نۇسقاسى بويىنشا ورتاشا سالماقتا الەم چەمپيونى اتاعىن 8 مارتە، IBO نۇسقاسى بويىنشا ورتاشا سالماقتا الەم چەمپيونى اتاعىن 5 رەت قورعادى. كاسىپقوي بوكس تاريحىندا ورتاشا سالماق بويىنشا نوكاۋت بويىنشا 89 پايىزدىق ۇلەسپەن ءبىرىنشى ورىنعا دا شىقتى.
گەننادي گولوۆكين سپورتتىق مانساپ جولىندا ەكىنشى ورتا سالماقتاعى الەمنىڭ ابسوليۋتتىك چەمپيونى ساۋل الۆارەسپەن ءۇش مارتە كەزدەستى.
ەستە بولسا، 2017-جىلدىڭ قىركۇيەگىندە گولوۆكين مەن «كانەلو» كەزدەسۋى تەڭ اياقتالدى. ال ءبىر جىلدان كەيىن، ياعني 2018-جىلدىڭ قىركۇيەگىندە ساۋل الۆارەس تورەشىلەر شەشىمىمەن گەنادان باسىم تۇسكەن بولاتىن. ەكى سپورت جۇلدىزىنىڭ اراسىنداعى ءۇشىنشى كەزدەسۋ دە وتانداسىمىزدىڭ پايداسىنا شەشىلگەن جوق.
اۆتور
مارلان جيەمباي
