گەننادي گولوۆكين 2028 -جىلعى وليمپيادا ويىندارىنىڭ ۇيىمداستىرۋ كوميتەتىنە باردى
استانا. KAZINFORM - قازاقستاننىڭ ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين جۇمىس ساپارىمەن لوس-اندجەلەستەگى (ا ق ش) 2028 -جىلعى وليمپيادا ويىندارىنىڭ ۇيىمداستىرۋ كوميتەتىنە باردى. بۇل تۋرالى ق ر ۇ و ك مالىمدەدى.
كەزدەسۋ اياسىندا ويىندارعا قاتىساتىن سپورتشىلارعا جاسالاتىن جاعدايلار، سونىمەن بىرگە قازاقستان مەن اقش اراسىنداعى سپورت سالاسى بويىنشا ىنتىماقتاستىق مۇمكىندىكتەرى تالقىلاندى.
ناقتىراق ايتقاندا، وليمپيادالىق ينفراقۇرىلىم جانە ۇيىمداستىرۋ كوميتەتى سپورتشىلارعا ۇسىنىپ وتىرعان جاعدايلار تاقىرىبىنا نازار اۋدارىلدى. قازاقستان ۇ و ك باسشىسى الداعى وليمپيادا ويىندارى تاريحتاعى ماڭىزدى كەزەڭ بولاتىنىنا جانە حالىقارالىق سپورتتىق بايلانىستاردى نىعايتۋعا سەپتىگىن تيگىزەتىنىنە سەنىم ءبىلدىردى.
«لوس-اندجەلەستەگى وليمپيادا ويىندارىن ۇيىمداستىرۋ كوميتەتىنە ۋاقىت ءبولىپ، مۋلتيسپورتتىق وقيعانى وتكىزۋگە قاتىستى وزەكتى ءارى مازمۇندى اقپارات ۇسىنعانىنا العىس بىلدىرەمىز. ۇيىمداستىرۋ كوميتەتىنە كەلگەنىمىز ءبىزدىڭ ناتيجەلى ىنتىماقتاستىق ورناتۋعا دايىن ەكەنىمىزدى بىلدىرەدى»، - دەدى گەننادي گولوۆكين.
الداعى وليمپيادا ويىندارىنىڭ ۇيىمداستىرۋ كوميتەتى قازاقستان دەلەگاتسياسىنا جارىستار كەزىندە قولدانىلاتىن باستى ينفراقۇرىلىم نىساندارىن، ونىڭ ىشىندە وليمپيادا اۋىلى مەن سپورتتىق ارەنالاردى كورسەتتى.
2028 -جىلعى لوس-اندجەلەستەگى وليمپيادا ويىندارىنىڭ وكىلدەرى ءىرى سپورتتىق شارالاردى ۇيىمداستىرۋداعى تاجىريبەسىن ءبولىسىپ، بۇل پروتسەسسكە ەنگىزىلگەن يننوۆاتسيالارعا نازار اۋداردى.
قازاقستان ۇلتتىق وليمپيادا كوميتەتى الداعى وليمپيادانىڭ ۇيىمداستىرۋ كوميتەتىمەن ىنتىماقتاستىقتى جالعاستىرادى.
ايتا كەتەيىك، گولوۆكين قازاقستان بوكسشىلارىن ازيا چەمپيوناتىنا دايىنداۋ ءۇشىن ءوزىنىڭ باپكەرىن شاقىرعان بولاتىن.
