نەمىس دارىگەرلەرى ەربايان مۇحتاردىڭ اياعىنان تۇرۋىنا 80-85 پايىز ءۇمىت ارتىپ وتىر
استانا. KAZINFORM - بىرنەشە اي كومادا جاتىپ، ەسىن جيعان سارباز ەربايان مۇحتاردى گەرمانياعا اپارىپ ەمدەيدى. بۇل تۋرالى مۇگەدەك بولىپ قالعان جىگىتتىڭ اكەسى حاميت ايماعامبەتوۆ ءمالىم ەتتى.
«بالامدى ەمدەتۋ ءۇشىن كلينيكانى گەرمانيادان تاڭداپ وتىرمىز، ءبىراق قانداي كلينيكا، قايدا اپارامىز اشىق ايتقىمىز كەلمەيدى، اقپاراتتى بارعان سوڭ تاراتامىز. گەرمانيانىڭ مىقتى دەگەن 2-3 كلينيكاسى قابىلدايمىز دەپ وتىر، بۇگىن دەنساۋلىق ساقتاۋ مينيسترىمەن كەزدەسۋدە بالانى جەتكىزۋ جاعىن سۇرادىم. حالىق جيناعان قارجىنىڭ جارتىسى جول شىعىنىنا كەتەيىن دەپ تۇر، ەمگە جەتپەي قالادى، ءبىز سول ءۇشىن الاڭداپ وتىرمىز»، - دەدى ەربايان مۇحتاردىڭ اكەسى حاميت ايماعامبەتوۆ ەلوردادا وتكەن بريفينگ بارىسىندا.
سونىمەن قاتار ساربازدىڭ اكەسى نەمىس دارىگەرلەرىنىڭ ەرباياندى 2-3 ايدىڭ ىشىندە ءبىر قالىپقا كەلتىرەتىندەرىنە كەپىلدىك بەرىپ وتىرعانىن ايتتى.
«دارىگەرلەر ەرباياننىڭ اياعىنان تۇرۋىنا %80-85 ءۇمىت بار دەپ وتىر. جالپى جاعدايى ءبىرقالىپتى، جامان ەمەس، ءبىراق كەشە تالماسى ۇستاپ قالدى، نەمىس پروفەسسورلارىنان كونسۋلتاتسيا الىپ وتىرمىز»، - دەيدى ول.
بۇعان دەيىن كومادا بولعان ساربازدىڭ اكەسى قازىر ەرباياننىڭ دەنساۋلىق جاعدايى شەتەلگە اپارۋعا جاراماي تۇرعانىن ايتقان ەدى.
ەسكە سالا كەتەيىك، اسكەردە ءجۇرىپ، مۇگەدەك بولىپ قالعان ساربازدى ۇلتتىق ۇلاننىڭ قولباسشىلىعى شەت ەلدە ەمدەتپەكشى.
سونداي-اق، ۇلتتىق ۇلان بولىمشەسىندە مەرزىمدى اسكەري قىزمەت اتقارعان ەربايان مۇحتاردىڭ كوماعا تۇسۋىنە جاناما اۋرۋلار سەبەپ بولعانى ايتىلدى.
