نەمەرە باققان اتا-اجەلەرگە اقشا تولەنەدى

استانا. KAZINFORM - شۆەتسيادا اتا-اجەلەرى نەمەرەلەرىن باققانى ءۇشىن مەملەكەتتەن اقشالاي جاردەماقى الۋدا. ءتيىستى زاڭ بيىل جازدا كۇشىنە ەندى، دەپ حابارلايدى euronews.

بارلىق اكىمشىلىك دەمارشتاردى شۆەتسيانىڭ الەۋمەتتىك ساقتاندىرۋ اگەنتتىگى شەشۋدە. بۇل - وتباسىلار ءۇشىن ۇلكەن كومەك.

شۆەتسيادا بالا كۇتىمىنە ارنالعان دەمالىس تۋرالى جاڭا ەرەجەگە ساي، اتا-انالارعا 45 كۇنگە دەيىن اقىلى دەمالىسىن بالانىڭ زاڭدى قامقورشىسى ەمەس ادامعا اۋدارۋعا مۇمكىندىك بەرىلەدى. جالعىزباستى اتا-انالار ءبىر بالاعا 480 كۇندىك اقىلى دەمالىستىڭ 90 كۇنىن اۋدارا الادى.

شۆەتسيانىڭ الەۋمەتتىك ساقتاندىرۋ اگەنتتىگى وكىلىنىڭ ايتۋىنشا، جاڭا زاڭ اتا-انالاردىڭ جۇمىس پەن جەكە ءومىرى اراسىنداعى تەپە-تەڭدىكتى جاقسارتۋعا جانە گەندەرلىك تەڭدىكتى نىعايتۋعا باعىتتالعان. زاڭدى ۇسىنعان مينيستر شۆەتسيا بۇكىل ەۋروپاعا ۇلگى بولادى دەپ ۇمىتتەنەدى.

«بۇل بۇكىل ەۋروپا ءۇشىن جاقسى ۇلگى بولا الادى دەپ ويلايمىز. وسىلايشا جاستاردى بالالى بولۋعا، سونىمەن بىرگە ەڭبەك نارىعىندا قالىپ، بەلسەندى جۇمىس جۇرگىزۋگە ىنتالاندىرۋعا بولادى»، - دەدى ەلدىڭ الەۋمەتتىك قامتاماسىز ەتۋ ءمينيسترى اننا تەنە.

الەۋمەتتىك ساقتاندىرۋ اگەنتتىگىنىڭ اگەنتتىككە حابارلاۋىنشا، تامىز ايىنىڭ سوڭىنا قاراي 1500 گە جۋىق شۆەد ازاماتى جاڭا زاڭ ۇسىنعان مۇمكىندىكتەردى پايدالاندى.