نەلىكتەن كەيبىر ەلدىڭ پاسپورتى باسقالارعا قاراعاندا كۇشتىرەك؟ - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
بۇل جۇمباق يراندىق قامال ءسىزدى كونە زامانعا جەتەلەيدى - ParsToday
رۋدحان فۋمان قامالى گيلان وبلىسىنداعى كوپتەگەن تۋريستى قىزىقتىراتىن ورىنداردىڭ ءبىرى، دەپ جازدى ParsToday اقپارات اگەتتىگى.
يراندىق باسىلىمنىڭ دەرەگىنشە، رۋدحان قامالى ۇزىن قابىرعالارى مەن تىلسىم دا ايبىندى قۇرىلىمىمەن «مىڭ قادام» سارايى ستراتەگيالىق ورنالاسۋىنا بايلانىستى ەشبىر شايقاستا باعىندىرىلماعان ەسكى قورعانىس عيماراتى.
ParsToday يراننىڭ سولتۇستىگىندەگى گيلان وبلىسىنداعى وسى بەرىك جانە تۇراقتى تاريحي تارتىمدىلىق تۋرالى توقتالادى.
رۋدحان بەكىنىسى نەمەسە حەسامي قامالى - رۋدحان اۋىلىنداعى فۋمان ۋەزىنىڭ ورماندى بيىكتەرىنەن جوعارى تۇرعىزىلعان ساسانيدتەر يمپەرياسى (ب. ز. 224-651 ج ج. ) داۋىرىنە جاتاتىن قامالدىڭ اتاۋى. ونىڭ، اۋدانى 2,6 گ ا، 65 مۇناراسى مەن قورعاندارى مەن قابىرعاسىنىڭ ۇزىندىعى 1,5 مەتر. قابىرعالار مەن مۇنارالاردىڭ اينالاسىندا بالقىتىلعان ماتەريالداردى قۇيۋعا جانە تۇسىرۋگە ارنالعان ەڭىس تەسىكتەر بار. بۇل قامال فۋمان قالاسىنان 30 شاقىرىم جەردە.
رۋدحان قامالىندا 65 مۇنارا مەن ۇزىندىعى 1500 مەتر قابىرعا بار.
قالە رۋدحان اۋىلىنىڭ تۇرعىندارى تالاشي تىلىندە سويلەيدى، كەيبىر ماماندار قامال ساسانيدتەر داۋىرىندە سالىنعان جانە ارابتاردىڭ يرانعا باسىپ كىرۋىمەن تۇسپا-تۇس كەلگەن دەپ ەسەپتەيدى.
قامالدىڭ سولتۇستىك-شىعىس شەتىندە وتە ادەمى ەكى قاباتتى عيمارات بار، ال ونىڭ وڭتۇستىك جاعىندا ۇڭگىر بار تاۋ بار، جەرگىلىكتى تۇرعىنداردىڭ ايتۋى بويىنشا، بۇل بۇرىن شابۋىل كەزىندە قامالعا بەلگى بەرەتىن كۇزەتشىلەردىڭ ورنى بولعان.
يراندىق باسلىم بۇل شاعىن تانىستىرۋىندا رۋدحان قامالىنا قالاي بارۋعا بولاتىنى تۋرالى دا مالىمەتتەر بەرگەن.
قىتايعا ۆيزاسىز كىرگەن شەتەلدىكتەردىڭ سانى ەكى ەسەگە ارتتى - «حالىق گازەتى»
ۇلتتىق ستاتيستيكا بيۋروسى 28-اقپان كۇنى جاريالاعان 2024 -جىلعى ۇلتتىق ەكونوميكالىق جانە الەۋمەتتىك دامۋ ستاتيستيكاسى بيۋللەتەنىندە 2024-جىلى ەلگە ۆيزاسىز كىرگەن شەتەلدىكتەردىڭ سانى 20,12 ميلليون بولىپ، %112,3 وسكەن، دەپ حابارلايدى «حالىق گازەتى» باسىلىمى.
سونداي-اق وسى اپتادا «حالىق گازەتى» باسىلىمىندا «2024 -جىلى قىتايدىڭ ج ءى ءو وتكەن جىلمەن سالىستىرعاندا %5,0 عا ءوستى» دەگەن تاقىرىپتاعى اقپارات جارىق كوردى.
قىتايلىق ب ا ق- تىڭ دەرەگىنشە، ۇلتتىق ستاتيستيكا بيۋروسى 2024 -جىلعى ۇلتتىق ەكونوميكالىق جانە الەۋمەتتىك دامۋ ستاتيستيكاسى بيۋللەتەنىن شىعاردى. الدىن الا ەسەپ بويىنشا، 2024 -جىلى ج ءى ءو 134,91 تريلليون يۋان بولىپ، وتكەن جىلمەن سالىستىرعاندا %5,0 عا جوعارىلاعان.
قازاقستان مەن وزبەكستان ءتورت جاڭا ساۋدا ءدالىزىن اشادى - ءو ز ا
وزبەكستان قازاقستانمەن تاۋار اينالىمىن كەڭەيتۋ ماقساتىندا ءتورت جاڭا ساۋدا وتكەلىن اشۋدى جوسپارلاپ وتىر.
بۇل تۋرالى وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى باحتيەر يبراگيموۆ جەتىسۋ وبلىسىنىڭ كاسىپكەرلەرىمەن كەزدەسۋ بارىسىندا مالىمدەدى، دەپ حابارلايدى «ءو ز ا» اقپارات اگەنتتىگى.
حابارلامادا ايتىلۋىنشا، ديپلوماتيالىق ميسسيا باسشىسى وزبەكستان تاراپى ۇسىنعان، ەكى ەل اراسىنداعى ەكونوميكالىق بايلانىستاردى نىعايتۋعا باعىتتالعان باستامالار تۋرالى ەگجەي-تەگجەيلى اقپارات بەردى.
اتاپ ايتقاندا، قازىرگى ۋاقىتتا مەملەكەتتىك شەكاراداعى باقىلاۋ-وتكىزۋ بەكەتتەرىندە جوندەۋ جۇمىستارى جۇرگىزىلىپ جاتقانى ايتىلدى. مۇنداي شارالار تاۋار اينالىمىنىڭ ارتۋىنا تىكەلەي ىقپال ەتەدى.
بۇگىندە وزبەكستاندا قازاقستان كاپيتالىنىڭ قاتىسۋىمەن مىڭنان استام كاسىپورىن تابىستى جۇمىس ىستەپ جاتىر. ايتا كەتۋ كەرەك، ەكى ەل اراسىنداعى ەكونوميكالىق قارىم- قاتىناستار ءوڭىرارالىق ىنتىماقتاستىقتى نىعايتۋعا دا وڭ اسەر ەتەدى.
- وتكەن جىلى قازاقستان مەن وزبەكستان اراسىندا جالپى 4,2 ميلليارد دوللار كولەمىندە تاۋارلار مەن قىزمەتتەر ساۋداسى جۇرگىزىلدى. سول كەزەڭدە وزبەكستان قازاقستانعا 1,4 ميلليارد دوللار كولەمىندە ءونىم ەكسپورتتادى، - دەپ جازادى وزبەكستاندىق ب ا ق.
سونداي- اق وسى اپتادا «ءوزا» - دا «رۋسلان ابدۋللايەۆ كاسىبي بوكستاعى دەبيۋتىندە جەڭىسكە جەتتى» دەگەن تاقىرىپتاعى اقپارات جاريالاندى.
اتالعان اقپارات كوزىنىڭ دەرەگىنشە، ا ق ش- تىڭ كاليفورنيا شتاتىندا كەزەكتى كاسىبي بوكس ءتۋرنيرى ءوتىپ جاتىر.
اۋەسقوي بوكستا الەم چەمپيونى اتانعان قانداسىمىز رۋسلان ابدۋللايەۆ وسى تۋرنيردە رينگكە كوتەرىلدى.
كاسىبي بوكستاعى دەبيۋتتىك جەكپە-جەگىن وتكىزگەن ابدۋللايەۆ مەكسيكالىق حوسە ۆالەنزۋەلا الۆارادومەن كەزدەستى. جەكپە-جەكتىڭ ەكىنشى راۋندىندا رۋسلان ابدۋللايەۆ قارسىلاسىن جويقىن سوققىمەن تەحنيكالىق نوكاۋتقا ءتۇسىرىپ، جەڭىسكە جەتتى.
ەسكە سالا كەتەيىك، رۋسلان انۋار ۇلى ابدوللايەۆ 2002 -جىلى تۋعان، وزبەكستاندىق اۋەسقوي بوكسشى، ۇلتى قازاق، ءبىرىنشى جارتىلاي ورتا سالماقتا ونەر كورسەتەتىن وزبەكستان ۇلتتىق قۇراماسىنىڭ مۇشەسى، بوكستان ازيا چەمپيونى (2022 ج) ، وزبەكستان جانە حالىقارالىق تۋرنيرلەرىنىڭ بىرنەشە دۇركىن جۇلدەگەرى.
نەلىكتەن كەيبىر پاسپورتتار باسقالارىنا قاراعاندا كۇشتىرەك؟ - TRT
ميلليونداعان ادام كۇن سايىن تولقۇجاتىمەن شەكارانى كەسىپ وتسە دە، كەيبىر ءتولقۇجاتتار يەلەرىنە كوبىرەك ساياحات ەركىندىگىن ۇسىنادى. بۇل ايىرماشىلىقتىڭ سەبەبى نە؟
بۇل سۇراقتىڭ جاۋابىن وسى اپتادا «trt.global» باسىلىمى بەرگەن ەكەن.
اتالعان ب ا ق- تىڭ دەرەگىنشە، «Henley Partners» جانە «Arton Capital» جاريالاعان ءتولقۇجات يندەكستەرى ۆيزاسىز ەلدەر سانىنا نەگىزدەلگەن ءتولقۇجاتتاردىڭ كۇشىن ولشەيدى. سينگاپۋر جانە جاپونيا سياقتى ەلدەردىڭ ءتولقۇجاتتارى 190 نان استام ەلگە ۆيزاسىز كىرۋگە مۇمكىندىك بەرسە، اۋعانستان، سيريا جانە پاكىستان سياقتى ەلدەردىڭ ءتولقۇجاتتارى قوزعالىستى شەكتەيدى.
«Henley Partners» وكىلى بۋراك دەميرەل يندەكس دەرەكتەرىنىڭ حالىقارالىق اۋە كولىگى قاۋىمداستىعىنان الىنعانىن جانە ءارتۇرلى دەرەككوزدەر ارقىلى قولداۋ كورسەتىلەتىنىن ايتادى.
سونداي-اق، تۇركيالىق باسىلىمنىڭ مالىمەتىنشە، پاسپورت كۇشىنە اسەر ەتەتىن فاكتورلارعا ەكونوميكالىق تۇراقتىلىق، ەكى جاقتى ساۋدا كولەمى، حالىق سانى جانە ۆيزا شارتتارىن بۇزۋ ستاتيستيكاسى كىرەدى.
- كوشى-قون جونىندەگى ساراپشى ۋگۋر التۋندال جالپى ىشكى ءونىم كورسەتكىشى جوعارى ەلدەردىڭ ءتولقۇجاتتارى كۇشتىرەك، ويتكەنى بۇل ەلدەردەن قاجەتسىز كوشى-قون قاۋپى تومەن ەكەنىن ايتادى. كەيبىر ەلدەردىڭ شەنگەن ۆيزاسىنا قاتىستى ماسەلەلەرى ۇلتتىق بىرەگەيلىك پەن مادەنيەتكە نەگىزدەلگەن كەمسىتۋشىلىك ساياساتتىڭ بار ەكەنىن كورسەتەدى. ساياسي تۇراقسىزدىق پەن ىشكى جانجالدار ءتولقۇجات كۇشىنە دە كەرى اسەر ەتەدى، - دەپ جازادى trt.global.
بەيسەن سۇلتان
