نەلىكتەن كورەيلەر ۇزاق ءومىر سۇرەدى: ءداستۇرلى مەديتسينانىڭ قۇپيالارى
كورەيادا ەگدە جاستاعىلاردىڭ جاس ۇرپاقتان كەم تۇسپەي، بەلسەندى ءومىر سالتىن ۇستاناتىنىنا ەرىكسىز تاڭداناسىز. ولاردىڭ ورتاشا ءومىر ءسۇرۋ ۇزاقتىعى بۇگىندە 80 جىلدان اسادى. ەلدىڭ الەۋمەتتىك قامسىزداندىرۋ مينيسترلىگى ۇزاق ءومىر ءسۇرۋ كورسەتكىشى 100 جىلعا جەتەدى دەپ بولجاپ وتىر. كورسەتكىشتى وسىرۋگە قانداي فاكتورلار اسەر ەتەدى؟ بۇل تۋرالى Kazinform ءتىلشىسى ءداستۇرلى كورەي مەديتسيناسى ينستيتۋتىنىڭ باس مەنەدجەرى بايك يۋسانگپەن اڭگىمەلەسكەن ەدى.
بايك يۋسانگتىڭ ايتۋىنشا، كورەيلەردىڭ دەنساۋلىعىنا ەڭ الدىمەن قورشاعان ورتا اسەر ەتەدى.
«قورشاعان ورتانىڭ تازا بولۋى ادامنىڭ دەنساۋلىعى ءۇشىن ماڭىزدى. كورەيادا تازا سۋ، جاعىمدى كليمات جانە قولايلى اتموسفەرا ۇزاق ءومىر سۇرۋگە ەڭ قاجەتتى فاكتور. تاعى ءبىر ماڭىزدى اسپەكت - تاۋلى ايماقتىڭ بولۋى. ءداستۇرلى مەديتسينادا قولدانىلاتىن كوپتەگەن دارىلىك وسىمدىك پەن ءشوپ تاۋلاردا وسەدى. كورەيلەر ولاردى ەرتەدەن قولدانىپ كەلەدى جانە تاماققا دا قوسادى»، - دەيدى ينستيتۋتتىڭ باس مەنەدجەرى.
مامان كەلەسى فاكتوردىڭ تاماقتانۋمەن بايلانىستى ەكەنىن ايتتى. ەتتىڭ ورنىنا كورەيلەر ديەتالىق ءداندى داقىلدار، وسىمدىكتەر مەن كوكونىستەردى كوپ جەيدى.
«كورەيا، قىتاي جانە جاپونيا ءداستۇرلى مەديتسينامەن اينالىسادى. ءبىراق ءار ەلدە وزگەشە. قىتاي مەن جاپونيا بەلگىلى ءبىر اۋرۋدى جويۋعا نازار اۋدارادى. كورەي ءداستۇرلى مەديتسيناسى يممۋنيتەتتى، دەنەنىڭ جالپى ەنەرگياسىن ساقتاپ، نىعايتۋدى ۇستانادى. بۇل اسىرەسە ەمدەۋ ادىستەرىندە ايقىن كورىنەدى. بىزدە اۋرۋلارعا ءتيىمدى قارسى تۇرۋ ءۇشىن ەنەرگيانى جاقسارتۋعا باسا نازار اۋدارىلادى»، - دەپ ءتۇسىندىردى بايك يۋسانگ.
كورەيادا اۋرۋلاردىڭ الدىن الۋ جانە ولاردى ءداستۇرلى جولمەن ەمدەۋ العا قويىلعان. ول ءۇشىن ارنايى ۆيتاميندەر بار.
«ۆيتاميندەردىڭ پايداسى مول جانە اياسى كەڭ. ونى سۋىق تيگەندە نەمەسە اسقازان- ىشەك جولدارىنىڭ پروبلەمالارى بولعاندا قولدانادى. سونداي-اق بۇلشىقەتتىڭ اۋرۋى، اس قورىتۋ پروبلەمالارى جانە جۇيكە جۇيەسىنىڭ اۋرۋلارى ءۇشىن دە پايدالى. ودان بولەك، ءۆيتاميندى دەنەنى اۋىر سەزىنگەندە ءىشۋ كەرەك. سول سياقتى ارنايى ارنايى پرەپاراتتار بار. ولار ەنەرگيانى قالپىنا كەلتىرۋ ءۇشىن ارنايى جاسالعان. اسىرەسە تابەتتىڭ ناشارلىعىنان نەمەسە اس قورىتۋ پروبلەماسى بولعان جانە شارشاۋ كەزىندە ىشەدى. ءدارى-دارمەك سۋىق تيۋ، جوعارى تەمپەراتۋرا، باس اۋرعاندا جانە جوتەلمەن كۇرەستە وتە ءتيىمدى. ماڭىزدىسى، ولار بەلگىلى ءبىر بەلگىلەردى جەڭىلدەتۋگە عانا ەمەس، سونىمەن قاتار جالپى اۋرۋدى، السىزدىكتى جانە بۇكىل دەنەنىڭ اۋىرسىنۋىن ەمدەۋگە ارنالعان»، - دەپ ءتۇسىندىردى ساراپشى.
اتالعان ءدارى-دارمەك دارىگەردىڭ نۇسقاۋىمەن رەتسەپتىمەن بەرىلەدى.
«دەنساۋلىقتى جاقسارتۋعا جانە ەنەرگيانى قالپىنا كەلتىرۋگە ارنالعان مۇنداي ءدارى-دارمەكتەر ءار ادامنىڭ جەكە ەرەكشەلىكتەرىن ەسكەرە وتىرىپ، بىرنەشە نۇسقادا ۇسىنىلادى. كاسىبي مەديتسينالىق زەرتتەۋلەردەن الىنعان بۇل ونىمدەر الەمدىك نارىقتارعا دا ەكسپورتتالادى»، - دەپ تولىقتىردى ينستيتۋت وكىلى.
ءداستۇرلى كورەي مەديتسيناسى ينستيتۋتى - كورەيانىڭ الەۋمەتتىك قامسىزداندىرۋ مينيسترلىگى جانىنان قۇرىلعان قوعامدىق مەكەمە. ونىڭ مىندەتىنە ەلدەگى مەديتسينالىق سالانى جالپى دامىتۋ، مەديتسينالىق ونەركاسىپتى ىلگەرىلەتۋ جانە ەكسپورتتاۋ، شەتەلدەن پاتسيەنتتەردى تارتۋ كىرەدى. سونىمەن قاتار ينستيتۋت كورەي مەديتسيناسىن زاماناۋي جاڭارتۋمەن اينالىسادى.
اۆتور
داۋلەت ىزتىلەۋ
