نەكە سارايى، اۋرۋحانا، مۋزەي: الماتىدا قاراۋسىز قالعان عيماراتتار قاشان جوندەلەدى
الماتى. KAZINFORM - الماتىدا ءبىراز جىلدار بويى قاراۋسىز قالعان نە جوندەۋ كورمەگەن عيماراتتار بارشىلىق. ولاردىڭ قالا كەلبەتىنە نۇقسان كەلتىرەتىنى ءسوزسىز.
Kazinform اگەنتتىگى جاۋاپتى ۆەدومستۆولارعا ساۋال جولداپ، قالاداعى بىرنەشە ماڭىزدى نىسان بويىنشا جوبا-جوسپاردى انىقتادى.
بىلتىر الماتىنىڭ نەكە سارايى قاراۋسىز قالعانىن جازعانبىز. المالى اۋدانى اباي داڭعىلىنىڭ بويىندا ورنالاسقان عيمارات 1971 -جىلى سالىنعان.
2016 -جىلى نەكە سارايى «التىن ءدان قازاقستان» كومپانياسىنا 20 جىلعا سەنىمگەرلىك باسقارۋعا بەرىلگەن، الايدا ارتىلعان مىندەتتەردىڭ تولىق ورىندالماۋىنا بايلانىستى كەلىسىمشارت سوت شەشىمىمەن بۇزىلعان.
كەيىنگى جىلدارى سىرت كەلبەتى ناشارلاعان نىسان قازىرگى ۋاقىتتا الماتى قالاسىنىڭ مەملەكەتتىك اكتيۆتەر باسقارماسىنىڭ يەلىگىندە.
اگەنتتىك ساۋالىنا جاۋاپ بەرگەن ۆەدومستۆو نەكە سارايى 10 جىلعا سەنىمگەرلىك باسقارۋعا بەرىلگەنىن حابارلادى.
مەملەكەتتىك اكتيۆتەر باسقارماسىنىڭ جاۋابىنا سايكەس، وبەكت مەملەكەتتىك مۇلىكتى ءتيىمدى باسقارۋ، جوندەۋ جۇمىستارىن جۇرگىزۋ، سونداي- اق نىسانعا كەمىندە 1 ميلليارد تەڭگە ينۆەستيتسيا تارتۋ ماقساتىندا بەرىلگەن.
- المالى اۋدانى اباي داڭعىلى، 101ا مەكەنجايىندا ورنالاسقان «جاس وتاۋ» نەكە سارايى ەلەكتروندى تەندەر ارقىلى «Jar Jar Almaty» ج ش س-ىنا 10 جىل مەرزىمگە ساتىپ الۋ قۇقىعىنسىز سەنىمگەرلىك باسقارۋعا بەرىلدى. ەلەكتروندى تەندەردىڭ تالاپتارىنا سايكەس، سەنىمگەرلىك باسقارۋعا العان كومپانيا شارت جاسالعان ساتتەن باستاپ ءبىر جىل ىشىندە ساۋلەتتىك كەلبەتىن ساقتاي وتىرىپ، عيماراتتىڭ قاسبەتىنە جوندەۋ جۇمىستارىن جۇرگىزۋگە، ونىڭ اينالاسىن اباتتاندىرۋعا مىندەتتى، - دەپ حابارلادى باسقارمادان.
سونىمەن قاتار ۆەدومستۆو ءوز جاۋابىندا نەكە سارايىنىڭ نىسانالى ماقساتى وزگەرمەيتىنىن اتاپ ءوتتى.
- تەندەردىڭ شارتتارىنا سايكەس، نىسان تەك ماقساتتى باعىتتا عانا قولدانىلادى، - دەلىنگەن جاۋاپتا.
تەمىرجول اۋرۋحاناسىنىڭ تاعدىرى
2023 -جىلى الماتىنىڭ بۇرىنعى اكىمى ەربولات دوسايەۆ اباي مەن ماسانشى كوشەلەرىنىڭ قيىلىسىندا ورنالاسقان بۇرىنعى تەمىرجول اۋرۋحاناسىنىڭ ورنىندا بالالاردى وڭالتۋ ورتالىعى اشىلاتىنىن ايتقان ەدى.
كوپ جىلدار قاراۋسىز قالعان عيماراتتىڭ بۇگىنگى جاعدايى مۇشكىل. عيماراتتىڭ قابىرعاسى كوگەرىپ، ەسىك- تەرەزەسى سىنعان.
كەيىن عيمارات اۋماعى قورشالىپ، نىسان پاسپورتى ىلىنگەن. پاسپورت بويىنشا جوندەۋ جۇمىستارى 2024 -جىلدىڭ مامىرىندا باستالىپ، 2025 -جىلدىڭ جەلتوقسان ايىندا اياقتالۋى ءتيىس ەدى.
الايدا جوبالاۋ- سمەتالىق قۇجاتتامانى ازىرلەۋ بەلگىلەنگەن مەرزىمدە اياقتالماعان سوڭ قۇرىلىس جۇمىستارى 2024 -جىلدىڭ قازان ايىنا اۋىستىرىلدى.
دەگەنمەن قۇرىلىس جۇمىستارى بۇگىنگى دەيىن ءالى باستالعان جوق.
الماتى قالاسىنىڭ قۇرىلىس باسقارماسى اگەنتتىك ساۋالىنا جاۋاپ بەرە وتىرىپ، بالالاردى وڭالتۋ ورتالاعىنىڭ جوباسى مەملەكەتتىك ساراپتامادان ۇسىنىلعان ۋاقىتتا وتە الماعانىن مالىمدەدى.
- وسى جىلدىڭ 3-ناۋرىزىندا بۇل نىسان بويىنشا ازىرلەنگەن جوبالاۋ-سمەتالىق قۇجاتتاما «مەمساراپتاما» ر م ك پورتالىنا ساراپتامادان ءوتۋ ءۇشىن جۇكتەلدى. قازىرگى تاڭدا جوبالاۋشى ۇيىم - «جەتىسۋ ساۋلەت قۇرىلىسى» ج ش س جوبالىق شەشىمدەر بويىنشا بەرىلگەن «مەمساراپتاما» مەكەمەسىنىڭ ەسكەرتۋلەرىن پىسىقتاپ جاتىر. قورىتىندى بەرۋ ۋاقىتى - 2025 -جىلعى 10-ماۋسىم. قورىتىندى ناتيجەسىنە قاراي قۇرىلىستى قارجىلاندىرۋ ماسەلەسى قارالادى، - دەلىنگەن قۇرىلىس باسقارماسىنىڭ جاۋابىندا.
وليمپيادالىق داڭق مۋزەيى
قالادا نىسانداردىڭ ءبىرى - وليمپيادالىق داڭق مۋزەيى. سەيفۋللين جانە بوگەنباي باتىر كوشەلەرىنىڭ قيىلىسىندا ورنالاسقان رەسپۋبليكالىق سپورت جانە وليمپيادالىق داڭق مۋزەيىنىڭ بۇگىنگى جاعدايىنا قالا تۇرعىندارى شاعىمدانعان بولاتىن.
2016 -جىلدان بەرى جوندەۋ جۇمىستارى جۇرگىزىلمەگەن مۋزەيگە بايلانىستى قازاق سپورت جانە تۋريزم اكادەمياسى جاۋاپ بەرگەن ەدى.
- مۇراجاي عيماراتى ارحيتەكتۋرالىق ەسكەرتكىشتەر ساناتىنا جاتاتىندىقتان ءبىز «قازقايتاجاڭعىرتۋ» ر م ك تالاپتارىنا سايكەس جانە وسى مەكەمەنىڭ ارنايى رۇقساتىنسىز عيماراتتىڭ سىرتقى كەلبەتىنە كۇردەلى جوندەۋ جۇمىستارىن جۇرگىزە المايمىز. ءبىراق ءبىزدىڭ مەكەمەنىڭ شارۋاشىلىق جۇمىستارىنىڭ جوسپارىنا سايكەس، وسى جىلدىڭ جاز مەزگىلىندە جەڭىل جوندەۋ جوسپارلانعان، - دەپ حابارلادى اكادەميا.
اۆتور
دوسبول اتاجان
