نەكە بۇزعاندارعا مەملەكەتتىك باج مولشەرى ارتادى

استانا. KAZINFORM - نەكەنى بۇزعان كەزدە تولەنەتىن مەملەكەتتىك باج مولشەرى ارتادى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.

- قازىرگى كۇنى جاڭا سالىق كودەكسىنىڭ جوباسى پارلامەنت سەناتىندا قارالىپ جاتىر. جوبادا نەكەنى بۇزعانى ءۇشىن مەملەكەتتىك باج مولشەرى 5 ا ە ك- كە (19660 تەڭگە) دەيىن ۇلعايتىلۋ قاراستىرىلعان. ۇكىمەت ءداستۇرلى وتباسى قۇندىلىقتارىن ىلگەرىلەتۋ بويىنشا جۇيەلى جۇمىس ىستەلىپ جاتىر. وتباسى جانە نەكە ينستيتۋتىن ساقتاۋ مەن نىعايتۋدىڭ 2025-2027 -جىلدارعا ارنالعان ءىس- شارالار جوسپارى بەكىتىلگەن. وتباسىلىق كەلىسپەۋشىلىكتەردى شەشۋدىڭ بالامالى ءتاسىلى رەتىندە وڭىرلىك سوتتار جانىنداعى بيلەر (اقساقالدار) كەڭەسىنىڭ قىزمەتى جانداندىرىلدى. كەڭەس قوعامداعى ىنتىماقتاستىق پەن بىرلىكتى ناسيحاتتاۋ، جانجالداسۋ دەڭگەيىن تومەندەتۋ، داۋلاردى شەشۋدە قازاق بيلەرىنىڭ تاجىريبەسىن پايدالانۋ، تۇرمىستىق داۋلارىن سوتقا جەتكىزبەي، ەكى جاقتى تاتۋلاستىرۋ جۇمىسىن ىستەيدى، - دەدى ولجاس بەكتەنوۆ جاۋابىندا.

ونىڭ دەرەگىنشە، اتالعان كەڭەستەر ءبىرقاتار وڭىردە (اتىراۋ، اباي، شىعىس قازاقستان، جامبىل، جەتىسۋ، باتىس قازاقستان، قاراعاندى، قوستاناي، قىزىلوردا، ماڭعىستاۋ، پاۆلودار جانە تۇركىستان وبلىستارىندا) جۇمىس ىستەيدى. سونىمەن قاتار مادەنيەت جانە اقپارات مينيسترلىگى جوعارعى سوتپەن بىرگە «باقىتتى وتباسى» جوباسىن ىسكە اسىرىپ جاتىر. جوبا اياسىندا پسيحولوگتار، زاڭگەرلەر، مەدياتورلار جانە الەۋمەتتىك قىزمەتكەرلەر كەڭەستەر بەرىپ، مەدياتيۆتى كەلىسىمدەر جۇرگىزەدى.

- وڭىرلىك اكىمدىكتەر جانىندا ايەلدەر ىستەرى جانە وتباسىلىق ساياسات جونىندەگى وڭىرلىك كوميسسيالار قىزمەت اتقارادى. كوميسسيا قۇرامىنا ۇ ە ۇ، انالار، اكەلەر كەڭەسى، ءوڭىر بەلسەندىلەرى، كاسىپكەرلەر جانە جاستار ەنگىزىلگەن. وتباسى قۇندىلىقتارىن دارىپتەۋ ماقساتىندا «ءبىرتۇتاس تاربيە» باعدارلاماسى اياسىندا ءبىلىم بەرۋ ۇيىمدارىندا اتا-انالاردى پەداگوگيكالىق قولداۋ ورتالىقتارى جۇمىس ىستەيدى، سيفرلىق پلاتفورماسى ازىرلەندى، - دەدى ۇكىمەت باسشىسى.

ايتا كەتەيىك، بىلتىر 124 مىڭ جۇپتىڭ نەكەسى قيىلسا، 61 جۇپ اجىراسۋعا ءوتىنىم بەرگەن.